នាយករដ្ឋមន្ត្រីអង់គ្លេស លោកស្រីធា សាមេ បានថ្លែងថា ក្នុងរយៈពេលនៃការរៀបចំរបស់អង់គ្លេសចាកចេញពីសហភាពអឺរ៉ុប ប្រមាណ២ឆ្នាំ គឺលក្ខខណ្ឌក្នុងទំនាក់ទំនងផ្នែកធ្វើពាណិជ្ជកម្មគួរតែរក្សាទុកដូចធម្មតាសិន។
លោកស្រី លើកឡើងថា ជនអន្តោប្រវេសរបស់សហភាពអឺរ៉ុបនឹងនៅតែបន្តធ្វើការងារនៅក្នុងប្រទេសអង់គ្លេសដូចធម្មតាដដែល ប៉ុន្តែត្រូវចុះបញ្ជីតាមការតម្រូវរបស់អាជ្ញាធរ។ ចំណែកអង់គ្លេសត្រូវបង់ថវិកាចូលសហភាពអឺរ៉ុបដូចរដ្ឋជាសមាជិកធម្មតាដដែល។ លោកស្រីថ្លែងបែបនេះនៅក្នុងប្រទេសអ៊ីតាលី ដោយបញ្ជាក់ថា អង់គ្លេសចាកចេញពីសហភាពអឺរ៉ុប ប៉ុន្តែមិនមែនចាកចេញពីប្លុកអឺរ៉ុបទេ។នេះបើតាមសារព័ត៌មានBBC។
ប្រធានក្រុមការងាររបស់អឺរ៉ុបជាអ្នកដឹកនាំការចរចាលើករណីចាកចេញរបស់អង់គ្លេសលោក Michel Barnier លើកឡើងថា ការលើកឡើងរបស់លោកស្រីធាសាមេនោះគឺជាចំណុចល្អដែលកំពុងដំណើរការទៅមុខ។
លោកស្រីធា សាមេ ក៏បានស្នើឡើងឲ្យមានកិច្ចព្រមព្រៀងថ្មីក្នុងការការពារសន្តិសុខ ដោយលោកស្រីបញ្ជាក់ថា សហភាពអឺរ៉ុបគឺជា ដៃគូរឹងមាំមួយរបស់អង់គ្លេស។
ចំពោះផ្នែកពាណិជ្ជកម្មលោកស្រី លើកឡើងថា ភាគីទាំងពីរអាចធ្វើឲ្យមានភាពប្រសើរឡើងបំផុត ជាគំរូដែលល្អជាងលក្ខខណ្ឌធ្លាប់បានអនុវត្តនៅពេលកន្លងទៅ។ លោកស្រីថា ចំណែកការកំណត់ពន្ធដារឆ្លងកាត់ព្រំដែននានាមិនត្រូវចាប់ផ្តើមអនុវត្តន៍ពីពេលនេះនោះទេ។
លោកស្រី ធា សាមេ មិនបានលើកឡើងថា អង់គ្លេសត្រូវបង់លុយឲ្យសហភាពអឺរ៉ុបប៉ុន្មានទេ ក្នុងរយៈពេល២ឆ្នាំទៅមុខទៀតរហូតដល់ខែមីនា ឆ្នាំ២០១៩នោះ។ ប៉ុន្តែតាមការចុះផ្សាយរបស់BBC ប៉ាន់ប្រមាណលុយដែលអង់គ្លេសត្រូវបង់មានប្រមាណ២០ពាន់លានអឺរ៉ូ ឬ ស្មើនឹង១៨ពាន់លានផោន។
ប្រែសម្រួលដោយពៅ មេត្តា