លោកនាយករដ្ឋមន្ត្រី ហ៊ុន សែន បានប្រកាសច្រានចោលការទទួលខុសត្រូវ ព្រឹត្តិការណ៍បង្ក្រាបក្រុមកម្មករដ៏បង្ហូរឈាម នៅផ្លូវវ៉េងស្រេង កាលពីជាង៣ឆ្នាំមុន ដោយថាករណីនេះ គួរតែចាប់មេដឹកនាំបក្សប្រឆាំងមកផ្តន្ទាទោស។
កាលពីថ្ងៃទី៣ខែមករាឆ្នាំ២០១៤ កម្មករយ៉ាងតិច៤នាក់ ត្រូវគេបាញ់សម្លាប់ ម្នាក់ទៀតបានបាត់ខ្លួន ជាង៤០នាក់ទៀតត្រូវគេអះអាងថា បានរងរបួស ក្រោយពីកងកម្លាំងបានបាញ់រះទៅលើក្រុមអ្នកតវ៉ា ហើយអ្នកតវ៉ាបានប្រើដុំថ្មគប់តបវិញ។
ព្រឹត្តិការណ៍បង្ហូរឈាមនេះ ជំរុញឲ្យសហគមន៍ជាតិនិងអន្តរជាតិ ចេញសេចក្តីថ្លែងការណ៍ថ្កោលទោស និងទាមទារឲ្យរដ្ឋាភិបាលនាំខ្លួនអ្នកប្រើអាវុធបាញ់រះកម្មករ មកផ្តន្ទាទោស។
ប៉ុន្តែលោកនាយករដ្ឋមន្ត្រី ហ៊ុន សែន ថ្លែងក្នុងពិធីជួបសំណះសំណាលជាមួយក្រុមកម្មករ ក្នុងរាជធានីភ្នំពេញ នាថ្ងៃទី២៣ខែសីហានេះថា មេដឹកនាំបក្សប្រឆាំងទេ ដែលត្រូវទទួលខុសត្រូវលើព្រឹត្តិការណ៍ដែលបានកើតឡើងកន្លងទៅនោះ។
លោក ហ៊ុន សែន ថ្លែងទៀតថា មូលហេតុដែលនាំឲ្យមានព្រឹត្តិការណ៍ ដោយសារមេដឹកនាំបក្សប្រឆាំងនៅពេលនោះ បានចុះកៀគរកម្មករឲ្យមកធ្វើបាតុកម្ម ដែរលោកថាចង់ផ្តួលរំលំរដ្ឋាភិបាល។
លោកថា៖ «អ្នកឯងធ្វើបាតុកម្មម៉ោង២យប់ តើជាបាតុកម្មស្អី? ជាបាតុកម្មផ្តួលរំលំ ហើយដឹងថាមនុស្សអ្នកឯងមកចូលរួមប៉ុន្មានអីប៉ុន្មាន? អាណាទៅដឹង!។ ដល់វាបាត់ខ្លួន ជួនកាលវាទៅគ្រឿងញៀនអីឯណា រួចហើយមកឲ្យរដ្ឋាភិបាលរក។ អាហ្នឹងត្រូវចាប់មេបាតុកម្មយកមកដាក់ខ្នោះ អាហ្នឹងទើបវាត្រូវ។ ថ្ងៃណាមួយ ខ្ញុំនិយាយបញ្ហាហ្នឹងជាមួយអង្គការសហប្រជាជាតិ អ្នកឯងស្រាវជ្រាវទៅ ត្រូវចាប់ពួកអាមេបាតុកម្មមកសួរចម្លើយ»។
ក្រោយផ្ទុះព្រឹត្តិការណ៍បាញ់រះកម្មករនេះ សាលាដំបូងរាជធានីភ្នំពេញ បានកោះហៅ លោក សម រង្ស៊ី និងលោក កឹម សុខា មកសាកសួរ ប៉ុន្តែពេលនោះតុលាការមិនបានចោទប្រកាន់មេដឹកនាំបក្សប្រឆាំងទេ។
VOD មិនអាចសុំការឆ្លើយតបករណីនេះពីគណបក្សសង្គ្រោះបានទេ ដោយអ្នកនាំពាក្យ លោក យឹម សុវណ្ណ មិនលើកទូរសព្ទ អនុប្រធានគណបក្សលោក ប៉ុល ហំម សុំមិនធ្វើអត្ថាធិប្បាយ។
អ្នកតាមដានព្រឹត្តិការណ៍នយោយ លោកបណ្ឌិត មាស នី លើកឡើងថា ពលរដ្ឋទំនងជាដឹងថា អ្នកណាជាអ្នកទួលខុសត្រូវពិតប្រាក ទាក់ទិននឹងព្រឹត្តិការណ៍បង្ហូរឈាមនៅផ្លូវវ៉េងស្រេងនេះ បើទោះបីពេលនេះអ្នកនយោបាយកំពុងចោទគ្នាទៅវិញទៅមកក៏ដោយ។
ប៉ុន្តែលោកថា បើតាមរដ្ឋធម្មនុញ្ញ រដ្ឋាភិបាលមានតួនាទីស្វែងរកយុត្តិធម៌ជូនជនរងគ្រោះ។
លោកថា៖ «តាមពិតបើយើងមើលចរិតអ្នកនយោបាយខ្មែរយើងមិនចំឡែកទេ នៅក្នុងស្ថានភាពមួយៗច្រើនតែឆ្លើយដាក់គ្នានៅពេលដែលពលរដ្ឋខ្លួនឯងរងគ្រោះ។ អញ្ចឹងហើយ ខ្ញុំគិតថាស្ថានការណ៍ផ្លូវវ៉េងស្រេងនេះ វាសំខាន់គឺកើតឡើងដោយសារតែកងកម្លាំងប្រដាប់អាវុធ ពិសេសការបញ្ជូនកងពល៩១១នៅពេលមកដល់ គឺចាប់ផ្តើមបាញ់ប្រហាតែម្តង»។
បើតាមលោក មាស នី បើជនដៃដល់ប្រើហិង្សាទៅលើពលរដ្ឋងាយរយគ្រោះ ហើយពួកគេត្រូវបានតម្លើងឋានៈដូចបច្ចុប្បន្ន លោកថា វធ្បធម៌និទណ្ឌភាព នឹងនៅតែបន្តកើតមានក្នុងប្រទេសដែលប្រកាន់លទ្ធិប្រជាធិបតេយ្យដ៏ក្មេងខ្ចីមួយនេះ៕