អនុប្រធានាធិបតីអាមេរិក Mike Pence បាននិយាយកាលពីថ្ងៃម្សិលមិញថា ការរំសាយកម្មវិធីនុយក្លេអ៊ែររបស់កូរ៉េខាងជើង នៅតែអាចសម្រេចទៅបានដោយសន្តិវិធី ដោយសារតែការចូលរួមរបស់ក្រុងវ៉ាស៊ីងតោននាពេលថ្មីៗនេះជាមួយប្រទេសចិន បើទោះបីជាមានក្ដីបារម្ភយ៉ាងខ្លាំងថា កូរ៉េខាងជើងអាចនឹងសាកល្បងគ្រាប់បែកនុយក្លេអ៊ែរជាថ្មីម្ដងទៀតនាពេលឆាប់ៗនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
បើតាម Reuters កូរ៉េខាងត្បូងកំពុងស្ថិតក្នុងស្ថានភាពប្រុងជើងការខ្ពស់ នៅចំពេលដែលរដ្ឋឯកោក្រីក្រកូរ៉េខាងជើងប្រុងរៀបចំរំលឹកខួបសំខាន់មួយទៀត ដែលអាចមានការសាកល្បងគ្រាប់បែកនុយក្លេអ៊ែរ ឬការបាញ់គ្រាប់មីស៊ីល។
លោក Pence បានលើកឡើងថា លោកជឿជាក់យ៉ាងពិតប្រាកដថា នៅមានឱកាសដែលសម្ព័ន្ធមិត្តនៅក្នុងតំបន់ រួមទាំងប្រទេសចិន អាចសម្រេចនូវគោលដៅជាប្រវត្តិសាស្ត្រ ក្នុងការរំសាយកម្មវិធីនុយក្លេអ៊ែរនៅលើឧបទ្វីបកូរ៉េតាមបែបសន្តិវិធី។
ភាពតានតឹងបានកើនឡើងយ៉ាងស្រួចស្រាលនៅប៉ុន្មានខែថ្មីៗនេះ ក្រោយពីក្រុងព្យុងយ៉ាងបានសាកល្បងគ្រាប់បែកនុយក្លេអ៊ែរ ២លើក កាលពីឆ្នាំមុន និងបានបាញ់គ្រាប់មីស៊ីលជាច្រើនលើក រំលោភទៅនឹងទណ្ឌកម្មអន្តរជាតិ៕
