ពលរដ្ឋជាច្រើនដែលស្គាល់លោកបណ្ឌិត កែម ឡី បើទោះបីជាពួកគេថាធ្លាប់ជួបផ្ទាល់ឬធ្លាប់ឮតែសំឡេងរបស់លោកក្តី នៅតែបង្ហាញក្តីអាលះអាល័យទៅលើការបាត់បង់លោក ហើយកាន់តែមិនអស់ចិត្តទៀតនៅពេលឃាតកម្ម ដែលមើលទៅហាក់មានការរៀបចំទុកនេះ ត្រូវបានតុលាការរាជធានីភ្នំពេញកាត់ទោសបុរសឈ្មោះ អឿត អាង ហៅ ជួប សំលាប់ តែម្នាក់គត់។
អ្នកវិភាគបញ្ហាសង្គមដ៏ល្បីឈ្មោះម្នាក់ គឺលោកបណ្ឌិត កែម ឡី ត្រូវបានខ្មាន់កាំភ្លើងបាញ់សម្លាប់ទាំងព្រឹក កណ្តាលទីក្រុងភ្នំពេញ ដែលពោរពេញដោយភាពស៊ីវិល័យ នាថ្ងៃអាទិត្យទី១០កក្កដាឆ្នាំ២០១៦ ហើយភ្លាមៗនោះ គឺមានឃាតករតែម្នាក់ប៉ុណ្ណោះ ដែលត្រូវបានសមត្ថកិច្ចឃាត់ខ្លួននិងចោទប្រកាន់ដោយតុលាការ។ អឿត អាង ហៅ ជួប សំលាប់ គឺជាមនុស្សតែម្នាក់គត់ ដែលសារភាពថា ខ្លួនគឺជាអ្នកបាញ់លោក កែម ឡី ដោយផ្ទាល់ និងត្រូវបានតុលាការរាជធានីភ្នំពេញសម្រេចនៅថ្ងៃនេះដោយឲ្យជាប់ពន្ធនាគារមួយជីវិត ពីបទឃាតកម្មគិតទុកជាមុន និងបទកាន់កាប់ ឬដឹកជញ្ជូនអាវុធដោយគ្មានការអនុញ្ញាត ដោយយោងតាមមាត្រា២០០ និងមាត្រា៤៩០នៃក្រមព្រហ្មទណ្ឌ។
ក្រោយពីប្រកាសសាលក្រមរួចពលរដ្ឋជាច្រើននាក់ដែលស្គាល់លោក កែម ឡី មួយចំនួនបង្ហាញអារម្មណ៍អស់សង្ឃឹមចំពោះយុត្តិធម៌សម្រាប់លោក កែម ឡី ហើយពួកគេថា មិនអាចទទួលយកការសម្រេចនេះបានទេ។ មិនអាចទទួលយកបាន ក៏ព្រោះពួកគេលើកឡើងថា គ្រប់ភស្ភុតាងនិងសាក្សីហាក់ទំនងត្រូវបានតុលាការនិងអាជ្ញាធរពាក់ព័ន្ធលាក់បាំងពីមហាជន។
តំណាងពលរដ្ឋបុរីកីឡា ដែលបានមកតាមដានការកាត់ទោសនេះ អ្នកស្រី ស ស៊ន បានថ្លែងមិនពេញចិត្តទៅនឹងការសម្រេចនេះដោយថា ជាការសម្រេចដោយគ្មានភាពយុត្តិធម៌សម្រាប់អ្នកស្លាប់ ព្រោះទាំងភស្ភុតាង និងសាក្សីមិនត្រូវបានបង្ហាញជាក់លាក់ សូម្បីតែកាមេរ៉ាសុវត្ថិភាពនៅក្នុងស្តារម៉ាតកាល់តិច ក៏មិនត្រូវបានតុលាការបញ្ចេញទាំងស្រុងនោះឡើយ។
