តំណាងប្រជាពលរដ្ឋមានជម្លោះដីធ្លីនៅក្នុងខេត្តបន្ទាយមានជ័យ បានឲ្យដឹងថា អ្នកភូមិជាង ៧០នាក់ បានប្រមូលផ្ដុំគ្នានៅមុខសាលាខេត្តនេះ នៅព្រឹកថ្ងៃនេះ ដើម្បីស្នើទៅអាជ្ញាធរខេត្តនេះ ឲ្យជួយដោះស្រាយវិវាទដីធ្លីរបស់ពួកគេ ដែលបានអូសបន្លាយពេលជាង ១០ឆ្នាំមកហើយ។
អ្នកស្រី ឡុង សុគន្ធី ជាពលរដ្ឋម្នាក់ដែលមានជម្លោះដីធ្លីមកពីភូមិថ្នល់បត់ ឃុំអូរបីជាន់ ស្ថិតក្នុងស្រុកអូរជ្រៅ បានប្រាប់វីអូឌីតាមទូរស័ព្ទថា ប្រជាពលរដ្ឋជាង ៧០នាក់ តំណាងឲ្យអ្នកភូមិ ៣១០គ្រួសារ បានស្វែងរកដំណោះស្រាយពីអាជ្ញាធរខេត្តនេះ ជុំវិញជម្លោះដីធ្លីរបស់អ្នកភូមិទំហំ ២០៧៦ហិកតា។
អ្នកស្រីបន្ថែមថា ជម្លោះដីធ្លីនេះបានកើតឡើងតាំងពីឆ្នាំ២០០៤ ដោយមានពាក់ព័ន្ធនឹងក្រុមហ៊ុន ឃួន វណ្ណា អភិវឌ្ឍន៍ បន្ទាប់មកពាក់ព័ន្ធនឹងឧកញ៉ា សំ ផាន់ណារិទ្ធ នៅក្នុងឆ្នាំ២០០៨។
អ្នកស្រីបញ្ជាក់ថា ពលរដ្ឋស្នើទៅអាជ្ញាធរខេត្តនេះ ឲ្យលុបប័ណ្ណកម្មសិទ្ធិនានា ដែលអ្នកស្រីថា ប៉ះពាល់ដល់ដីធ្លីរបស់ពលរដ្ឋដែលបានអាស្រ័យផលជាច្រើនឆ្នាំមកហើយ។
តំណាងអ្នកភូមិមានជម្លោះដីធ្លីរូបនេះ ប្រាប់ថា អភិបាលរងខេត្តបន្ទាយមានជ័យ លោក អ៊ុំ រាត្រី បានសន្យាចុះទៅដោះស្រាយវិវាទនេះ នៅថ្ងៃទី០៩ ខែមិថុនា ពោលគឺក្រោយការបោះឆ្នោតក្រុមប្រឹក្សាឃុំសង្កាត់ចប់រួចរាល់៕