អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយទ័ររ៉េស បានថ្លែងនៅថ្ងៃនេះថា អង្គការសហប្រជាជាតិ ត្រូវការថវិកាជាង ៤ពាន់លានដុល្លារ នៅចុងខែមីនានេះ ដើម្បីជួយដល់មនុស្សជិត ២០លាននាក់ ដែលកំពុងប្រឈមនឹងគ្រោះទុរភិក្សនៅក្នុងប្រទេសនីហ្សេរីយ៉ា សូម៉ាលី ស៊ូដង់ខាងត្បូង និងយ៉េមែន។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ដោយបានលើកឡើងពីជម្លោះប្រដាប់អាវុធ និងបម្រែបម្រួលអាកាសធាតុ ដែលជាផ្នែកមួយនៃតម្រូវការស្បៀងអាហារបន្ទាន់នោះ លោក ហ្គុយទ័ររ៉េស បានដឹកនាំការអំពាវនាវស្វែងរកថវិកា ៥.៦ពាន់លានដុល្លារ សម្រាប់ផ្ដល់ផ្ដល់ជំនួយមនុស្សធម៌ នៅក្នុងប្រទេសទាំង ៤ នៅក្នុងឆ្នាំនេះ ដោយក្នុងនោះ គេត្រូវទឹកប្រាក់ ៤.៤ពាន់លានដុល្លារ នៅត្រឹមចុងខែមីនានេះ ដើម្បីបញ្ចៀសគ្រោះហានិភ័យនេះ។
លោក ហ្គុយទ័ររ៉េស បានបន្ថែមថា ទោះបីជាមានការសន្យាផ្ដល់ជំនួយខ្លះក៏ដោយ ក៏គេទើបតែទទួលបានថវិកា ៩០លានដុល្លារប៉ុណ្ណោះរហូតមកដល់ពេលនេះ ឬស្មើនឹង ២ភាគរយនៃថវិកាដែលគេត្រូវការ។
លោក ហ្គុយទ័ររ៉េស បាននិយាយថា ជម្លោះប្រដាប់អាវុធ កំពុងធ្វើឲ្យអន្តរាយដល់មនុស្សជាតិ ខណៈលោកបានចាត់ទុកបញ្ហាបម្រែបម្រួលអាកាសធាតុ ជាដំណោះស្រាយសំខាន់សម្រាប់បញ្ហាមនុស្សធម៌។
កាលពីសប្ដាហ៍មុន ប្រធានកម្មវិធីស្បៀងអាហារពិភពលោករបស់អង្គការសហប្រជាជាតិ បានប្រាប់ Reuters ថា មនុស្សជាង ២០លាននាក់នៅក្នុងប្រទេសទាំង ៤នេះ កំពុងប្រឈមនឹងការស្លាប់ដោយសារភាពស្រេកឃ្លាននៅក្នុងរយៈពេល ៦ខែ៕