អ្នកស្រីនិយាយថា ៖ «មីងមិនជឿរថាជួបសម្លាប់ហ្នឹងជាអ្នកសម្លាប់ទេព្រោះជួបសម្លាប់ហ្នឹងមិនសាកសមទៅនឹងការសម្លាប់លោកបណ្ឌិតកែមឡីហ្នឹងទេមិនសាកសមទេមីងអត់ទទួលយកបានទេទោះបីពីរជិវិតលោកជួបសម្លាប់ ក៏អត់អាចទទួលយកបានដែរព្រោះអីវាអយុត្តិធម៌ណាស់សម្រាប់អ្នកនិយាយការពិតអ្នកដែលហ៊ានបញ្ចេញមតិគឺវាអយុត្តិធម៌ខ្លាំងណាស់ មីងអត់អាចទទួលយកបានដាច់ខាតគឺអត់អាចទទួលយកបាន! … តុលាការមិនឯករាជ្យសាក្សីមិនគ្រប់គ្រាន់ជួបសម្លាប់មិនដែលនិយាយឲ្យពិតៗទេនិយាយកាឡៃទៅលិចទៅកើតអញ្ចឹងហើយបានខ្ញុំជាប្រជាពលរដ្ឋអត់អាចទទួលយកបានទេ»។
កំពុងឈរផ្អែករ៉ឺម៉កកង់បីនៅមុខពហុកីឡដ្ឋានជាតិអូឡាំពិចបណ្តើរ និងនិយាយជាមួយម្ចាស់រ៉ឺម៉កបណ្តើរពីរឿងឃាតកម្មលើលោក កែម ឡី លោក ឆាយ យី បានឆ្លៀតពេលបន្តិចដើម្បីផ្តល់បទសម្ភាសន៍ជាមួយអ្នកយកព័ត៌មានវីអូឌីថា លោកធ្លាប់ស្តាប់ការវិភាគរបស់លោក កែម ឡី និងបានចូលរួមហែសពលោកទៅខេត្តតាកែវទៀតផង។ ចំពោះការសម្រេចរបស់តុលាការនៅថ្ងៃនេះ លោកថា លោកមិនទាន់អាចទទួលយកបាននោះទេចំពោះការសម្រេចនេះ លោកថា អ្វីដែលធ្វើឲ្យប្រជាជនដូចជារូបលោកនៅមានការសង្ស័យនោះគឺ ទាំងភស្ភុតាង និងសាក្សីនៃសំណុំរឿងឃាតកម្មលើលោក កែម ឡី នេះហាក់ត្រូវបានបានបិទបាំងច្រើនមើលទៅក្នុងន័យការពារអ្វីមួយ។ លោកបន្ថែមថា ជួប សំលាប់ តែឯង ពិតជាមិនអាចធ្វើរឿងនេះបាននោះទេ។
លោក ឆាយ ឃី៖ «ព្រោះ អឿត អាង មើលទៅគាត់មិនដឹកនៅណានោះ ហើយមើលទៅសាច់ឈាមគាត់ទៅដូចជាទុរគតជនអីដែរណាបើយើងមើលទៅក្នុងនាមជាប្រជាពលរដ្ឋគ្រាន់តែយើងសង្ស័យធម្មតាសាច់ឈាមអ្នកមានលុយច្រើនវារាងជ្រះថ្លាដែរណាហើយគាត់អីខ្ញុំមិនមើលងាយខ្មែរយើងទេតែគាត់ មើលទៅរៀងខ្សត់ខ្សោយដែរណាមិនមានលទ្ធភាពអីឲ្យបណ្ឌិត កែម ឡី ខ្ចីលុយពាក់ព័ន្ធរឿងហ្នឹងណា» ។
នៅក្បែរលោក លោក ឆាយ យី គឺជាលោក ម៉ៅ យូរ៉ា ដែលកំពុងនិយាយពីរឿងនេះដែរ ដោយថាលោកមិនទាន់អស់ចិត្តនោះទេ ចំពោះតុលាការលើករណីឃាតកម្មលោក កែម ឡី នេះ។ លោកថាអ្វីដែលលោកមិនអាចទទួលយកបានគឺភស្ភុតាងជាវីដេអូក្នុងស្តាម៉ាតកាល់តិច មិនត្រូវបានគេបញ្ចេញគ្រប់ពីសកម្មភាពនៃឃាតកម្ម ហើយពិសេសទៀតសាក្សីសំខាន់ នៃអំពើរឃាតកម្មនេះ គឺបុគ្គលិកនៅហាងសាំងកាល់តិចមិនមានអ្នកណាមួយហ៊ានចេញមុខធ្វើសាក្សី ឬត្រូវបានតុលាការកោះឲ្យមកសាកសួរនោះទេ។
