ការប្រកួត ដែលបានធ្វើឡើងយ៉ាងស្វិតស្វាញ នៅប៉ុស្ដិ៍លេខ៥ កាលពីថ្ងៃទី២២តុលា គឺការប្រកួតសប្ដាហ៍ចុងក្រោយ ក្នុងវគ្គជម្រុះ៣២រូប មកពីក្លិបផ្សេងយក១៦នាក់ ដើម្បីបន្តការប្រកួតជម្រុះក្នុងជុំទី២បន្តទៀតដែលដំណាក់កាលប្រកួតជម្រុះពី១៦នាក់យកតែ៨នាក់។ កីឡាករ មាស សុជាតិ គឺជើងខ្លាំងចុងក្រោយ សម្រាប់វគ្គជម្រុះ១៦នាក់ បើទោះជាជ័យជម្នះរបស់គេ បានឡើងយ៉ាងលំបាកដោយសារតែគូប្រកួតគឺ ម៉ន ចាន់ដារ៉ា ក៏មានពិន្ទុប្រផិតប្រផើយមិនចាញ់គ្នានៅក្នុងពេលនោះ។
យោងតាមការប្រកាសដែលបានធ្វើឡើងនៅប៉ុស្ដិ៍លេខ៥ ការប្រកួតជម្រុះជើងឯកប្រចាំឆ្នាំ២០១៧ ក្នុងប្រភេទទម្ងន់៦៥គីឡូក្រាមត្រូវកំណត់អោយដំណើរការចំនួន៨សប្ដាហ៍ ដើម្បីបើករេញអោយកីឡាករមកពីក្លិបផ្សេងគ្នាចំនួន៣២រូប នៅទូទាំងប្រទេសចាប់គូគ្នាឡើងប្រកួតម្ដងមួយគូៗ ដោយកំណត់លក្ខណ្ឌអ្នកណាឈ្នះបានឡើងទៅប្រកួតវគ្គបន្ត ហើយអ្នកចាញ់ហាលអាវ។
ការប្រកួតមួយនេះ បានដំណើរការប្រមាណជា២ខែមកហើយ ដោយក្នុងមួយសប្ដាហ៍ មានការប្រកួតជម្រុះចំនួន៤នាក់ស្មើនឹង២គូ ទើបគេឃើញរៀងរាល់សប្ដាហ៍តាំងពីកម្មវិធីប្រកួតនេះ លេចចេញរូបរាងនៅសង្វៀនប៉ុស្ដិ៍លេខ៥ ព្រែកកំពិស គឺមានកីឡាករ២រូប ត្រូវបានទម្លាក់ ហើយកីឡាករ២រូបបានឡើងបន្ត។ កីឡាករ ដែលបានឡើងប្រកួតនៅក្នុងកម្មវិធីនេះ ត្រូវគេឃើញចម្រុះដោយកីឡាករជើងចាស់ និងជើងថ្មីដែលមានថ្វីដៃល្អៗ ហើយអ្វីដែលគេកត់សម្គាល់គឺកីឡាករម្នាក់ៗអត់មានទម្លាក់ដៃគ្នាក្នុងពេលប៉ះគ្នានោះទេ គឺសុទ្ធតែខំបញ្ចេញថ្វីដៃរៀងខ្លួន បើទោះជាលទ្ធផលចុងក្រោយគឺមិនអាចមានស្មើពិន្ទុ ឬ ឈ្នះទាំងពីរក៏ដោយ។
ការប្រកួតមួយនេះ សឹងមិនមានគូណាដែលចាញ់ឈ្នះគ្នាហើយ មិនរងរបួសបែកមុខបែកមាត់នោះទេ ដោយសារតែកីឡាករ ដែលមានឈ្មោះប្រកួតនៅក្នុងកម្មវិធីត្រូវការឱកាសឈានឡើងដើម្បីពង្រីកក្រេឌីត និងឥទ្ធិពលរបស់ខ្លួនផងនៅក្នុងពិភពប្រដាល់។ កាលពីល្ងាចថ្ងៃទី២១តុលា គឺសប្ដាហ៍ចុងក្រោយ ដែលកីឡាករមកពីទូទាំងប្រទេសក្នុងប្រភេទទម្ងន់ ដែលបានកំណត់ត្រូវឡើងប៉ះគ្នា ខណៈដែលកីឡាករមួយរូប គឺជើងខ្លាំង មាស សុជាតិ គឺជាអ្នកមានសំណាងបានឡើងទៅអង្គុយទី១៦ក្រោយគេ ដើម្បីឈានឡើងទៅប្រកួតក្នុងវគ្គជម្រុះជុំទី២បន្តទៀត។
