សាលាដំបូងរាជធានីភ្នំពេញសម្រេចផ្តន្ទាទោសឲ្យបុរស អឿត អាង ហៅ ជួប សំលាប់ ជាប់ពន្ធនាគារ អស់មួយជីវិត ដោយចោទថាបានបាញ់សម្លាប់លោក កែម ឡី កាលពីឆ្នាំ២០១៦។
លោកចៅក្រម លាង សំណាត់ បានប្រកាសសាលក្រម ដោយបានចោទប្រកាន់ថា ឈ្មោះ អឿត អាង បានបាញ់សម្លាប់លោក កែម ឡី ពីបទឃាតកម្មគិតទុកជាមុន និងបទកាន់កាប់ ឬដឹកជញ្ជូនអាវុធដោយគ្មានការអនុញ្ញាត ដោយយោងតាមមាត្រា២០០ និងមាត្រា៤៩០នៃក្រមព្រហ្មទណ្ឌ ដោយដាក់ពន្ធនាគារមួយជីវិត។
បន្ទាប់ពីប្រកាសសាលក្រមភ្លាម ចៅក្រមបានបញ្ជាឲ្យឆ្មំាពន្ធនាគារនាំ លោក ជួប សំលាប់ ផ្តិតមេដៃលើសាលក្រមនោះ រួចឲ្យបញ្ជូនទៅពន្ធនាគារវិញ។ ខណៈនោះ លោក ជួប សំលាប់ បានបង្ហាញទឹកមុខធម្មតា ហាក់ដូចជាពុំមានការភ្ញាក់ផ្អើលទេ ក្រោយពីចៅក្រមប្រកាសផ្តន្ទាទោសដាក់គុកមួយជីវិតនោះ។
លោកចៅក្រម ឲ្យដឹងទៀតថា ជួប សំលាប់ មានសិទ្ធិប្តឹងទៅសាលាឧទ្ធរណ៍តាមនីតិវិធីដោយមិនឲ្យផុតរយៈពេលមួយខែ គិតចាប់ពីថ្ងៃប្រកាសសាលក្រមនេះ។
ទោះជាបែបនេះក្តី លោក យុង ផានិត មេធាវីការពារក្តីឲ្យលោក ជូប សំលាប់ បានថ្លែងប្រាប់អ្នកសារព័ត៌មាននៅមុខតុលាការថា នេះជារឿងអយុត្តិធម៌ចំពោះកូនក្តីរបស់លោក ហើយលោកថា នឹងពិភាក្សាជាមួយកូនក្តី ដើម្បីប្តឹងទៅឧទ្ធរណ៍ សុំឲ្យបន្ធូរបន្ថយទោសដល់កូនក្តីរបស់លោក។
លោកនិយាយថា «គួរឲ្យសោកស្តាយព្រោះថាអត់មានស្ថានសំរាលចំពោះកូនក្តីខ្ញុំ បើយើងពិនិត្យទៅតាមច្បាប់នីតិវិធី ត្រូវតែមានស្ថានសំរាលទោសខ្លះ ទាក់ទងនិងបញ្ហាបទល្មើសផ្សេងៗ ទោះបីគាត់ល្មើសនឹងទំហំប៉ុន្មានក៏ដោយ ព្រោះយើងឃើញថា អ្វីដែលគាត់បានប្រព្រឹត្តដូចខ្ញុំបានលើកក្នុងសវនាការ គឺវាមានមូលហេតុច្រើនទាក់ទងទៅនឹងកត្តាបុគ្គលរបស់គាត់។ [អ្នកសារព័ត៌មានសួរ លោកមេធាវីនឹងប្តឹងឧទ្ធរណ៍ទេ?] រង់ចំាពិភាក្សាជាមួយកូនក្តីថាតើគាត់សម្រេចចិត្តយ៉ាងណាចំពោះបញ្ហានេះ»។
លោក យុង ផានិត បានបញ្ជាក់ថា តុលាការយកសំណុំរឿងកូនក្តីរបស់លោក ទៅបំបែកជាពីរ ដោយថា សំណុំរឿងទី១ គឺយកដែលជនដែលត្រូវបានចាប់ខ្លួនទៅកាត់ទោសមុន និងសំណុំរឿងមួយទៀតទុកស៊ើបអង្កេតរកជនដែលពាក់ព័ន្ធ។ លោកថាអ្នកដែលតុលាការមិនទាន់កាត់ទោស និងកំពុងស៊ើបអង្កេតនោះ រួមមាន ឈ្មោះ ប៉ូលី ដែលនាំឲ្យលោក ជួប សំលាប់ ស្គាល់លោក កែម ឡី និងម្នាក់ទៀតឈ្មោះ ចក់ ដែលលក់កំាភ្លើងឲ្យ ជួប សំលាប់។
ករណីនេះ លោក យុង ផានិត បញ្ជាក់ថា តាមនីតិវិធីតុលាការត្រូវធ្វើការស៊ើបអង្កេតនិងចាប់អ្នកពាក់ព័ន្ធយកទៅផ្តន្ទាទោសដូចអ្នកប្រព្រឹត្តផ្ទាល់ដែរ។
លោក កែម ឡី អ្នកវិភាគបញ្ហាសង្គមដ៏ល្បី ត្រូវបានខ្មាន់កាំភ្លើងបាញ់សម្លាប់នៅស្ដារម៉ាត ក្បែរស្ដុបបូកគោ រាជធានីភ្នំពេញ កាលពីថ្ងៃទី១០ ខែកក្កដា ឆ្នាំ២០១៦។ ក្រោយហេតុការណ៍ អាជ្ញាធរបានចាប់ខ្លួនបុរសតែម្នាក់ឈ្មោះ «អឿត អាង» ហៅ «ជួប សំលាប់» ។
មកដល់ពេលនេះមានរយៈពេលជិត១ឆ្នាំហើយសមត្ថកិច្ចនៅមិនវែកមុខ អ្នកនៅពីក្រោយឃាតកម្មនោះ មកដាក់ទោសនៅឡើយ ខណៈតុលាការបង្ហាញកាមេរ៉ាសុវត្ថិភាពនៅពេលជំនុំជម្រះក្តី ធ្វើឲ្យអ្នកលេងហ្វេសប៊ុកប្រតិកម្មថា ក្នុងវីដេអូ និងរូបភាពដែលតុលាការបង្ហាញនោះ ស្បែកជើងរបស់លោក ជួប សំលាប់ មានភាពខុសគ្នា នៅពេលធ្វើសកម្មភាពចូលបាញ់សម្លាប់លោក កែម ឡី ក្នុងស្តាម៉ាត និងរូបភាពសមត្ថកិច្ចចាប់បាន។
ទោះជាយ៉ាងណាក៏ដោយ ជាញឹកញាប់ ជួប សំលាប់ តែងបានបញ្ជាក់ថា ខ្លួនជាអ្នកសម្លាប់លោក កែម ឡី ហើយមិនមានអ្នកណាបញ្ជាឬនៅពីក្រោយនោះទេ៕