រដ្ឋាភិបាលកម្ពុជា សម្រេចបិទអង្គការសហររដ្ឋអាមេរិកមួយ ដោយថា អង្គការនេះប្រព្រឹត្តខុសនឹងច្បាប់ស្ដីពីអង្គការមិនមែនរដ្ឋាភិបាល និងច្បាប់សារពើពន្ធរបស់កម្ពុជា។
ក្នុងសេចក្ដីប្រកាសព័ត៌មានចេញផ្សាយនៅថ្ងៃពុធទី២៣សីហានេះ ក្រសួងការបរទេសកម្ពុជាអះអាងថា រដ្ឋាភិបាល បានសម្រេចបញ្ឈប់នូវរាល់សកម្មភាពរបស់អង្គការមួយ ដែលគាំទ្រដោយរដ្ឋាភិបាលអាមេរិកឈ្មោះ «វិទ្យាស្ថានជាតិប្រជាធិបតេយ្យ» ឬហៅកាត់ថា «NDI» ។
បើតាមសេចក្ដីប្រកាសព័ត៌មាន រដ្ឋាភិបាលចោទថា អង្គការបរទេសមួយនេះបានធ្វើប្រតិបត្តិការ នៅក្នុងប្រទេសកម្ពុជា ដោយមិនបានចុះបញ្ជីជាមួយក្រសួងការបរទេស និងសហប្រតិបត្តិការអន្ដរជាតិ រហូតដល់អង្គការនេះបានដាក់ពាក្យស្នើសុំចុះបញ្ជីនៅថ្ងៃទី២១មិថុនាឆ្នាំ២០១៦។ បន្ថែមលើសនេះ រដ្ឋាភិបាលដាក់ការចោទប្រកាន់ទៀតថា អង្គការ NDI ក៏មិនបានបង់ពន្ធ រហូតមកទល់ពេលបច្ចុប្បន្ន។
ប៉ុន្ដែមជ្ឈដ្ឋានជាតិ និងអន្ដរជាតិ មើលឃើញថា ការបិទអង្គការអាមេរិកមួយនេះ ហាក់ធ្វើឡើងបន្ទាប់ពីអង្គភាពសារព័ត៌មានស្និទនឹងរដ្ឋាភិបាលមួយ បានចុះផ្សាយឯកសារបែកធ្លាយ ដោយចោទថា អង្គការ NDI បានជួយរៀបចំនិងជ្រោមជ្រែងឲ្យគណបក្សប្រឆាំងផ្ដួលរំលំរដ្ឋាភិបាលក្នុងការបោះឆ្នោតជាតិនៅឆ្នាំ២០១៨ខាងមុខ៕
