មន្ត្រីជាន់ខ្ពស់ក្រសួងការពារជាតិ បានប្រកាសថា កាលពីម្សិលមិញនេះ មានករណីបំផ្លោងគ្រាប់ចូលស្នាក់ការកងកម្លាំងរក្សាសន្តិភាពរបស់កម្ពុជា ២ខ្នង ចំនួន ៣ គ្រាប់ ស្ថិតនៅតំបន់ Kidal ប្រទេសម៉ាលី បណ្តាលឲ្យមានការខូចខាតទ្រព្យសម្បត្តិមួយចំនួន។
បើតាមលោក ឈុំ សុជាតិអ្នកនាំពាក្យក្រសួងការពារជាតិលើកឡើងលើហ្វេសប៊ុករបស់លោកថា ព្រឹត្តិការណ៍នេះ បានកើតឡើងវេលាម៉ោង៦:៥៥នាទីព្រឹក ម៉ោងនៅម៉ាលីដែលត្រូវនឹងម៉ោង១:៥៥នាទីរសៀលម៉ោងនៅកម្ពុជា ហើយក្នុងហេតុការណ៍នេះ លោកថា មិនបង្កឲ្យកងកម្លាំងវិស្វកម្មព្រលានយន្តហោះលេខ១៨៩ របស់កម្ពុជាដែលបំពេញការងារនៅតំបន់នេះ រងរបួសនោះទេ។
បើតាម លោក ឈុំ សុជាតិ ឲ្យដឹងទៀតថា រហូតដល់ពេលនេះ កម្លាំងកំពុងស្រាវជ្រាវកំណត់រកអត្តសញ្ញាណនៃការវាយប្រហារនោះ។