យ៉ាងហោចណាស់មនុស្ស ៥៧នាក់ ត្រូវបានសម្លាប់នៅក្នុងការបំផ្ទុះគ្រាប់បែកពីសំណាក់សមាជិកចលនាភេរវកម្មរដ្ឋឥស្លាម ក្នុងនោះមានទាំងស្ត្រី និងកុមារផងដែរ ខណៈដែលមនុស្ស ១១៩នាក់ទៀត បានរងរបួសនៅខាងក្រៅមណ្ឌលចុះឈ្មោះបោះឆ្នោតមួយនៅរដ្ឋធានីកាប៊ុល កាលពីថ្ងៃម្សិលមិញនេះ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
បើតាម AFP ការវាយប្រហារនោះ បានបង្កក្ដីបារម្ភកាន់តែខ្លាំងអំពីបញ្ហាសន្តិសុខនៅមុនការបោះឆ្នោតជ្រើសរើសតំណាងរាស្ត្រនៅថ្ងៃទី២០ ខែតុលាខាងមុខ ដែលត្រូវបានគេចាត់ទុកជាការសាកល្បងមួយនៅមុនការបោះឆ្នោតប្រធានាធិបតីនៅឆ្នាំក្រោយ។
AFP បានរាយការណ៍បន្តថា ជនរងគ្រោះជាច្រើន ត្រូវបានគេនាំយកទៅកាន់មន្ទីរពេទ្យមួយនៅរដ្ឋធានីកាប៊ុល ជាទីដែលសាច់ញាតិរបស់ពួកគេបានស្រែករិះគន់រដ្ឋាភិបាលអាហ្វហ្កានីស្ថាន ចំពោះបរាជ័យក្នុងការការពារសាច់ញាតិរបស់ពួកគេ។
AFP បានផ្សាយបន្តថា ក្រសួងមហាផ្ទៃអាហ្វហ្កានីស្ថាន បានប្រកាសកាលពីដំបូងថា មនុស្ស ៤៨នាក់ ត្រូវបានសម្លាប់នៅក្នុងការវាយប្រហារនោះ ប៉ុន្តែ ក្រសួងសុខាភិបាលបានចេញតួលេខអ្នកស្លាប់ចុងក្រោយដល់ទៅ ៥៧នាក់៕
