អាជ្ញាធរឲ្យដឹងថា ពលរដ្ឋខេត្តតាកែវបានជីកប៉ះគ្រាប់មិនទាន់ផ្ទុះមួយគ្រាប់ ដែលផលិតដោយសហរដ្ឋអាមេរិក ហើយមានទម្ងន់ជាង៣០០គីឡូក្រាម ខណៈពួកគេកំពុងជីកស្រះទឹកមួយកន្លែង។
អគ្គនាយកមជ្ឈមណ្ឌលសកម្មភាពកំចាត់មីនកម្ពុជា លោក ហេង រតនា បានសរសេរនៅលើទំព័រហ្វេសប៊ុកកាលកាលពីថ្ងៃទី២២មិថុនាថា ពលរដ្ឋបានជីកប៉ះគ្រាប់បែកមិនទាន់ផ្ទុះមួយគ្រាប់ប្រភេទ M117 ដែលក្បាលផ្ទុះនៅខាងក្រោយ និងមានទម្ងន់ប្រមាណ៣៥០គីឡូក្រាម។ លោកបានឲ្យដឹងទៀតថា គ្រាប់នេះ បានទម្លាក់ពីយន្តហោះកាលពីសម័យសង្គ្រាម និងកប់ក្នុងដីជម្រៅប្រមាណ៥ម៉ែត្រ នៅភូមិបាក់កូដ ឃុំលាយបូរ ស្រុកត្រាំកក់ ខេត្តតាកែវ។ ក្រោយពីទទួលព័ត៌មាននេះ លោកថា ក្រុមជំនាញស៊ីម៉ាក់បានចុះទៅដោះស្រាយ និងបន្សាបក្បាលផ្ទុះរួចហើយ។
លោក ហេង រតនា បានសរសេរថា៖ «សម័យនេះ ការប្រើប្រាស់គ្រឿងចក្រជីកដីជារឿងធម្មតា ហើយប៉ុន្មានខែដើមឆ្នាំ២០១៧នេះ ការជីករណ្តៅដី និងស្រះទឹក ប៉ះចំគ្រាប់ទំលាក់ពីយន្ដហោះ។ យើងពិតជាព្រួយបារម្ភចំពោះសុវត្ថិភាព ក្នុងការប្រើប្រាស់ដីជាមួយគ្រឿងចក្រ ដោយមិនបានត្រួតពិនិត្យសុវត្ថិភាពជាមុន!»។
គួរបញ្ជាក់ថា គ្រាប់ប្រភេទ M117 នេះជាប្រភេទគ្រាប់ដែលផលិត និងប្រើប្រាស់ដោយសហរដ្ឋអាមេរិក ក្នុងការប្រយុទ្ធទម្លាក់ពីលើយន្តហោះលើទីតាំងសត្រូវ និងត្រូវបានប្រើប្រាស់ជាលើកដំបូងក្នុងឆ្នាំ១៩៥០ ក្នុងសង្គ្រាមក្នុងឧបទ្វីបកូរ៉េ។ ជាទូទៅ គ្រាប់នេះ មានទម្ងន់ប្រមាណជា៣៥០គីឡូក្រាម ដែលក្នុងនោះវាផ្ទុកម្សៅ TNT សម្រាប់បំផ្ទុះប្រមាណ១៨៣គីឡូក្រាម៕