លោកថា៖ «នេះបើខ្ញុំគិតតាមផ្លូវវច្បាប់នោះ បំណាច់ហ្នឹងគេចាប់ហើយគេកាត់ទោសតាមច្បាប់នោះវាត្រឹមត្រូវតាមច្បាប់មួយផងដែរ។ ប៉ុន្តែធ្វើឲ្យគេអស់ចិត្តគេមិនទាន់អស់ចិត្តទេព្រោះអីដូចបានសម្ភាសន៍គាត់មិញនោះថាអ្វីដែលយើងមិនទាន់ដឹងច្បាស់នោះគឺអត់មានសាក្សីថាតើអ្នកសម្លាប់នោះវាចេញពីប្រភពណាច្បាស់លាស់ ហើយវាបាញ់ហ្នឹងរបៀបម៉េចឃើញដួលឃើញអីយើងបង្ហាញគេដូចសាច់រឿងអញ្ចឹងទៅណាអាហ្នឹងទើបយើងអាចជឿជាក់បានតែយើងច្បិចយកទិដ្ឋភាពតិចៗយកមកអាហ្នឹងយើងពិបាកជឿណាស់»។
ទោះជាយ៉ាងណាកាលពីថ្ងៃទី២មីនា អ្នកនាំពាក្យសាលាដំបូងរាជធានីភ្នំពេញលោក លី សុផាណា បានឆ្លើយទៅនឹងសំណួរអ្នកសារព័ត៌មានតាមរយៈតេឡេក្រាមថា ភស្តុតាងដែលតុលាការបង្ហាញក្នុងអង្គសវនាការនោះ ធ្វើតាមបែបបច្ចេកទេសវិទ្យាសាស្ត្រពិត ក្នុងន័យនេះទំនងជាលោកថាមិនចំាបាចបង្ហាញពីសកម្មភាពឃាតកបាញ់លោក កែម ឡី ផ្ទាល់ផ្សេងទៀតនោះទេ។
លោកសរសេរថា៖ «សវនការបានបង្ហាញឲ្យឃើញរួចហើយនូវសកម្មភាពរបស់ជនជាប់ចោទដែលត្រូវបានថតដោយកាម៉េរ៉ាសុវត្ថិភាពរបស់ស្ថានីយប្រេងកាល់តិច។ ភស្តុតាងនេះបានចាប់យកពីកន្លែងកើតហេតុផ្ទាល់និងមានលក្ខណៈវិទ្យាសាស្រ្តពិត»។
ការប្រកាសសាលក្រមរបស់សាលាដំបូងរាជធានីភ្នំពេញនាព្រឹកថ្ងៃទី២៣មីនានេះ ពុំមានសាច់ញាត្តិណាម្នាក់របស់លោក កែម ឡី ចូលរួមស្តាប់សវនាការនោះទេ។
បើតាមគណីនេយ្យហ្វេសប៊ុកលោក សេង សាន (Sang Sann) ដែលទំនងជាស្និតនឹងភរិយាលោក កែម ឡី ត្រូវបានដកស្រងសម្តីអ្នកស្រី ប៊ូ រចនា ថា «អ្នកស្រីគ្មានជំនឿលើតុលាការកម្ពុជា ក្នុងការរកយុត្តិធម៌ជូនប្តីអ្នកស្រី និងក្រុមគ្រួសារទេ»។
សម្រាប់ពលរដ្ឋ ដែលមិនអស់ចិត្តទៅនឹងការសម្រេចរបស់តុលាការនេះ ពួកគេចង់ឲ្យតុលាការស្វែងរកភស្ភុតាងបន្ថែម ជាពិសេសសាក្សីដែលនៅក្នុងស្តាម៉ាតកាល់តិចនៅថ្ងៃដែលលោក កែម ឡី ត្រូវបានបាញ់សម្លាប់នោះមកសាកសួរដើម្បីស្វែងរកការពិតនៃរឿងនេះ និងអ្នកនៅពីក្រោយពិតប្រកដមកផ្តន្ទាទោសតាមច្បាប់។
លោក យូរ៉ា៖ «វីដេអូហ្នឹងឃើញតែជ្រុងខ្លះដូចថាឃើញរត់ឃើញអីអញ្ចឹងណា! វាប្រៀបដូចជាសាច់រឿងអញ្ចឹងដែលលេងតែមួយកំណាត់ ឬក៏យកតែមួយឈុតៗយកមកដាក់អញ្ចឹងវាអត់ដឹងសាច់រឿងណា។ ដូចពេលរត់ថតអារត់អញ្ចឹងទៅណាតែអាពេលបាញ់កាន់កាំភ្លើងវាអត់ឃើញ»។