ការប្រកួតក្នុងវគ្គបន្តគឺជាការកំណត់អោយអ្នកឈ្នះទាំង១៦នាក់ បន្តចាប់គូគ្នាប្រកួតចាញ់ធ្លាក់ៗដដូចក្នុងជុំទី១ទៀត ដោយតម្រូវអោយកីឡាករ២នាក់ ប្រកួតគ្នាហើយអ្នកឈ្នះ នឹងបន្តឡើងអង្គុយកៅអី៨នាក់ឆ្ពោះ ទៅរកការប្រកួតជម្រុះដដែលជាដដែល ដើម្បីកំណត់អោយកីឡាករ ដែលបន្តបានឈ្នះប្រកួតគ្នាជម្រុះបែបហ្នឹង រហូតនៅដល់តែម្នាក់ចុងក្រោយ ដើម្បីអោយក្លាយជាម្ចាស់ពាន។ ការប្រកួតមួយនេះ សម្រាប់អ្នកក្លាយជាម្ចាស់ជើងឯក គឺមានន័យថាជាកីឡាករដែលមិនធ្លាប់ចាញ់ទាល់តែសោះក្នុងចំណោមការប្រកួតដែលបានធ្វើឡើងក្នុងវគ្គជម្រុះពីមួយដំណាក់ទៅដំណាក់កាល អ៊ីចឹងហើយទើបអ្នកដែលមានសំណាងបានឡើងទៅកាន់វគ្គបន្តរមែងទទួលបានការសរសើរ ប៉ុន្តែក៏មានអ្នកខ្លះចោទថាបានឡើងដោយសារតែមានការកាន់ជើងពីលោកអាជ្ញាកណ្ដាល និងការផ្ដល់ពិន្ទុបែបយិតយោងបន្តិចបន្តួច នៅពេលការប្រកួតរយៈពេល៣ទឹកមានពិន្ទុប្រហាក់ប្រហែលគ្នានោះផងដែរ។
អ្នកទស្សនាខ្លះរមែងយល់ថា អ្នកទទួលបានពិន្ទុឈ្នះក្នុងពេលការប្រកួតមិនស៊ីសងគ្នា គឺដោយសារតែកីឡាកររូបនោះមានសំណាង ឬមានគ្រូបង្វឹករបស់ខ្លួនមានទំនាក់ទំនងនៅពីក្រោយជាមួយចៅក្រមផ្ដល់ពិន្ទុ។ យ៉ាងណាមិញ គេនៅតែចាត់ទុកថាអ្នកដែលបានបន្តឡើងទៅកាន់វគ្គបន្ទាប់គឺផ្ដើមចេញពីសមត្ថភាព ដោយសារតែភាពជាក់ស្ដែងគឺការប្រកួតរបស់កីឡាករនីមួយៗ គឺមានការវិនិច្ឆ័យពីអ្នកទស្សនាដែលចេះមើលពីការកំណត់ពិន្ទុភាគច្រើន ដែលសឹងតែអាចនិយាយបានថាមិនមានការផ្ដល់ពិន្ទុចំពោះអ្នកឈ្នះណាម្នាក់មានលទ្ធផលមិនត្រូវចិត្តអ្នកគាំទ្រនោះទេ។
ជាក់ស្ដែងការប្រកួតក្នុងសប្ដាហ៍ចុងក្រោយសម្រាប់ការជម្រុះដណ្ដើមកៅអី១៦នាក់ដែលបានធ្វើឡើងគឺមានការចម្រូងចម្រាស់ពីភាគីអ្នកគាំទ្រម្ខាងគួរសម ដោយសារតែអ្នកកាន់ជើងម៉ន ចាន់ដារ៉ា និងមាស សុជាតិ ដែលបានឡើងអង្គុយកៅអីទី១៦ក្រោយគេ សុទ្ធតែមានអំណះអំណាងរៀងខ្លួនថាគួរតែអោយអ្នកចាញ់ឈ្នះល្អជាង និងម្ខាងទៀតថាអោយមាស សុជាតិ ឈ្នះគឺត្រឹមត្រូវហើយ។
