ក្រសួងព័ត៌មាន និងភាគីពាក់ព័ន្ធ ឲ្យដឹងថា យ៉ាងហោចណាស់ស្ថានីយវិទ្យុចំនួន៥ បានបិទរលកអាកាសផ្សាយ ក្នុងពេលដំណាលគ្នា ដោយសារម្ចាស់គ្រប់គ្រងផ្ទាល់ទាំងនោះ បានបញ្ឈប់ការជួលរបស់ខ្លួនភ្លាមៗ ក្រោមហេតុផលថា បានរំលោភសេចក្តីប្រកាសអនុញ្ញាតឲ្យធ្វើអាជីវកម្ម និងកិច្ចសន្យារបស់ក្រសួង។
បើតាមសេចក្តីក្រសួងព័ត៌មាន ការផ្សាយតាមរលកអាកាស FM ៩៣.៥០ មេហ្គាហ៊ឺត (ផ្សាយនៅភ្នំពេញ) រួមទាំង FM ៩៣.៧៥ មេហ្គាហ៊ឺត FM ១០៦.២៥ មេហ្គាហ៊ឺត និង FM ៩៣.២៥ មេហ្គាហ៊ឺត (ផ្សាយតាមខេត្ត) ដែលប្រតិបត្តិការដោយស្ថានីយវិទ្យុមហានគរ ត្រូវបានបញ្ជាឲ្យផ្អាកការផ្សាយចាប់ពីពេលនេះតទៅ។ ចំណែក ការផ្សាយតាមរលកអាកាស FM ១០៦.៥០ មេហ្គាហ៊ឺត និង FM ១០៦.៧០ មេហ្គាហ៊ឺត (ផ្សាយនៅភ្នំពេញ) ដែលប្រតិបត្តិការដោយវិទ្យុសារិកា និង វីអូឌី ក៏ត្រូវបានផ្អាកការផ្សាយ នៅថ្ងៃនេះដែរ។
សេចក្តីប្រកាសរបស់ក្រសួងព័ត៌មាន ចុះថ្ងៃទី២១ខែសីហា សរសេរបន្តថា ស្ថានីយ៍វិទ្យុ ដែលក្រសួងបិទរលកអាកាសផ្សាយ មិនឲ្យផ្សាយកើត នៅក្នុងពេលតែមួយនេះ ដោយសារ ម្ចាស់ស្ថាប័នទាំងនេះ បានរំលោភសេចក្តីប្រកាសអនុញ្ញាតឲ្យធ្វើអាជីវកម្ម និងកិច្ចសន្យា ដែលបានតម្កល់ទុកជាផ្លូវការនៅក្រសួងព័ត៌មាន។ ដោយឡែក កម្មវិធីព័ត៌មានវីអូឌី និងកម្មវិធីជាច្រើនទៀត ដែលផ្សាយតាមរយៈវិទ្យុសារិកា ក៏ត្រូវបានម្ចាស់កម្មសិទ្ធិគ្រប់គ្រង បានបញ្ឈប់ការជួលភ្លាមៗ ដោយមិនពន្យល់ពីមូលហេតុលម្អិតនោះទេ។
ករណីនេះ អ្នកនាំពាក្យក្រសួងព័ត៌មាន លោក អ៊ុក គឹមសេង បានប្រាប់ VOD បន្ថែម នៅថ្ងៃពុធនេះថា ដើមចមដែលនាំឲ្យក្រសួងព័ត៌មាន ផ្អាកការផ្សាយរបស់ស្ថានីយវិទ្យុមួយចំនួន ដោយថា ម្ចាស់ស្ថានីយទំាងនោះ មិនគោរពតាមការណែនាំរបស់ក្រសួង។
លោកនិយាយថា៖ «នៅក្នុងកិច្ចសន្យាទំាងអស់ សុទ្ធតែនិយាយគ្នាហើយថា មុននឹងយើងធ្វើអ្វី យើងត្រូវជូនដំណឹងគ្នា សុំពិគ្រោះយោបល់ជាមួយគ្នា ទៅវិញទៅមក ដូច្នេះកន្លែងស្ថានីយខ្លះ គាត់អត់គោរព ដូច្នេះបើមិនគោរព យើងប្រើសិទ្ធិរបស់ក្រសួង ដើម្បីបញ្ចប់ ឬក៏ផ្អាកការផ្សាយរបស់ពួកគាត់»។
នាយកប្រតិបត្តិមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ លោក ប៉ា ងួនទៀង មានប្រសាសន៍ថា ស្ថានីយវិទ្យុសំឡេងប្រជាធិបតេយ្យ វីអូឌី នឹងផ្អាកការផ្សាយតាមរលកអាកាស FM ១០៦.៥០ មេហ្គាហ៊ឺត និង FM ១០៦.៧០ មេហ្គាហ៊ឺត ដោយថា មានកំហុសបច្ចេកទេស និងបញ្ហាផ្នែករដ្ឋបាល។
