បុរសម្នាក់ដែលប្តឹងលោក ខឹម វាសនា ថាជេរប្រមាថពូជសាសន៍ខ្មែរជាសាធារណៈ បានចូលខ្លួនទៅបំភ្លឺនៅតុលាការ នៅព្រឹកថ្ងៃសុក្រនេះ។
ក្នុងពាក្យបណ្ដឹងចុះថ្ងៃទី១២ខែមិថុនាឆ្នាំ២០១៧ លោក សុច សឿង ឲ្យដឹងថា កាលពីថ្ងៃទី១២ខែកុម្ភៈ ឆ្នាំ២០១៧ នៅក្នុងវេទិកាជួបជុំគ្នារបស់លោក ខឹម វាសនា បានជេរប្រមាថជាសាធារណៈ ហើយការជេរប្រមាថនេះ ក៏ត្រូវបានផ្សព្វផ្សាយតាមបណ្ដាញសង្គមហ្វេសប៊ុកផង។
ដើរចេញពីច្រកទ្វារសាលាដំបូងរាជធានីភ្នំពេញ លោក សុច សឿង ជាម្ចាស់បណ្តឹងបានថ្លែងប្រាប់អ្នកសារព័ត៌មានថា ដើមចមដែលនាំឲ្យលោកប្តឹងប្រធានគណបក្សសម្ព័ន្ធដើម្បីប្រជាធិបតេយ្យ លោក ខឹម វាសនា ដោយថាមេបក្សរូបនោះ បានជេរប្រមាថនិងមើលងាយពូជសាសន៍ខ្មែរ ហើយប្រើពាក្យអសុរសជាច្រើន ប៉ះពាល់ដល់កិត្តិយស សេចក្ដីថ្លៃថ្នូររបស់ប្រទេសជាតិ។
លោក សុច សឿង បន្តថា ការចូលបំភ្លឺនៅតុលាការនាថ្ងៃទី២៣មិថុនានេះ ដោយទុកឯកសារភស្តុតាងជាសំឡេងឲ្យព្រះរាជអាជ្ញា នឹងស្នើទៅតុលាការពន្លឿនដោះស្រាយសំណុំរឿងនេះឲ្យបានឆាប់ និងចាត់វិធានការច្បាប់លើលោក ខឹម វាសនា។
លោកនិយាយថា៖ «ខ្ញុំសំណូមពរឲ្យព្រះរាជអាជ្ញាធ្វើការចោទប្រកាន់ [លោក ខឹម វាសនា] និងឲ្យព្រះរាជអាជ្ញាផ្តន្ទាទោសឲ្យបានធ្ងន់ធ្ងរទៅតាមផ្លូវច្បាប់ ហើយខ្ញុំសំណូមពរមួយទៀត សូមឲ្យគាត់ធ្វើជាលិខិតលាយលក្ខ័ណ្ឌអក្សរសសុំទោសខ្មែរជាសាធារណៈ និងបញ្ឈប់សកម្មភាពជេរប្រមាថចាប់ពីពេលនេះតទៅ»។
លោក សុច សឿង បញ្ជាក់ថា ព្រះរាជអាជ្ញារង លោក ស៊ិន វីរៈ ដែលកាន់សំណុំរឿងនេះ បានប្រាប់លោកថា តុលាការនឹងចាត់ការរឿងនេះតាមនីតិវិធីច្បាប់។ ប៉ុន្តែលោកថា ព្រះរាជអាជ្ញារងរូបនោះមិនបានបញ្ជាក់ពីពេលវេលាជាក់លាក់ ដែលត្រូវកោះហៅលោក ខឹម វាសនា ឲ្យចូលបំភ្លឺនោះទេ។
លើសពីនេះទៀត លោក សឿង បានបន្តថា លោកក៏បានដាក់ពាក្យបណ្ដឹងមួយទៀត ទៅស្ថាប័នព្រះមហាក្សត្រ ដើម្បីឲ្យជួយអន្តរាគមន៍ ទប់ស្កាត់នូវសកម្មភាពរបស់អ្នកនយោបាយរូបនេះផងដែរ។
មាត្រា៧ នៃរដ្ឋធម្មនុញ្ញព្រះរាជាណាចក្រកម្ពុជា មានខ្លឹមសារថា អង្គព្រះមហាក្សត្រកម្ពុជាមិនអាច នរណារំលោភបំពានបានឡើយ។
អ្នកនាំពាក្យគណបក្សសម្ព័ន្ធដើម្បីប្រជាធិបតេយ្យលោក កូវ គា ចាត់ទុកករណីពលរដ្ឋមា្នក់ប្តឹងលោក ខឹម វាសនា នោះថា ជាការមួលបង្កាច់ ដោយថា ពលរដ្ឋម្នាក់នោះមិនទាន់យល់ច្បាស់អំពីគណបក្សសម្ព័ន្ធ។ ទោះបីយ៉ាងណាលោកថា ប្រសិនបើមានការកោះពីតុលាការ ឲ្យលោក ខឹម វាសនា ចូលបំភ្លឺ គណបក្សនឹងពិភាក្សាគ្នាថា ត្រូវឲ្យលោក ខឹម វាសនា ចូលបំភ្លឺផ្ទាល់ ឬបញ្ជូនមេធាវីចូលជំនួស។
លោកនិយាយថា៖ «យើងនិងអនុវត្តតាមការសម្រេចរបស់តុលាការ បើមានដីកាកោះហៅរបស់តុលាការ ពីព្រោះបើសិនជាយើងមិនចូលទៅបង្ហាញទេ ទី១ បង្ហាញថា យើងមានការទទួលខុសត្រូវទៅលើពាក្យសម្តីរបស់យើង ដូចខ្ញុំនិយាយលោក សុច សឿង និយាយជាហេតុផលរបស់គាត់ ប៉ុន្តែសម្រាប់យើងក៏យើង មានហេតុផលរបស់យើងដែរ ណាមួយបើសិនជាយើងមិនចូលទៅបង្ហាញ វានឹងទៅជារឿងផ្សេងទៀត សម្រាប់ពួកយើង វាអាចខុសច្បាប់កាន់តែធ្ងន់ឡើង វាអាចនិយាយថាយើងខុសមែន យើងគ្មានការទទួលខុសត្រូវមែន»។
លោក កូវ គា បានបញ្ជាក់ថា បើតុលាការមិនរកឃើញកំហុសរបស់លោក ខឹម វាសនា ទេ គណបក្សរបស់លោកនឹងដាក់ពាក្យបណ្តឹង ដើម្បីប្តឹងបកទៅលោក សុច សឿង វិញ។
មាត្រា៣០៧ នៃក្រមព្រហ្មទណ្ឌ បទជេរប្រមាថជាសាធារណៈ មានខ្លឹមសារថា គ្រប់ពាក្យប្រមាថ មើលងាយ ឬពាក្យទ្រគោះ ដែលគ្មានការទំលាក់កំហុសទៅលើអំពើណាមួយ ដោយបញ្ចេញនៅទីសាធារណៈ ឬនៅក្នុងសាលប្រជុំសាធារណៈជាដើម ត្រូវពិន័យជាប្រាក់ពី១សែន ទៅ១០លានរៀល៕
