ភ្នាក់ងារចារកម្មរបស់សហរដ្ឋអាមេរិកបានចោទ លោកនាយករដ្ឋមន្ត្រី ហ៊ុន សែន ថា កំពុងបំផ្លាញលទ្ធិប្រជាធិបតេយ្យ និងសិទ្ធិមនុស្សនៅកម្ពុជា ដើម្បីបន្តកាន់អំណាចនៅឆ្នាំ២០១៨ ខណៈបក្សប្រឆាំងដែលជាដៃគូប្រកួត ត្រូវបានរំលាយកាលពីពាក់កណ្តាលខែវិច្ឆិកា ឆ្នាំមុន។
ក្នុងរបាយការណ៍ចំនួន២៨ទំព័ររបស់ចារកម្មអាមេរិក (CIA) ស្តីពីការគំរាមកំហែងនៅទូទាំងពិភពលោក ចេញផ្សាយកាលពីម្សិលមិញថា លោក ហ៊ុន សែន នឹងដាក់សម្ពាធស្ថាប័នប្រជាធិបតេយ្យ សង្គមស៊ីវិល និងប្រើប្រាស់ស្ថាប័នរដ្ឋាភិបាល ប្រព័ន្ធតុលាការ ដើម្បីការគាំពារ និងហិង្សានយោបាយ ដោយថាដើម្បីបន្តដឹកនាំប្រទេសកម្ពុជានៅក្រោយការបោះឆ្នោតឆ្នាំ២០១៨។
របាយការណ៍នេះបញ្ជាក់ថា យុទ្ធសាស្ត្រនយោបាយលោក ហ៊ុន សែន ព្យាយាមផ្តាច់ខ្លួនចេញពីប្រទេសលោកសេរី ដើម្បីងាកទៅពឹងការ គាំទ្រផ្នែកនយោបាយ និងហិរញ្ញវត្ថុពីកុម្មនីស្តចិន។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ច្រានចោលរបាយការណ៍របស់សហរដ្ឋអាមេរិកនេះ ដោយថារដ្ឋាភិបាលដឹកនាំកម្ពុជា ស្របតាមច្បាប់ និងឆន្ទៈរបស់ប្រជាពលរដ្ឋដែលបោះឆ្នោតឲ្យ។
លោកមានប្រសាសន៍ថា «ចង់និយាយបែបអវិជ្ជមាន ឬមួយក៏ចង់បន្តុះបង្អាប់ ខ្ញុំយល់ថា ការមិនត្រូវទេ ពីព្រោះនាយករដ្ឋមន្ត្រីកើតចេញគណបក្សឈ្នះឆ្នោត ការកាន់អំណាចរបស់នាយករដ្ឋមន្ត្រីហ៊ុន សែន មិនមែនជារឿងខុសច្បាប់ ជារឿងត្រឹមត្រូវទៅតាមគោលការណ៍ច្បាប់ផងនិងត្រឹមត្រូវទៅតាមឆន្ទៈរបស់ប្រជាពលរដ្ឋដែលបោះឆ្នោតគាំទ្រឲ្យគណបក្សប្រជាជនកម្ពុជា ជាគណបក្សឈ្នះឆ្នោត»។
អ្នកស្រាវជ្រាវពីការអភិវឌ្ឍសង្គម លោក មាស នី យល់ថា បើលោក ហ៊ុន សែន នៅតែបន្តប្រើយុទ្ធសាស្ត្រដឹកនាំប្រទេសដូចបច្ចុប្បន្ន នឹងធ្វើឲ្យប៉ះពាល់ដល់ប្រទេសជាតិលើឆាកអន្តរជាតិ។
លោកមានប្រសាសន៍ថា «ការបោះឆ្នោតនៅឆ្នាំ២០១៨ អាចស្ថិតនៅក្រោមបក្សតែមួយ ឯកបក្ស ហើយកាលណាស្ថិតនៅក្រោមឯកបក្សហើយ គឺការទទួលស្គាល់ពីអន្តរជាតិពិតជាមិនអាចទៅរួច ហើយបើសិនជាមិនមានការទទួលស្គាល់ពីអន្តរជាតិហើយនោះ ប្រទេសខ្មែរយើង បើទោះបីរដ្ឋាថាមិនខ្វល់ក៏ដោយ ប៉ុន្តែកិត្តិយសប្រទេសជាតិវានឹងធ្លាក់ទៅតាមហ្នឹងដែរ ដូចយើងគ្រួសារមួយដែលរស់នៅក្នុងភូមិមួយហើយគេអ្នកជិតខាង គេមិនទទួលស្គាល់ នោះជាបញ្ហា នេះយើងអត់ទាន់គិតថា តើយើងត្រូវទទួលរងសម្ពាធសេដ្ឋកិច្ច ឬពាណិជ្ជកម្មយ៉ាងម៉េចទេ? ព្រោះឥឡូវយើងអត់ទាន់ដឹងទេ»។
តាមប្រតិទិន ការបោះឆ្នោតថ្នាក់ជាតិ និងប្រព្រឹត្តទៅនៅចុងខែកក្កដា ឆ្នាំ២០១៨ ដោយពុំមានវត្តមានអតីតបក្សសង្គ្រោះជាតិចូលប្រកួតប្រ ជែងជាមួយបក្សកាន់អំណាចនោះទេ ខណៈបក្សនេះត្រូវបានតុលាការកំពូលសម្រេចរំលាយចោលកាលពីពាក់កណ្តាលខែវិច្ឆិកា ឆ្នាំមុន ហើយថ្នាក់ដឹកនាំ និងសមាជិក ១១៨នាក់របស់បក្សនេះ ត្រូវបានហាមឃាត់មិនឲ្យធ្វើនយោបាយរយៈពេល ៥ឆ្នាំ។
ក្រោយពីរំលាយ គ.ជ.ប បានយកអាសនៈសភាទាំង ៥៥របស់អតីតបក្សប្រឆាំងដ៏ធំមួយនេះ បែងចែកកាលពីថ្ងៃទី២២ ខែវិច្ឆិកា ឆ្នាំមុន ទៅឲ្យគណបក្សចំនួន៥ ដែលក្នុងនោះមាន គណបក្ស ហ៊្វុន ស៊ិនប៉ិច បាន ៤១អាសនៈ គណបក្សសញ្ជាតិកម្ពុជាបាន ២អាសនៈ និងខ្មែរអភិវឌ្ឍន៍សេដ្ឋកិច្ចទទួលបាន ១អាសនៈ។
ករណីនេះ ធ្វើឲ្យសហគមន៍អន្តរជាតិ មានសហរដ្ឋអាមេរិក ចក្រភពអង់គ្លេស និងសហភាពអឺរ៉ុប បានថ្កោលទោសចំពោះរដ្ឋាភិបាលកម្ពុជា ហើយថា ប្រទេសនេះកំពុងឃ្លាតចាកពីគន្លងប្រជាធិបតេយ្យ។ ប៉ុន្តែរដ្ឋាភិបាលច្រានចោលការចោទប្រកាន់នេះ ដោយថាធ្វើស្របតាមច្បាប់ និងថាកុំឲ្យបរទេសជ្រៀតជ្រែកកិច្ចការផ្ទៃក្នុងកម្ពុជា៕