នគរបាលឥណ្ឌូនេស៊ី បានចោទប្រកាន់បណ្តាញម្នាក់របស់ក្រុម IS ឈ្មោះ Aman Abdurrahman ជាអ្នកស្ថិតនៅក្នុងក្រុមវាយប្រហារដោយបំផ្ទុះគ្រាប់បែកនៅតំបន់មួយក្នុងរដ្ឋធានីចាការតា កាលពីឆ្នាំ២០១៦ ដែលបានបណ្តាលឲ្យមានអ្នកស្លាប់ចំនួន៨នាក់។
នគរបាលជាតិរបស់ឥណ្ឌូនេស៊ី លោក Martinus Sitompul បានប្រាប់សារព័ត៌មាន Channel News Asia ថា បុរសរូបនោះត្រូវបានសមត្ថកិច្ចរកឃើញកាលពីថ្ងៃទី១៩ខែសីហាថា ជាប់ពាក់ព័ន្ធការវាយប្រហារនៅ Jalan Thamrin ដែលកាលនោះបណ្តាលឲ្យមនុស្ស៨នាក់ស្លាប់ រួមទាំងក្រុមវាយប្រហារ៤នាក់ផង។
សមត្ថកិច្ចរកឃើញថា ឈ្មោះ Aman Abdurrahman ជាអ្នកដើរតួនាទីសំខាន់ក្នុងការរៀបចំវាយប្រហារនោះតាមរយៈការគៀងគរ មូលនិធី ការជំរុញទឹកចិត្តឲ្យមានអ្នកអោបគ្រាប់បែកអត្តឃាត និងការបណ្តុះបណ្តាលផ្សេងៗទៀត។
Aman ទើបត្រូវបានសមត្ថកិច្ចដោះលែងកាលពីថ្ងៃទី១៣ខែ សីហាកន្លងទៅក្រោយពេលជាប់ពន្ធនាគារអស់៩ឆ្នាំ ពាក់ព័ន្ធនឹងការចោទថា បានបណ្តុះបណ្តាលក្រុមភេរវករនៅតំបន់អាសេ។ បុរសនេះ ត្រូវបានសមត្ថកិច្ចកំពុងតាមស្វែងរកចាប់ខ្លួនឡើងវិញ ក្រោយពីរកឃើញថា ជាប់ព័ន្ធការវាយប្រហារកាលពីឆ្នាំមុន។
ឥណ្ឌូនេស៊ី គឺជាប្រទេសមួយស្ថិតនៅក្នុងចំណោមប្រទេសផ្សេងទៀតនៅអាស៊ីអាគ្នេយ៍ ដែលកំពុងរងការគំរាមកំហែងដោយក្រុមភេរវកម្មខ្លាំង បន្ទាប់ពីក្រុមឧទ្ធាមក្នុងស្រុកបានសហការជាមួយ ពួកក្រុម IS៕