ក្រសួងរ៉ែនិងថាមពល បានបដិសេធមិនផ្តល់ឯកសារលម្អិតពាក់ព័ន្ធការនំាខ្សាច់ស(ខ្សាច់ស៊ីលីកា) ទៅលក់នៅក្រៅប្រទេស ដល់តំណាងរាស្ត្រគណបក្សប្រឆំាង ដោយបញ្ជាក់ថា គ្មានបែបបទរដ្ឋបាលណា តម្រូវឱ្យគ្រប់ស្ថាប័ន ត្រូវចម្លងជូននោះទេ។
តំណាងរាស្ត្របក្សសង្គ្រោះជាតិ និងជាអនុប្រធានគណៈកម្មការទី២ នៃរដ្ឋសភា លោក សុន ឆ័យ បានស្នើទៅរដ្ឋមន្ត្រីក្រសួងរ៉ែ លោក ស៊ុយ សែម កាលពីពាក់កណ្តាលខែមិថុនាឆ្នាំ២០១៧ ឲ្យបង្ហាញព័ត៌មាន និងឯកសារផ្លូវការ ពីភាពខុសគ្នារវាងតួរលេខនាំខ្សាច់ទៅលក់នៅប្រទេសសិង្ហបុរី ការផ្តល់អាជ្ញាប័ណ្ណឲ្យក្រុមហ៊ុនណា នៅតំបន់ណាខ្លះ និងសកម្មភាពបូមខ្សាច់នៅតែបន្តកើត បើទោះជារដ្ឋាភិបាលប្រកាសឲ្យបញ្ឈប់ការនាំចេញខ្សាច់គ្រប់ប្រភេទ។
សេចក្តីប្រកាសព័ត៌មានរបស់ក្រសួងរ៉ែ និងថាមពល ចុះថ្ងៃទី២២ខែសីហា បានបំភ្លឺថា ការគ្រប់គ្រង ការធ្វើអាជីវកម្មខ្សាច់ស ដើម្បីនាំចេញទៅក្រៅប្រទេស មានសមត្ថកិច្ចទទួលខុសត្រូវច្រើនស្ថាប័ន។ ករណីនេះ ក្រសួងរ៉ែ បញ្ជាក់ថា ក្រសួង មានកាតព្វកិច្ច ត្រឹមតែគ្រប់គ្រងលើការងារបច្ចេកទេស នៃការធ្វើអាជីវកម្មរ៉ែខ្សាច់ស និងការចេញលិខិតអនុញ្ញាតនំាចេញ តែប៉ុណ្ណោះ។
សេចក្តីប្រកាសព័ត៌មានដដែលបញ្ជាក់ថា រាល់សំណើររបស់លោក សុន ឆ័យ ពាក់ព័ន្ធសេចក្តីប្រកាសចេញចូល វិក្កយបត្របញ្ជាក់ការផ្ទុកទំនិញ បញ្ជិការផ្ទុកដាក់ទំនិញ វិក្កយបត្រពាណិជ្ជកម្ម និង វិក្កយបត្រកំណត់ពន្ធគយនានា មិនស្ថិតនៅក្រោមសមត្ថកិច្ចគ្រប់គ្រងរបស់ក្រសួងរ៉ែ និងថាមពលនោះទេ ដោយថាស្ថាប័ននេះ មានភារកិច្ចត្រឹម ប្រមូលឯកសារមួយចំនួន ដែលបានកំណត់ដោយប្រកាសអន្តរក្រសួង រវាងក្រសួងរ៉ែ និងក្រសួងសេដ្ឋកិច្ច និងហិរញ្ញវត្ថុ។
អនុប្រធានគណៈកម្មការទី២នៃរដ្ឋសភា លោក សុន ឆ័យ មានប្រសាសន៍ថា រដ្ឋសភា មានសិទ្ធិស្នើសុំឯកសារ ឬ តួលេខនិង អាចកោះហៅមន្ត្រីរដ្ឋាភិបាលមកសួរពាក់ព័ន្ធនឹងបញ្ហា ការអនុវត្តការងារប្រចាំថ្ងៃគឺត្រូវបើកចំហរ ហើយរដ្ឋមន្ត្រីគ្មានសិទ្ធិបដិសេធចំពោះសំណើរ របស់សភាឡើយ។ លោកបន្តថា បើក្រសួងរ៉ែនិងថាមពលនៅមិនព្រមផ្ដល់ឯកសារឲ្យសភា រឿងនេះ វានឹងរឹតតែមានការសង្ស័យកាន់តែខ្លាំង។
