មេដឹកនាំបក្សប្រឆាំង លោក កឹម សុខា ថ្លែងបែបលើកទឹកចិត្តអ្នកគាំទ្រជាថ្មីទៀតថា នៅឆ្នាំក្រោយនេះ នឹងឈ្នះការបោះឆ្នោត ដើម្បីដឹកនាំប្រទេស ទោះមានបញ្ហាអ្វីកើតឡើងដោយចៃដន្យក៏ដោយ។
ក្នុងពិធីចុះជួបអ្នកគាំទ្រនៅខេត្តកំពតនាថ្ងៃទី២៣ខែមិថុនានេះ លោក កឹម សុខា បានធ្វើការប្រៀបធៀបចំនួនអាសនៈឃុំសង្កាត់ និងចំនួនអាសនៈតំណាងរាស្ត្រ ដែលគណបក្សប្រឆាំងទទួលបានចាប់ពីឆ្នាំ២០០៨ រហូតឆ្នាំ២០១៧នេះ។
លោក កឹម សុខា លើកឡើងទៀតថា ចាប់តាំងពីគណបក្សសិទ្ធិមនុស្ស និងគណបក្ស សម រង្ស៊ី រួមគ្នា បង្កើតជាគណបក្សសង្គ្រោះជាតិមក លោកថាកំណើនអ្នកគាំទ្របានហក់ឡើងជាបន្តបន្ទាប់ ដូចជាចំនួនអាសនៈតំណាងរាស្រ្តនៅឆ្នាំ២០០៨មានតែ២៩ ប៉ុន្តែនៅឆ្នាំ២០១៣ ចំនួននេះ បានឡើងដល់៥៥។ ចំណែក តំណែងមេឃុំសង្កាត់ឆ្នាំ២០១២ លោកថា មានតែ៤០ ប៉ុន្តែនៅឆ្នាំ២០១៧ ចំនួននេះបានហក់ឡើងជិត៥០០ កើនឡើងជាង១០ដង។
លោក កឹម សុខា ថ្លែងបែបលើកទឹកចិត្ត ដល់អ្នកគាំទ្រថា កំណើនហក់ឡើងនេះ លោកថា ជាម៉ែត្រវាស់ បែបវិទ្យាសាស្ត្រ បង្ហាញថា សង្គ្រោះនឹងដណ្តើមបានជ័យជម្នះ ការបោះឆ្នោតជាតិឆ្នំា២០១៨ខាងមុខ ដោយថា ទោះមានអ្វីកើតឡើងក៏ដោយ។
លោកថា៖ «គណបក្សសង្គ្រោះជាតិសព្វថ្ងៃ ឡើងបែបនេះ ឡើងជាង១០ភាគរយ កំពុងតែស្ទុះឡើង។ ហើយគណបក្សកាន់អំណាចកំពុងតែធ្លាក់ចុះ…បើសិន២០១៨ នៅសល់តែមួយឆ្នាំជាងទៀតទេ បើទោះបីចៃដន្យអី ឬបញ្ហាអី ដែលកើតឡើងមិនល្អ គណបក្សសង្គ្រោះជាតិ មិនមានសន្ទុះទៅលើនោះខ្លាំង ក៏អត់ទាន់ធ្លាក់ចុះដែរ ព្រោះមួយឆ្នាំពេលខ្លីណាស់»។
ជាញឹកញាប់ មេដឹកនាំបក្សកាន់អំណាច លោក ហ៊ុន សែន ធ្លាប់គំរាមម្តងហើយម្តងទៀតថា បើគណបក្សខ្លួនចាញ់ឆ្នោតមែន លោកថាអាចនឹងមានសង្គ្រាមកើតឡើង និងថាបើមានការផ្ទេរអំណាច ណាមួយក៏ផ្ទេរឲ្យកូនចៅរបស់លោកដែរ។
បើតាមលោក កឹម សុខា នៅខេត្តកំពតឆ្នាំ២០១២ គណបក្សប្រឆាំងមានមេឃុំ១ និងអាសនៈក្រុមប្រឹក្សាឃុំ សង្កាត់ចំនួន១៣០។ ឆ្នាំ២០១៧នេះ លោកថា បក្សប្រឆាំង ដណ្តើមតំណែងមេឃុំនិងចៅសង្កាត់ សរុបចំនួនប២២ និងអាសនៈក្រុមប្រឹក្សាឃុំសង្កាត់ចំនួន២៤០៕
