លោកនាយករដ្ឋមន្ត្រី ហ៊ុន សែន ថ្លែងជាថ្មីទៀតនៅព្រឹកថ្ងៃពុធនេះថា ចាប់ពីឆ្នាំ២០១៩ រដ្ឋនឹងសម្រេចឲ្យកម្មករ កម្មការនីលើវិស័យឯកជន ទទួលបានប្រាក់សោធននិវត្តន៍ ស្មើនឹង៨០%នៃប្រាក់ខែដែលខ្លួនទទួលបាន។
នៅក្នុងពិធីជួបជាមួយកម្មករកម្មការិនីនៅព្រឹកថ្ងៃពុធនេះ នៅតំបន់សេដ្ឋកិច្ចពិសេសភ្នំពេញ លោក ហ៊ុន សែនថ្លែងថា កម្មករកម្មការិនី មិនបាច់ព្រួយបារម្ភទៀតទេថា ពេលចាស់ទៅ មិនមានប្រាក់ចិញ្ចឹមជីវិត ដោយលោកថា ចាប់ពីឆ្នាំ២០១៩ទៅ រដ្ឋសម្រេចឲ្យកម្មករកម្មការិនីទទួលបានប្រាក់សោធននិវត្តន៍។
ក្នុងឱកាសនោះ លោក ហ៊ុន សែន ក៏បានសម្រេចឲ្យ កម្មការិនីដែលមានផ្ទៃពោះ អាចឈប់សម្រាកនៅពេលសម្រាលកូនរយៈពេល៣ខែ ដោយទទួលបានប្រាក់ខែ ស្មើ១២០% ធៀបនឹងប្រាក់ឈ្មួលដែលទទួលបាន គឺច្រើនជាងប្រាក់ឈ្នួលធម្មតា។
លោកនាយករដ្ឋមន្ត្រី ហ៊ុន សែន បានដាក់ចេញផែនការ ជួបកម្មករកម្មការិនីតាមរោងចក្រ១សប្តាហ៍ពីរដង ដែលលោកថា ដើម្បីដឹងសុខទុក្ខរបស់កម្មករនិងជួយដោះស្រាយបញ្ហាប្រឈមទាំងនោះ៕