មេបក្សប្រឆាំង លោក កឹម សុខា អំពាវនាវសុំឲ្យសហគមន៍អន្តរជាតិ ជាពិសេស ប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ជួយស្តារស្ថានការណ៍នយោបាយកម្ពុជាជាបន្ទាន់ ដោយថា កម្ពុជាពេលនេះកំពុងតែរងគ្រោះផ្នែកនយោបាយ និងសិទ្ធិមនុស្ស។
តាមរយៈសារលិខិតអានដោយមន្រ្តីគណបក្សសង្គ្រោះជាតិ ក្នុងពិធីរំលឹកខួបលើកទី២៦ នៃកិច្ចព្រមព្រៀងសន្តិភាពទីក្រុងប៉ារីស នៅព្រឹកថ្ងៃទី២៣តុលាឆ្នាំ២០១៧នេះ ប្រធានគណបក្សសង្គ្រោះជាតិ លោក កឹម សុខា ដែលកំពុងជាប់ឃុំបណ្តោះអាសន្ន ក្នុងពន្ធនាគារត្រពាំងផ្លុង ខេត្តត្បូងឃ្មុំ មានប្រសាសន៍ថា ប្រទេសកម្ពុជាបច្ចុប្បន្ន កំពុងដើរផ្លូវផ្ទុយស្មារតី នៃកិច្ចព្រមព្រៀងសន្តិភាពទីក្រុងប៉ារីស ដោយថា បក្សប្រឆាំងដ៏ធំនៅកម្ពុជា កំពុងតែរងការលាបពណ៌ ដែលនេះជាលេស ដើម្បីទប់ស្កាត់មិនឲ្យចូលរួមបោះឆ្នោតដោយពេញលក្ខណៈ។
លោកបន្ថែមថា «ខ្ញុំយល់ថា ប្រសិនសហគមន៍អន្តរជាតិ ក៏ដូចជាភាគីខ្មែរទាំងអស់ មិនរកដំណោះស្រាយឲ្យទាន់ពេលវេលាទេ ប្រទេសកម្ពុជានឹងវិលថយក្រោយវិញ ដែលនាំឲ្យកម្ពុជាកម្ពុជា បាត់បង់ប្រយោជន៍ និងយឺតយ៉ាវក្នុងការអភិវឌ្ឍន៍ ដូចដែលយើងធ្លាប់បាត់បង់ពេលវេលា ជាងពីរទសវត្ស នៃសង្គ្រោមមុនកិច្ចព្រមព្រៀងសន្តិភាពទីក្រុងប៉ារីនេះ»។
ទោះយ៉ាងណា ថ្លែងក្នុងពិធីបើកការដ្ឋានសាងសង់ស្ពានមួយកន្លែងនៅថ្ងៃនេះ លោកនាយករដ្ឋមន្រ្តី ហ៊ុន សែន មានប្រសាសន៍ថា កិច្ចព្រមព្រៀងសន្តិភាពទីក្រុងប៉ារីសបានស្លាប់ទៅហើយ បន្ទាប់ពីកម្ពុជាបង្កើតរដ្ឋធម្មនុញ្ញឆ្នាំ១៩៩៣ ដោយថា បានច្របាច់ខ្លឹមសារនោះបញ្ចូលគ្នា ទៅក្នុងរដ្ឋធម្មនុញ្ញ ដែលធ្វើឲ្យសហគមន៍អន្តរជាតិ ពិបាកក្នុងកោះប្រជុំសើរើរឿងនេះឡើងវិញ។
