នាយិកាមជ្ឈមណ្ឌលសិទ្ធិកម្ពុជា អ្នកស្រី ចក់ សុភាព បានជំរុញទៅអាជ្ញាធរឲ្យស៊ើបអង្កេតឲ្យបានពេញលេញ និងដោយគ្មានការរើសអើង ទៅលើការចោទប្រកាន់ថា នាយករងវិទ្យុអាស៊ីសេរីផ្សាយជាភាសាខ្មែរ លោក ជុន ច័ន្ទបុត្រ បានបន្លំខ្លួនចូលក្នុងពន្ធនាគារ។
កាលពីថ្ងៃទី១៩ ខែមេសា លោក ហួត ឃីនវុទ្ធី ហៅ ជុន ច័ន្ទបុត្រ ត្រូវបានគេឃើញមានវត្តមានជាមួយតំណាងរាស្ត្រ ២រូបរបស់គណបក្សសង្គ្រោះជាតិ នៅពេលពួកគេចូលទៅសួរសុខទុក្ខសកម្មជនបក្សប្រឆាំងដែលកំពុងជាប់ឃុំនៅពន្ធនាគារព្រៃស។
វត្តមានលោក ជុន ច័ន្ទបុត្រ ត្រូវបានក្រុមអ្នកគាំទ្របក្សកាន់អំណាចចាត់ទុកជាការបន្លំខ្លួន និងភូតកុហកសមត្ថកិច្ច ក្រោយពីនាយករងវិទ្យុអាស៊ីសេរីរូបនេះ ត្រូវបានគេចុះបញ្ជីដាក់ថាជាជំនួយការរបស់តំណាងរាស្ត្របក្សប្រឆាំង។
ប៉ុន្តែ ការចោទប្រកាន់នេះ ត្រូវបានលោក ជុន ច័ន្ទបុត្រ ច្រានចោល ដោយអះអាងថា លោកមិនបានបន្លំខ្លួននោះឡើយ ហើយលោកបានបង្ហាញអត្តសញ្ញាណពិតប្រាកដទៅសមត្ថកិច្ចទៀតផង។
មួយថ្ងៃក្រោយពីអ្នកនាំពាក្យក្រសួងមហាផ្ទៃ លោក ខៀវ សុភ័គ បញ្ជាក់ថា លោក ជុន ច័ន្ទបុត្រ អាចជាប់ពន្ធនារគារ ប្រសិនបើត្រូវបានរកឃើញកំហុសនោះ ព្រះរាជអាជ្ញារងសាលាដំបូងរាជធានីភ្នំពេញ លោក សៀង សុខ បានកោះហៅលោក ជុន ច័ន្ទបុត្រ ឲ្យចូលបំភ្លឺនៅដើមខែឧសភាខាងមុខនេះ។
អ្នកស្រី ចក់ សុភាព បានលើកឡើងនៅលើហ្វេសប៊ុករបស់អ្នកស្រីថា ការកោះហៅអ្នកសារព័ត៌មានវិទ្យុអាស៊ីសេរីនេះ គឺជាក្ដីបារម្ភដ៏សំខាន់ ហើយសេរីភាពនៃការបញ្ចេញមតិ ត្រូវតែទទួលបានការការពារ។
អ្នកស្រីបានជំរុញឲ្យមានការស៊ើបអង្កេតឲ្យបានពេញលេញ ដោយគ្មានការរើសអើង ដែលឈរលើហេតុផលថា លោក ជុន ច័ន្ទបុត្រ បម្រើការនៅវិទ្យុអាស៊ីសេរី ដែលតែងតែរិះគន់មន្ត្រីរដ្ឋាភិបាលនោះឡើយ។
អ្នកការពារសិទ្ធិមនុស្សរូបនេះ ក៏បានជំរុញទៅអាជ្ញាធរកម្ពុជា ឲ្យបើកទូលាយពន្ធនាគារសម្រាប់អ្នកសរព័ត៌មាន និងសង្គមស៊ីវិល ដើម្បីឲ្យសាធារណជនបានឃើញពីស្ថានភាពដ៏អាក្រក់ ដែលអ្នកទោស អ្នកជាប់ឃុំ ក្នុងនោះមានទាំងអ្នកការពារសិទ្ធិមនុស្សផងដែរ កំពុងប្រឈម៕
