ក្រសួងការបរទេសបានឲ្យដឹងថាលោក ថងលូន ស៊ីសូលីត (Thongloun SIOULITH) នាយករដ្ឋមន្ដ្រីឡាវនឹងអញ្ជើញមកបំពេញទស្សនកិច្ចនៅកម្ពុជាពីរថ្ងៃនៅសប្ដាហ៍ក្រោយតាមការអញ្ជើញរបស់លោកនាយករដ្ឋមន្ដ្រីហ៊ុន សែន។
សេចក្ដីប្រកាសព័ត៌មានរបស់ក្រសួងការបរទេសចុះថ្ងៃទី២៣ ខែមិថុនា បានឲ្យដឹងថានៅក្នុងដំណើរទស្សនកិច្ចនេះលោក ថងលូន ស៊ីសូលីត នឹងមកបំពេញទស្សនកិច្ចជាផ្លូវការនៅកម្ពុជាចាប់ពីថ្ងៃ២៧ដល់ថ្ងៃទី២៨ ខែមិថុនា ដើម្បីពង្រឹងនិងពង្រីកបន្ថែមទៀតនូវទំនាក់ទំនងមិត្ដភាពនិងកិច្ចសហប្រតិបត្ដិការរវាងប្រទេសទាំងពីរ។
សេចក្ដីប្រកាសបានបន្ដថា លោក ថងលូន ស៊ីសូលីត នឹងចូលបង្គំគាល់ព្រះមហាក្សត្រកម្ពុជាព្រះករុណាព្រះបាទសម្ដេច ព្រះបរមនាថ នរោត្ដម សីហមុនី នៅព្រះបរមរាជវាំង។ ក្នុងសេចក្ដីប្រកាសដដែលបានឲ្យដឹងទៀតថាលោក ថងលូន ស៊ីសូលីត នឹងជួបសម្ដែងការគួរសមជាមួយលោក សាយ ឈុំ ប្រធានព្រឹទ្ធសភា លោក ហេង សំរិន ប្រធានរដ្ឋសភា និងជួបចរចាផ្លូវការជាមួយលោកនាយករដ្ឋមន្ដ្រី ហ៊ុន សែន៕