លោក ឆាយ ឃី៖ «បាទ! ត្រូវការសាក្សីសួរនាំបន្ថែមទៀតដើម្បីឲ្យដឹងរឿង ក៏ប៉ុន្តែតាមដែរខ្ញុំធ្លាប់ឭកន្លងមកដូចដែលរឿងពាក់ព័ន្ធនឹងនយោបាយប្រជាពលរដ្ឋយើងមិនសូវហ៊ានទេខ្លាច! រដ្ឋាភិបាលយើងធ្វើបាបផ្លូវកាយផ្លូវចិត្តអីទៅណាកន្លងមកប្អូនដឹងស្រាប់ហើយនយោបាយស្រុកយើងមិនបានទេ»។
ក្រោយប្រកាសសាលក្រមករណីឃាតកម្មលោក កែម ឡី នៅថ្ងៃនេះដែរ សមាគមនិងអង្គការប្រមាណជាង៦០ បានចេញសេចក្តីថ្លែងការណ៍រួមមួយ ដោយទាមទារឲ្យមានការស៊ើបអង្កេតឯករាជ្យឡើងវិញលើករណីលោក កែម ឡី។
ក្នុងសេចក្តីថ្លែងការរួមនោះ ពួកគេបានលើកឡើងថា៖ «ថ្វីបើមានភស្ភុតាងគួរឲ្យជឿជាក់ថា អឿត អាង គឺជាខ្មាន់កាំភ្លើង ដែលបានបាញ់និងសម្លាប់លោក កែម ឡី យ៉ាងណាក្តី កង្វះតម្លាភាពក្នុងការស៊ើបអង្គេតលើការស្លាប់របស់លោក កែម ឡី នីតិវិធីជំនុំជម្រះខ្លីពេក និងការខកខានក្នុងការស៊ើបអង្កេតឲ្យបានពេញលេញជុំវិញមូលហេតុ អ្នកសមគំនិត និងស្ថានភាពនៃការចាប់ខ្លួន អឿត អាង ដែលជាបញ្ហាទាំងអស់នេះ ជាក្តីបារម្ភជាខ្លាំងអំពីភាពពេញលេញនៃដំណើរការព្រហ្មទណ្ឌលើករណីមួយនេះ។ ដោយសារតែការស៊ើបអង្កេតមិនគ្រប់គ្រាន់ជុំវិញឃាតកម្មលោក កែម ឡី ក៏ដូចជានីតិវិធីសវនាការជំនុំជម្រះ យើងខ្ញុំជាអង្គការសង្គមស៊ីវិលដែលមានរាយនាមខាងក្រោម សូមអំពាវនាវឲ្យបង្កើតគណៈកម្មាការស៊ើបអង្កេតឯករាជ្យមួយក្នុងការស៊ើបអង្កេតពីស្ថានភាពទាំងមូលនៃឃាតកម្មនេះ ដើម្បីឲ្យស្របតាមការអនុវត្តល្អបំផុតជាអន្តរជាតិ»។
ទោះជាយ៉ាងណានៅព្រឹកមិញនេះ មេធាវីការពារក្តីឲ្យជួប សំលាប់ លោក យុង ផានិត បានបញ្ជាក់ថា តុលាការសម្រេចយកសំណុំរឿងកូនក្តីរបស់លោក ទៅបំបែកជាពីរដោយថា សំណុំរឿងទី១ គឺយកដែលជនដែលត្រូវបានចាប់ខ្លួនទៅកាត់ទោសមុន និងសំណុំរឿងមួយទៀតទុកស៊ើបអង្កេតរកជនដែលពាក់ព័ន្ធ។ លោកថាអ្នកដែលតុលាការមិនទាន់កាត់ទោស និងកំពុងស៊ើបអង្កេតនោះ រួមមាន ឈ្មោះ ប៉ូលី ដែលនាំឲ្យលោក ជួប សំលាប់ ឲ្យស្គាល់លោក កែម ឡី និងម្នាក់ទៀតឈ្មោះ ចក់ ដែលលក់កំាភ្លើងឲ្យ ជួប សំលាប់៕