របាយការណ៍របស់សមត្ថកិច្ចខេត្តបន្ទាយមានជ័យបានឲ្យដឹងថា ក្នុងរយៈពេល៥ខែនៅឆ្នាំ២០១៧នេះ ការបង្ក្រាបគ្រឿងញៀនបានឈានដល់ការឃាត់ខ្លួនជនសង្ស័យចំនួន ៩៤៩នាក់ និង រឹបអូសគ្រឿងញៀន បានជាង ៨០០គីឡូក្រាម។
របាយការណ៍ប្រចាំឆមាសទី១ ឆ្នាំ២០១៧ លើកឡើងក្នុងកិច្ចប្រជុំអនុវត្តន៍ផែនការ នៅថ្ងៃទី២២ ខែមិថុនា ឆ្នាំ២០១៧ នៅសាលប្រជុំសាលាខេត្តបន្ទាយមានជ័យ។ នេះបើតាមការចុះផ្សាយរបស់អគ្គស្នងការដ្ឋាននគរបាលជាតិ។
អភិបាលរងខេត្តបន្ទាយមានជ័យ លោក អ៊ុំ រាត្រី ប្រសាសន៍ កម្លាំងសមត្ថកិច្ចជំនាញខេត្ត បានបង្ក្រាបបទល្មើសគ្រឿងញៀនសរុបចំនួន៣២០ករណី ឃាត់ខ្លួនជនសង្ស័យបានចំនួន៩៤៩នាក់ និងស្ត្រីចំនួន៨០នាក់។
សម្ភារ និង វត្ថុតាងដែលសមត្ថកិច្ចប្រមូលបានរួមមានថ្នាំញៀន មេតំហ្វេតាមីនអក្សរ មេតំហ្វេតាមីនអាយស៍ រថយន្តចំនួន៤គ្រឿង ម៉ូតូ១៥គ្រឿង និង ទូរសទ្ទដៃចំនួន១៤៣គ្រឿងជាដើម៕