លោកថា៖ «វាមានហេតុផលអី ដែលបណ្ដាឲ្យក្រសួងលាក់កំបាំងឯកសារពាក់ព័ន្ធនឹងការងារ ទទួលខុសត្រូវរបស់គេ។ ចឹងខ្ញុំអត់អាចទទួលយកបានទេ សុំឲ្យក្រសួងផ្ដល់ឯកសារ ដែលខ្លួន មានរដ្ឋសភា រដ្ឋសភា ជាអាណាបក្ស និងជាស្ថាប័នបង្កើតរដ្ឋាភិបាល ហើយរដ្ឋាភិបាលសិទ្ធិអ្វី ហាមឃាត់ ឬលាក់កំបាំង នៅឯកសារ ដែលមាននៅក្នុងក្រសួងរបស់ខ្លួននោះទេ»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសសាន៍ថា ឯកសាររបស់រដ្ឋាភិបាល ជាឯកសារសាធារណៈ ដូចនេះប្រជាពលរដ្ឋ សង្គមស៊ីវិល មានសិទ្ធិសុំ ប៉ុន្តែចំពោះការបដិសេធសំណើរ គណបក្សប្រឆាំង លោកថាអាចមានចំណុចនៅខ្វះខ្លះ។
លោកថា៖ «ខ្ញុំគិតថា ទំនងមានរឿងពាក់ព័ន្ធភាពមិនចុះសម្រុងគ្នា នៅក្នុងរដ្ឋសភាពីមុនមក ព្រោះថាតាមខ្ញុំដឹងតំណាងរាស្ត្រ គណបក្សប្រឆាំងធ្លាប់ស្នើសុំឲ្យមានការជួបគ្នា ប៉ុន្តែប្រធាន រដ្ឋសភាគាត់បដិសេធរឿងហ្នឹង។ ចឹងរឿងមួយទៀត ពាក់ព័ន្ធរឿងក្រសួងរ៉ែនឹងថាពល មិន ព្រមផ្ដល់ជូននូវឯកសារ នឹងអាចខ្វះបញ្ជាក់ពីប្រធានរដ្ឋសភា ជាដើម»។
កាលពីថ្ងៃទី៣១ខែតុលា ឆ្នាំ២០១៦ ក្រុមអង្គការសង្គមស៊ីវិលជិត៥០ស្ថាប័ន បានផ្ញើលិខិតចំហមួយច្បាប់ទៅរដ្ឋមន្ត្រីក្រសួងរ៉ែនិងថាមពល លោក ស៊ុយ សែម ដោយទាមទារឲ្យបកស្រាយបំភ្លឺការនាំចេញខ្សាច់ពីប្រទេសកម្ពុជា ទៅកាន់ប្រទេសនានា ចាប់ពីឆ្នាំ២០០៧ដល់ឆ្នាំ២០១៥ផងដែរ។ តែអ្នកនាំពាក្យក្រសួងរ៉ែនិងថាមពល លោក ឌិត ទីណា បានថ្លែងថា ប្រទេសកម្ពុជាបាននាំខ្សាច់ចេញទៅបរទេសក្នុងបរិមាណជាង១៧លានតោន នៅចន្លោះឆ្នាំ២០០៧ដល់ឆ្នាំ២០១៥។
ទោះជាយ៉ាងណា តួលេខនេះខុសគ្នាឆ្ងាយពីតួលេខ ដែលគេទទួលបាន ពីខាងនាយកដ្ឋានស្ថិតិពាណិជ្ជកម្មរបស់រដ្ឋាភិបាលសិង្ហបុរី ដែលបានបង្ហាញថា ខ្សាច់ចំនួន៧២.៨លានតោន ត្រូវបាននាំចេញពីប្រទេសកម្ពុជាចូលទៅប្រទេសសិង្ហបុរី នៅក្នុងរយៈពេល៨ឆ្នាំ៕