លោកបន្តថា ការបញ្ឈប់ការជួលម៉ោង (រលកអាកាស) ផ្សាយនេះ ជាការបិទសិទ្ធិសេរីភាពបញ្ចេញមតិតាមប្រព័ន្ធផ្សព្វផ្សាយ និងធ្វើឲ្យប៉ះពាល់ដំណើរការលទ្ធិប្រជាធិបតេយ្យពិតនៅកម្ពុជា។
លោកថ្លែងថា៖ «ការបិទស្ថានីយវិទ្យុ [រលកអាកាសផ្សាយ]ខ្ញុំគិតថា វាប៉ះពាល់ដល់ដំណើរការប្រជាធិបតេយ្យ និងសេរីភាពបញ្ចេញមតិនៅស្រុកខ្មែរ ហើយវាឈានដល់ការប៉ះពាល់នៃដំណើរការអភិវឌ្ឍសង្គមប្រកបដោយតម្លាភាព បើមានការប៉ះពាល់ បានន័យថា សង្គមគ្មានការផ្សព្វផ្សាយព័ត៌មានឯករាជ្យដោយបើកចំហទេ វាកាន់តែមានវិបត្តិទៅទៀត ជាពិសេស វិបត្តិសង្គម និងវិបត្តិអំពើពុករលួយ»។
VOD មិនអាចសុំការបំភ្លឺ ពីលោកស្រី ឆៃ ច័ន្ទរិទ្ធី សូលីដា ដែលជាម្ចាស់គ្រប់គ្រងរលកអាកាសផ្សាយ ដែលជួលឲ្យស្ថានីយវិទ្យុសារិកា បានទេ ដោយលោកស្រីថា ជាប់រវល់ប្រជុំ។
នាយកវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មាន លោក មឿន ឈានណារិទ្ធ យល់ថា វិធានការរបស់ក្រសួងព័ត៌មាន ចំពោះការបិទមិនឲ្យស្ថានីយវិទ្យុផ្សាយ ហាក់ដូចជាលឿនពេក ដោយលោកថា ក្រសួងគួរតែយកគំរូតាម អគ្គនាយកដ្ឋានពន្ធដារ លោក គង់ វិបុល ដោយធ្វើការជូនដំណឹង និងទុកឱកាសឲ្យម្ចាស់ស្ថានីយធ្វើការកែតម្រូវ ជាជាងបញ្ឈប់ ឬបិទការផ្សាយ។
លោកនិយាយថា៖ «ដំបូងជាសេចក្តីណែនាំឲ្យយើង [ម្ចាស់ស្ថានីយវិទ្យុ] ធ្វើការកែតម្រូវ ត្រូវគោរពតាមកិច្ចសន្យា បើសិនជាការណែនាំហើយស្ថានីយផ្សេងៗនៅតែបន្តមិនគោរពតាម ក្រសួងគួរតែចាត់វិធានការបន្តទៀត ដូចជាករណីកាសែត ខេមបូឌា ដេលី អគ្គនាយកដ្ឋានពន្ធដារបានជូនដំណឹងជាមុន ហើយតម្រូវបង់ពន្ធ បើសិនគេមិនបង់ពន្ធអាចប្រឈមមុខនិងការបិទ»។
បើតាម កាសែត ខេមបូឌា ដេលី ដែលបានដកស្រង់សម្តីរបស់អ្នកនាំពាក្យក្រសួងព័ត៌មាន កាលពីថ្ងៃទី២២ខែសីហា មានខ្លឹមសារថា រដ្ឋាភិបាលកំពុងពិចារណាច្បាប់ថ្មី ដែលរារំាងស្ថានីយវិទ្យុនានាមិនឲ្យលក់ម៉ោង សម្រាប់កម្មវិធីផ្សាយរបស់វិទ្យុអាស៊ីសេរី (RFA) និងវិទ្យុសំឡេងសហរដ្ឋអាមេរិក (VOA)។
បន្ថែមពីនេះ អ្នកសារព័ត៌មាន កត់សម្គាល់ឃើញថា សម្រាប់កម្មវិធីផ្សាយនៅយប់ទី២៣សីហានេះ របស់វិទ្យុអាស៊ីសេរី និង វីអូអេ មិនត្រូវបានចាក់ផ្សាយបន្តដោយវិទ្យុស្ត្រី FM ១០២ មេហ្គាហ៊ឺត នោះទេ។
ចំណាត់ការលើស្ថានីយវិទ្យុឯករាជ្យទាំងនេះ គឺកើតឡើងយ៉ាងឆាប់រហ័ស ក្រោយ រដ្ឋាភិបាល ព្រមានចាត់វិធានការ កាសែត ខេមបូឌា ដេលី ដោយថា ក្នុងរយៈពេល៣០ថ្ងៃ បើអ្នកគ្រប់គ្រងកាសែតនេះ មិនព្រមទៅបង់ពន្ធ ដែលថាជំពាក់រដ្ឋ១០ឆ្នាំមកនេះ ចំនួនជាង៦លានដុល្លារនោះ៕