អ្នកជំនាញកសិកម្មកម្ពុជា បានលើកឡើងថា តម្លៃម្រេចកម្ពុជាអាចបន្តធ្លាក់ថ្លៃបន្ថែមទៀត ក្រោយពីសហភាពអឺរ៉ុបរឹតបន្តឹងលើការនាំចូលម្រេចផ្ទុកទៅដោយសារធាតុគីមីពុលខ្ពស់ពីប្រទេសវៀតណាម។
លោកបណ្ឌិត យ៉ង់ សាំងកុមារ អតីតប្រធានអង្គការកសិកម្មសេដាក បានលើកឡើងនៅលើទំព័រហ្វេសប៊ុករបស់លោកនៅថ្ងៃនេះថា តម្លៃម្រេចកំពុងធ្លាក់ចុះ ហើយអាចនឹងបន្តធ្លាក់ចុះទៀត ដោយសារតែសហភាពអឺរ៉ុបកំពុងរឹតបន្តឹងតាមរយៈការទម្លាក់អត្រាជាតិពុលមេតាឡាស៊ីល (metalaxyl) ពី ០.១ppm មកនៅត្រឹម ០.០៥ppm។
អ្នកជំនាញកសិកម្មរូបនេះ បានអះអាងថា វិធានការថ្មីនេះ នឹងប៉ះពាល់ទៅដល់វិស័យម្រេចរបស់ប្រទេសវៀតណាម ប៉ុន្តែ ក៏ប៉ះពាល់ដល់ម្រេចរបស់កម្ពុជាផងដែរ ដោយលោកថា នោះក៏ព្រោះតែវៀតណាមបានទិញម្រេចពីប្រទេសកម្ពុជាសម្រាប់នាំចេញទៅអឺរ៉ុបផងដែរ។
បើតាមលោក យ៉ង់ សាំងកុមារ វៀតណាមបាននាំចេញម្រេច ៤ម៉ឺនតោនក្នុងមួយឆ្នាំៗ ទៅផ្គត់ផ្គង់ទីផ្សារអឺរ៉ុប ប៉ុន្តែ ម្រេចនាំចេញពីប្រទេសវៀតណាម ត្រូវបានគេរកឃើញថា មានផ្ទុកសារធាតុគីមីពុលមេតាឡាស៊ីលលើសពីច្បាប់កំណត់។
វិធានការថ្មីនេះ បានកើតឡើងតែប៉ុន្មានខ្មែរក្រោយពីសហភាពអឺរ៉ុបក៏បានរឹតបន្តឹងលើការនាំចូលអង្ករផ្ទុកទៅដោយសារធាតុគីមីទ្រីស៊ីក្លាហ្សូលខ្ពស់ផងដែរ៕