រដ្ឋាភិបាលបញ្ជាក់ថានឹងមិនមានការពង្រីកអាកាសយាន្តដ្ឋានអន្តរជាតិភ្នំពេញបន្ថែមទៀតទេ ខណៈដែលប្រជាពលរដ្ឋនៅជុំវិញតំបន់នោះបានតវ៉ាជាបន្តបន្ទាប់ដោយបារម្ភពីផលប៉ះពាល់នៃគម្រោងនោះ។
ក្នុងលិខិតរបស់ទីស្តីការគណៈរដ្ឋមន្រ្តីកាលពីថ្ងៃទី១៥ ខែមិថុនា លោក តឹករ៉េត សំរេច ជារដ្ឋលេខាធិការបានបញ្ជាក់ថា “រក្សាតំបន់សុវត្ថិភាពនៅចុងផ្លូវរត់ទាំងសងខាង (ទិស០៥និងទិស២៣) និងតំបន់សន្តិសុខជុំវិញបរិវេណអាកាសយានដ្ឋានអន្តរជាតិភ្នំពេញឱ្យនៅដដែលសិន”។ លិខិតដដែលបន្តថាការកែសម្រួលសំណង់អាគារឬផ្ទះដែលមានស្រាប់ឬសុំសាងសង់ថ្មី ត្រូវរក្សាតាមការកំណត់ពីមុនមក។
បើតាមមន្ត្រីអាជ្ញាធរនៅទីនោះប្រជាពលរដ្ឋជាង៥០០គ្រួសារកំពុងរស់នៅជុំវិញអាកាសយាន្តដ្ឋានអន្តរជាតិភ្នំពេញ។
កាលពីអំឡុងឆ្នាំ២០១២ ពេលដែលប្រធានាធិបតីអាមេរិកលោក អូបាម៉ា មកកម្ពុជា ប្រជាពលរដ្ឋបានតវ៉ាជាបន្តបន្ទាប់ ដោយថាមានលិខិតជូនដំណឹងមួយរបស់ក្រសួងមហាផ្ទៃនិងលិខិតរបស់អាជ្ញាធរមូលដ្ឋានបន្ថែមទៀតឱ្យពួកគេរុះរើលំនៅឋានចេញពីតំបន់នោះក្រោមហេតុផលពង្រីកអាកាសយានដ្ឋាន៕