លោកបន្ថែមថា «ដូច្នេះ របស់ដែលហៅថា ការអំពាវនាវឲ្យបណ្តាប្រទេសហត្ថលេខី នៃកិច្ចកិច្ចព្រមព្រៀងសន្តិភាពទីក្រុងប៉ារីស បើកកិច្ចប្រជុំឡើងវិញ វាហួសសម័យ ហើយវាធ្វើមិនកើតផង វាត្រូវតែបង្កើតភាគីកម្ពុជា៤ភាគីឡើងវិញ ទើបវាត្រឹមត្រូវ ឥលូវភាគីកម្ពុជាមានតែមួយទេ គឺរាជរដ្ឋាភិបាលស្របច្បាប់នៅទីនេះដើម្បីតំណាងដោយព្រះមហាក្សត្យ ដែលព្រះអង្គគង់ជាព្រះប្រមុខរដ្ឋរបស់ព្រះរាជាណាចក្រកម្ពុជា»។
ចំពោះ អ្នកវិភាគនយោបាយ លោក ឡៅ ម៉ុងហៃ ធ្លាប់លើកឡើងថា កិច្ចព្រមព្រៀងសន្តិភាពទីក្រុងប៉ារីសមិនទាន់ស្លាប់នោះទេ ដោយលោកពន្យល់ថា កម្ពុជាមិនដែលផ្ញើលិខិតណាមួយទៅភាគីហត្ថលេខី ឬ អតីតសហប្រធានសន្និសីទក្រុងប៉ារីស ដើម្បីបញ្ជាក់ថា ខ្លួននឹងឈប់គោរពតាមកិច្ចព្រមព្រៀងហើយនោះដែរ និងថា កិច្ចព្រមព្រៀងនេះ ក៏មិនបានបញ្ជាក់ថេរវេលា ថាតើនឹងអស់សុពលភាពនៅពេលណាដែរ។
លោកបន្ថែមថា «ក្នុងករណី មានការរំលោភសិទ្ធិមនុស្សយ៉ាងធ្ងន់ធ្ងរ ប្រទេសទាំងឡាយហ្នឹង អាចសុំឲ្យអង្គការពាក់ព័ន្ធ អង្គការសហប្រជាជាតិហ្នឹង ធ្វើអន្តរាគមន៍ ដើម្បីទប់ស្កាត់ទៅនឹងការរំលោភបែបហ្នឹង»។
គួររំលឹកថា បន្ទាប់ពីចាប់ខ្លួនមេបក្សប្រឆាំង និងបក្សកាន់អំណាចកំពុងជំរុញយន្តការរឹបអូសយកអាសនៈទាំង៥៥របស់គណបក្សប្រឆាំងឲ្យទៅគណបក្សផ្សេងនោះ គឺបានធ្វើឲ្យមតិជាតិ និងអន្តរជាតិ សម្តែងការព្រួយបារម្ភចំពោះស្ថានភាពនយោបាយ និងសិទ្ធិមនុស្សនៅកម្ពុជា។
អង្គការអន្តរសភា IPU មានសមាជិក១៧៣ប្រទេស កាលពីថ្ងៃទី១៨តុលាឆ្នាំ២០១៧ បានជំរុញឲ្យរដ្ឋាភិបាលកម្ពុជាដោះលែង លោក កឹម សុខា ដោយថា ការចាប់ខ្លួននោះ ធ្វើឡើងដោយខុសច្បាប់ និងកំពុង រំលោភសិទ្ធិមនុស្ស។
កន្លងមក សហគមន៍អន្តរជាតិ រួមមាន រដ្ឋាភិបាលប្រទេសអូស្ដ្រាលី សហគមន៍អឺរុប បារាំង អាល្លឺម៉ង់ សហរដ្ឋអាមេរិក និងអង្គការសិទ្ធិមនុស្សមួយចំនួនទៀត បានហៅការចាប់ខ្លួនលោក កឹម សុខា ថា ជាការគំរាមកំហែងផ្នែកនយោបាយ និងទទូចឲ្យដោះលែង លោក កឹម សុខា ជាបន្ទាន់ ដោយថា ដើម្បីធានាដំណើរការបោះឆ្នោត ដែលត្រូវតែមានភាពសេរី ត្រឹមត្រូវ និងយុត្តិធម៌៕
