អង្គការសង្គមស៊ីវិលជាង៣០ស្ថាប័នដែលសកម្មក្នុងការការពារសិទ្ធិមនុស្សបាន ថ្តោលទោសការសម្រេចសេចក្តីរបស់សាលាដំបូងរាជធានីភ្នំពេញទៅលើអតីតប្រធានផ្នែកសិទ្ធិមនុស្សអាដហុក និងជាសមាជិកគ.ជ.ប លោកនី ចរិយា ដោយពួកគេចាត់ទុកថាការសម្រេចនោះស្ថិតក្រោមសម្ពោធរបស់រដ្ឋាភិបាល ក្នុងការរឹតត្បិតទៅលើលិទ្ធិប្រជាធិបតេយ្យនៅកម្ពុជាមុនការបោះឆ្នោតនាពេលខាងមុខ។
លោកនី ចរិយាត្រូវបានសាលាដំបូងរាជធានីភ្នំពេញសម្រេចឲ្យលោកជាប់ពន្ធនាគារ៦ខែ និងពិន័យជាប្រាក់៦លានរៀល ក្រោមបទចោទថាលោកបានបរិហារកេរ្តិ៍ជាសាធារណៈ បរិហារបង្កាច់កេរ្តិ៍ និងដាក់សម្ពាធដល់តុលាការ ដែលប្តឹងដោយមន្ត្រីនៃសាលាដំបូងខេត្តសៀមរៀបពីររូបគឺ ចៅក្រមស៊ើប គី ឬទ្ធី និងព្រះរាជអជ្ញារងខេត្តនេះលោក សុខ កែវបណ្ឌិត។
ក្នុងសេចក្តីថ្លែងការណ៍រួមចេញផ្សាយថ្ងៃទី២២ កញ្ញាម្សិលមិញ អង្គការសង្គមស៊ីវិលចំនួន៣៥អង្គការ និងសហគមន៍ បានចាត់ទុកថាការសម្រេចសេចក្តីរបស់សាលាដំបូងរាជធានីភ្នំពេញនេះធ្វើឡើងក្នុងបរិបទដែលមានការបង្ក្រាបខ្លាំងឡើងទៅលើសំឡេងឯករាជ្យពីសំណាក់រដ្ឋាភិបាល និងថាតុលាការគឺជាឧបករណ៍របស់រដ្ឋាភិបាលក្នុងការរឹតត្បិតទៅលើលិទ្ធិប្រជាធិបតេយ្យនៅកម្ពុជាមុនការបោះឆ្នោតខាងមុខ និងបានបង្ហាញពីការរំខានចំពោះសកម្មភាពស្របច្បាប់របស់អ្នកការពារសិទ្ធិមនុស្សតាមរយៈការដាក់ទោសទណ្ឌ។
អង្គការទាំងនោះបានលើកឡើងថាការអធិប្បាយរបស់លោក នី ចរិយា កាលពីលោកនៅជាប្រធានផ្នែកសិទ្ធិមនុស្ស និងឃ្លាំមើលរបស់សមាគមន៍អាដហុក “គឺស្ថិតក្នុងក្របខណ្ឌនៃការការពារសិទ្ធិមនុស្សនៅក្នុងច្បាប់អន្តរជាតិ ដែលទាមទារឲ្យមានការអធ្យាស្រ័យខ្ពស់ចំពោះសន្ទរកថាបែបនយោបាយ បើទោះជាការលើកឡើងបែបនេះប៉ះពាល់ដល់មន្ត្រី ឬស្ថាប័នសាធារណៈក្តី។ ការប្រើប្រាស់បទបរិហារកេរ្តិ៍ និងបទបញ្ញត្តិផ្សេងៗនៃក្រមព្រហ្មទណ្ឌកាន់តែច្រើនឡើងរបស់រដ្ឋាភិបាលដើម្បីផ្តន្ទាទោសព្រហ្មទណ្ឌ លើអ្នកនិយាយរិះគន់ទៅលើអជ្ញាធរ មិនស្របទៅនឹងច្បាប់សិទ្ធិមនុស្សអន្តរជាតិទេ និងធ្វើឲ្យប៉ះពាល់ធ្ងន់ធ្ងរដល់សិទ្ធិសេរីភាពជាមូលដ្ឋានខាងការបញ្ចេញមតិ”។
វីអូឌីមិនអាចទាក់ទងប្រធានគណកម្មការសិទ្ធិមនុស្សកម្ពុជាលោក កែវ រ៉េមី ដើម្បីឆ្លើយតបទៅនឹងការលើកឡើងទាំងនេះបាននៅឡើយទេនៅព្រឹកថ្ងៃសុក្រនេះ។
ក្នុងសេចក្តីថ្លែងការណ៍រួមរបស់សហគមន៍ និងអង្គការទាំង៣៥នោះក៏បានចាត់ទុកថាការសម្រេចរបស់សាលាដំបូងគឺ មិនត្រឹមត្រូវ មានកំហុសឆ្គង និងអយុត្តិធម៌ ដោយពួកគេជំរុញឲ្យសាលាឧទ្ធរណ៍កែប្រែឲ្យបានត្រឹមត្រូវនូវសេចក្តីសម្រេចរបស់សាលាដំបូងនេះ។
គួរបញ្ជាក់ផងដែរថា លោក នី ចរិយា ក្រៅពីជាប់បណ្តឹងដែលប្តឹងឡើងដោយមន្ត្រីនៃស្ថាប័ន តុលាការខេត្តសៀមរាមនេះ លោកក៏កំពុងជាប់បណ្តឹងមួយទៀតនៅតុលាការពាក់ព័ន្ធនឹងការចោទថាលោកសមគំនិតសូកប៉ាន់សាក្សី មិនឲ្យនិយាយរឿងពិតប្រាប់តុលាការករណីដែលគេចោទថា លោក កឹម សុខា មានសេ្នហាលួចលាក់។
ក្រៅពីនោះ មន្ត្រីនៃសមាគមអាដហុកបួនរូបផ្សេងទៀតរួមមានលោក នី សុខា លោក ណៃ វ៉ង់ដា លោក យី សុខសាន្ត និងអ្នកស្រីលឹម មុនី ក៏កំពុងជាប់ឃុំពាក់ព័ន្ធសំណុំរឿងនេះដែរ ដែលសង្គមស៊ីវិលជាតិនិងអន្តរជាតិមួយចំនួនលើកឡើងថាជារឿងនយោបាយ៕
