រដ្ឋមន្ត្រីក្រសួងការបរទេសរបស់រុស្ស៊ី បានហៅការវាយប្រហារគ្នាដោយពាក្យសម្តីទៅវិញទៅមករបស់ មេដឹកនាំសហរដ្ឋអាមេរិកលោក ដូណល ត្រាំ និង មេដឹកនាំកូរ៉េខាងជើងលោក គីម ជុងអ៊ុនថា កំពុងតែធ្វើឡើងដូចក្មេងនៅរៀនថ្នាក់មត្តេយ្យសិក្សា។
ថ្មីៗនេះ មេដឹកនាំរបស់កូរ៉េខាងជើង លោក គីម ជុងអ៊ុន បានហៅលោក ដូណល ត្រាំថា ជាមនុស្សរោគចិត្តឆ្កួតលីលា និង ជាមនុស្សឆោតល្ងង់ម្នាក់ បន្ទាប់ពីមេដឹកនាំអាមេរិករូបនោះព្រមានវាយកម្ចេចប្រទេសកូរ៉េខាងជើងទាំងមូល។
ជាការឆ្លើយតបវិញលោក ដូណល ត្រាំ បានហៅលោក គីម ជុងអ៊ុនថា ជាមនុស្សឆ្កួតដែលមិនគិតពីភាពអត់ឃ្លាននៅក្នុងប្រទេស ហើយបានប្រព្រឹត្តអំពើឃោរឃៅសម្លាប់ពលរដ្ឋខ្លួនឯង។
រដ្ឋមន្ត្រីការបរទេសរបស់រុស្ស៊ីលោក Sergei Lavrov ថ្លែងថា ក្នុងស្ថានភាពបច្ចុប្បន្នភាគីទាំងពីរត្រូវរក្សាភាពស្ងប់ស្ងាត់ដើម្បីស្វែងរកដំណោះស្រាយ។ លោកបន្តថា មិនអាចនៅស្ងៀមឲ្យកូរ៉េខាងជើងដំណើរការកម្មវិធីអាវុធនុយក្លេអ៊ែទេ ហើយក៏មិនអាចឲ្យមានការផ្ទុះសង្គ្រាមនៅឧបទ្វីបកូរ៉េបានដែរ។
រដ្ឋមន្ត្រីការបរទេសរបស់រុស្ស៊ីអំពាវនាវឲ្យភាគីពាក់ព័ន្ធដោះស្រាយតាមការសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។ លោកបន្តថា ទាំងចិនផងត្រូវប្រឹងប្រែងដោះស្រាយទាំងអស់គ្នា ហើយថា ភាគីជម្លោះមិនត្រូវប្រើអារម្មណ៍ចង់ច្បាំងគ្នាដូចកូនក្មេងរៀននៅថ្នាក់មត្តេយ្យសិក្សានោះទេ។
លោក គីម ជុងអ៊ុន ថ្លែងថា ពាក្យគំរាមឆ្កួតលីលារបស់លោក ត្រាំ កាន់តែជំរុញឲ្យលោកបង្កើនការផលិតអាវុធនុយក្លេអ៊ែដើម្បីការពារប្រទេស។
រដ្ឋមន្ត្រីការបរទេសរបស់កូរ៉េខាងជើងលោក Ri Yong-ho បានព្រមានថា កូរ៉េខាងជើងនឹងរៀបចំសាកល្បងគ្រាប់បែកអ៊ីឌ្រូសែននៅក្នុងមហាសមុទ្រប៉ាស៊ីហ្វិក ជាការឆ្លើយតបនិងការព្រមានគំរាមកំហែងរបស់មេដឹកនាំសហរដ្ឋអាមេរិក។
ប្រែសម្រួលដោយ ពៅ មេត្តា
