កូរ៉េខាងត្បូងបានពិចារណាលុបចោលគម្រោងផ្ដល់ជំនួយដល់ពលរដ្ឋដែលកំពុងរងគ្រោះដោយសារទឹក ជំនន់នៅកូរ៉េខាងជើង និងថែមទាំងបានចោទរដ្ឋាភិបាលក្រុងព្យុងយ៉ាងថាមិនបានគិតគូរពីសុខទុក្ខ ប្រជាពលរដ្ឋដោយរវល់តែរឿងអាវុធនុយក្លេអ៊ែរ។
សារព័ត៌មាន Channel News Asia បានចុះផ្សាយសម្ដីអ្នកនាំពាក្យក្រសួងការបរទេសកូរ៉េខាងត្បូងលោក Sun Nahm-kook នៅថ្ងៃព្រហស្បតិ៍នេះថា៖ “កូរ៉េខាងជើងរវល់តែរឿងជំរុញការធ្វើតេស្តគ្រាប់នុយក្លេអ៊ែរទី៥របស់ខ្លួន ខណៈដែលគ្រោះទឹកជំនន់កំពុងកើតមានឡើង”។
លោកបន្ថែមថា៖ “ថ្លៃចំណាយរបស់កូរ៉េខាងជើងលើការធ្វើតេស្តមីស៊ីលនិងនុយក្លេអ៊ែរ គិតទៅប្រហែលជា ២០០លានដុល្លារនោះ គឺវាច្រើនជាងការចំណាយលើការខូចខាតបង្កឡើងដោយគ្រោះទឹកជំនន់ទៅទៀត “។
Channel News Asia បានដកស្រង់សម្ដីអ្នកនាំពាក្យរូបនេះថាការមិនយកចិត្តទុកដាក់អំពីអាយុជីវិតរបស់ពលរដ្ឋខ្លួនពីសំណាក់រដ្ឋាភិបាលកូរ៉េខាងជើងគឺមិនអាចលើកលែងឲ្យបាននោះទេ។
របាយការណ៍អង្គការសហប្រជាជាតិបង្ហាញថានៅឆ្នាំនេះកូរ៉េខាងជើងបានទទួលរងផលប៉ះពាល់ដោយគ្រោះទឹកជំនន់ពុំធ្លាប់មានដោយមនុស្ស១៣៨នាក់បានស្លាប់និង៤០០នាក់ផ្សេងទៀតកំពុងបាត់ខ្លួន។ យ៉ាងហោចណាស់ផ្ទះជាង២ម៉ឺនខ្នងរងការបំផ្លិចបំផ្លាញ ខណៈពលរដ្ឋជាច្រើនទៀតបាត់បង់លំនៅឋាន។
អង្គការកាកបាទក្រហមអន្តរជាតិបានព្រមានថាកូរ៉េខាងជើងនឹងទទួលរងគ្រោះ មហន្តរាយដ៏ធំបន្ថែម ពីលើការខ្វះ ខាតផ្នែកស្បៀងអាហារដែលប្រទេសនេះកំពុងជួប៕