លោក សេង កដិកា និយាយថា ក្នុងចំណោមគូប្រកួតទាំង៣២នាក់ដែលបានប្រកួតគ្នា លោកចាត់ទុកថា រវាងបង្គោលក្រហម មាស សុជាតិ និងបង្គោលខៀវ ម៉ន ចាន់ដារ៉ា គឺស្ទើតែបែងចែករកអ្នកណាគួរឈ្នះមិនបានតែម្ដង ដោយសារតែការប្រកួត៣ទឹកដែលបានធ្វើឡើងសុទ្ធតែល្អមិនចាញ់គ្នា ព្រោះតែភាគីម្ខាងៗប្រកួតអស់ពីសមត្ថភាព។ លោកថាអ្នកទាំងពីរត្រូវបានគណកម្មការផ្ដល់ពិន្ទុមិនឯកច្ឆ័ន្ទនោះទេ ដោយសារតែមាស សុជាតិ បង្គោលក្រហម ដ្បិតថាត្រូវបានចៅក្រម៣នាក់អោយឈ្នះពិន្ទុក្នុងចំណោមចៅក្រមទាំង៥មែន ប៉ុន្តែបើនិយាយពីពិន្ទុគឺចាញ់ឈ្នះគ្នាតិចតួចប៉ុណ្ណោះដែលលោកបានចាត់ទុកថានេះជាលទ្ធផលលំបាកមួយរបស់គណកម្មការ និងសម្រាប់អ្នករៀបចំកម្មវិធីដូចលោក។
លោក នៅតែមានអារម្មណ៍សោកស្ដាយនៅពេលទម្លាក់កីឡាករ ម៉ន ចាន់ដារ៉ា ដោយលោកប្រកាសថាកីឡាករមកពីក្លិបការិយាល័យកងទ័ពជើងគោករូបនេះ គឺជាជើងខ្លាំងវ័យក្មេងនិងកំពុងឡើងកូដដោយលោកប្រកាសថាបើបានបន្តទៅកាន់វគ្គជម្រុះ១៦នាក់ យក៨នាក់ គឺពិតជាវាយបែកផ្សេង។ លោកថាសរសើរសំណាងរបស់កីឡាករ មាស សុជាតិ ដែលបានឡើងអង្គុយកៅអី១៦នាក់ចុងក្រោយ ក្នុងពេលដែលគូប្រកួតរបស់លោកគឺជាកីឡាកររជើងខ្លាំងមួយ និងមានថ្វីដៃមិនធម្មតាផងដែរ។ យ៉ាងណាមិញ លោកថាកីឡាករមាស សុជាតិ មិនទាន់ប្រកាសថានឹងអាចឆ្លងផុតការជម្រុះពី១៦នាក់យក៨នាក់ទៅកាន់វគ្គបន្តនោះទេ ដោយសារតែកីឡាករដែលបានឡើងអង្គុយកៅអីក្នុងវគ្គ១៦នាក់ គឺសុទ្ធតែជាជើងខ្លាំង។
លោកថា ការប្រកួតក្រោយបញ្ចប់វគ្គជម្រុះ៣២យក១៦នាក់ គឺមានន័យថាការប្រកួតកាន់តែតឹងមួយកម្រិតទៀតហើយ ដោយសារតែក្នុងចំណោមអ្នកបានទៅកាន់វគ្គបន្តគឺមិនទាន់ស្គាល់ចាញ់នៅឡើយ ដែលទាមទារអោយកីឡាករម្នាក់ៗត្រូវបន្តបញ្ចេញថ្វីដៃកាន់តែច្រើនបន្ថែមទៀតដើម្បីយកឈ្នះលើគូប្រកួតជៀសវាងការធ្លាក់ហាលអាវ។ លោកថាការប្រកួតតាមរូបមន្តបែបនេះ ទទួលបានលទ្ធផលវិជ្ជមានល្អណាស់ ហើយក៏មិនភ័យរឿងកីឡាករណាម្នាក់លក់ដូរលទ្ធផលនោះដែរ ដោយសារតែការបរាជ័យក្រៅពីរងការរិះគន់ ក៏ត្រូវបាត់ឱកាសសម្រាប់ការប្រកួតនៅក្នុងវគ្គបន្ទាប់ ដែលផ្ទុយពីការប្រកួតជើងឯកតាមរូបមន្តសន្សំពិន្ទុ ដែលមានកីឡាករខ្លះវាយប្ដូរលទ្ធផលក្រោយពេលទទួលបានពិន្ទុដាច់គេដឹងតែបានឡើងបើទោះជាសល់មួយប្រកួតចុងក្រោយ ឬកីឡាករដែលដឹងថាខ្លួនធ្លាក់ស្វ័យប្រវត្តិដែលមិនចាំបាច់ប្រឹងប្រកួតអោយអស់ពីសមត្ថភាព៕