អនុប្រធានាធិបតីអាមេរិក លោក Mike Pence បានថ្លែងកាលពីថ្ងៃម្សិលមិញថា នាវាដឹកយន្តចម្បាំងដ៏ធំរបស់អាមេរិកឈ្មោះ Carl Vinson នឹងធ្វើដំណើរទៅដល់សមុទ្រជប៉ុននៅប៉ុន្មានថ្ងៃទៀតនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
AFP បានផ្សាយបន្តថា លោក Pence បានលើកឡើងបែបនេះប៉ុន្មានថ្ងៃក្រោយពីមានចោទសួរថា តើនាវាផ្ទុកយន្តហោះដ៏ធំមួយនេះ ស្ថិតនៅកន្លែងណា ចាប់តាំងពីវាត្រូវបានគេប្រកាសថា ធ្វើដំណើរទៅជិតឧបទ្វីបកូរ៉េកាលពីសប្ដាហ៍មុន ចំពេលមានក្ដីបារម្ភអំពីការសាកល្បងគ្រាប់បែកនុយក្លេអ៊ែរ និងការបាញ់គ្រាប់មីស៊ីលពីសំណាក់កូរ៉េខាងជើង។
ប៉ុន្តែ កងទ័ពជើងទឹកអាមេរិក ដែលបាននិយាយកាលពីដំបូងថា នាវាដឹកយន្តហោះនេះនឹងចេញពីដែនទឹកសិង្ហបុរីនោះ បានសារភាពកាលពីថ្ងៃអង្គារកន្លងមកនេះថា នាវានោះ ការពិត ត្រូវបានគេបញ្ជូនពីសិង្ហបុរី ទៅកាន់អូស្ត្រាលី ដើម្បីចូលរួមសមយុទ្ធយោធាជាមួយកងទ័ពជើងទឹកអូស្ត្រាលី។
ជាការបកស្រាយនឹងមន្ទិលសង្ស័យនេះ លោក Pence ដែលកំពុងស្ថិតនៅទីក្រុងស៊ីដនី បានបញ្ជាក់ថា នាវានោះ នឹងធ្វើដំណើរទៅដល់តែប៉ុន្មានថ្ងៃទៀតប៉ុណ្ណោះ។ ទាំងប្រធានាធិបតីអាមេរិក ដូណាល់ ត្រាំ និងប្រមុខយោធាអាមេរិក លោក Jim Mattis សុទ្ធតែអះអាងថា នាវា Carl Vinson ស្ថិតលើផ្លូវឆ្ពោះទៅឧបទ្វីបកូរ៉េ៕
