ប្រទេសវៀតណាមបាននិយាយថា ខ្លួននឹងដាក់ពិន័យទៅលើមន្ត្រីជាន់ខ្ពស់ ១១រូប ដែលបានប្រព្រឹត្តខុស ជុំវិញករណីកាក់សំណល់ពុលកាលពីឆ្នាំមុន ដែលបានសម្លាប់ត្រីរាប់ពាន់តោន និងជាមហន្តរាយបរិស្ថានដ៏អាក្រក់បំផុតមួយនៅក្នុងប្រទេសនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
AFP បានផ្សាយបន្តថា ក្រុមហ៊ុនផលិតដែកថែបរបស់តៃវ៉ាន់ Formosa ត្រូវបានដាក់ឲ្យទទួលខុសត្រូវចំពោះវិបត្តិនេះ ដែលធ្វើឲ្យអន្តរាយដល់ជីវភាពរស់នៅរបស់សហគមន៍នេសាទនៅតំបន់ឆ្នេរសមុទ្រ ស្ថិតនៅភាគកណ្ដាលប្រទេសវៀតណាម ហើយក្រុមហ៊ុននេះត្រូវបានរដ្ឋាភិបាលផាកពិន័យជាប្រាក់ ៥០០លានដុល្លារ។
ក្រុមប្រជានេសាទ និងសកម្មជននៅក្នុងប្រទេសវៀតណាម បានចេញតវ៉ាដោយកម្រ ចាប់តាំងពីគ្រោះមហន្តរាយនេះបានកើតឡើង ហើយពួកគេបានដាក់ពាក្យបណ្ដឹងប្រឆាំងនឹងក្រុមហ៊ុនខាងលើ ដោយទាមទារសំណងសមរម្យ។
យោងតាមសេចក្ដីប្រកាសព័ត៌មានផ្សាយនៅលើវេបសាយរបស់បក្សកុម្មុយនីស្តវៀតណាម បានឲ្យដឹងថា មន្ត្រីចំនួន ១១រូប ក្នុងនោះមានទាំងអតីតរដ្ឋមន្ត្រីបរិស្ថាន និងអតីតអភិបាលក្រុងផងដែរ បានរំលោភលើច្បាប់ និងគ្រប់គ្រងបញ្ហានេះមិនបានល្អ។
សេចក្ដីប្រកាសព័ត៌មាននោះ បានរៀបថា ទង្វើរំលោភច្បាប់នេះ មានកម្រិតធ្ងន់ធ្ងរ និងត្រូវតែទទួលការពិន័យ ប៉ុន្តែ គេពុំបានដឹងពីរបៀបដែលគេដាក់ពិន័យទៅលើមន្ត្រីទាំងនោះឡើយ។
ត្រីរាប់ពាន់តោន ក្នុងនោះមានទាំងប្រភេទត្រីកម្រផងដែរ ត្រូវគេប្រមូលបាននៅតាមឆ្នេរសមុទ្រ បន្ទាប់ពីពុលកាក់សំណល់គីមី ដែលបញ្ហានេះជំរុញឲ្យមានកំហឹងពីសាធារណជននៅក្នុងប្រទេសកុម្មុយនីស្ដមួយនេះ៕
