ការគ្រប់គ្រងកាំភ្លើងដើម្បីធានាសុវត្ថិភាពក្នុងការរស់នៅក្នុងសង្គមអាមេរិក កំពុងតែមានការខ្វែងគំនិតគ្នាដោយក្រុមខ្លះចង់ឲ្យមានច្បាប់ហាមមនុស្សទូទៅប្រើកាំភ្លើង ប៉ុន្តែក្រុមខ្លះទៀតនៅតែទាមទារប្រើប្រាស់កាំភ្លើង។
ការចោទជាបញ្ហានេះឡើងវិញ ក្រោយពេលដែលមានហេតុការណ៍បាញ់ប្រហារក្នុងសាលារៀនជាទ្រង់ទ្រាយធំកើតឡើងជាថ្មីទៀតនៅក្នុងខែកុម្ភៈនេះ។
កាលពីម្សិលមិញលោក ដូណាល ត្រាំ ថ្លែងថា ដើម្បីឲ្យនៅតាមសាលារៀនមានសុវត្ថិភាពលោកចង់ឲ្យគ្រូបង្រៀនកាន់កាំភ្លើង ដើម្បីឆ្លើយតបឲ្យបានទាន់ពេល នៅពេលដែលមានករណីបាញ់ប្រហារកើតឡើង។
ប៉ុន្តែខាងមតិរបស់គ្រូបង្រៀនបានជំទាស់ដោយថា ពួកគេមានសមត្ថភាពបង្រៀន មិនមានជំនាញការពារសន្តិសុខនោះទេ។ គ្រូបង្រៀនខ្លះចោទសួរថា តើពួកគេត្រូវចូលរួមពីរបៀបបាញ់បោះ ឬ វិធីសាស្ត្រការពារសន្តិសុខមុនពេលចូលបង្រៀនឬ យ៉ាងម៉េច?
នៅក្នុងសភា និង មហាជនអាមេរិកក៏កំពុងមានការខ្វែងគំនិតគ្នាដែរ ដោយក្រុមខ្លះចង់ឲ្យចេញច្បាប់ហាមមហាជនប្រើកាំភ្លើង ហើយក្រុមខ្លះទៀតថា ពួកគេត្រូវការសិទ្ធិក្នុងការប្រើប្រាស់កាំភ្លើង ដើម្បីការពារសន្តិសុខផ្ទាល់ខ្លួន។
ការជជែកគ្នាពីការប្រើប្រាស់កាំភ្លើងនៅអាមេរិក ផុសផុលឡើងវិញបន្ទាប់ពីការហេតុការបាញ់ប្រហារក្នុងសាលារៀនក្នុងរដ្ឋហ្វ័រីដាកាលពីថ្ងៃទី១៥ខែកុម្ភៈបណ្តាលឲ្យមនុស្ស១៧នាក់ស្លាប់ និង ជាង៤០នាក់រងរបួស។
ហេតុការណ៍បាញ់ប្រហារនៅថ្ងៃទី១៥ខែកុម្ភៈនោះ គេចាត់ទុកជាហេតុការណ៍បាញ់ប្រហារធំបំផុត បន្ទាប់ពីការបាញ់ប្រហារនៅក្នុងសាលាកាលពីឆ្នាំ២០១២ ដែលកាលណោះសម្លាប់មនុស្សអស់២៦នាក់។
នៅអាមេរិកក្នុងដើមឆ្នាំ២០១៨នេះ មានករណីបាញ់ប្រហារនៅតាមសាលារៀនចំនួន១៨លើករួចមកហើយ ដែលករណីខ្លះមានអ្នកស្លាប់ និងខ្លះទៀតរងរបួស។
បើគិតចាប់ពីឆ្នាំ២០១៣មក មានករណីបាញ់ប្រហារនៅតាមសាលារៀនចំនួន២៩១ករណី ហើយបើគិតជាមធ្យមក្នុង១សប្តាហ៍មានករណីបាញ់ប្រហារមួយកើតឡើង៕