បុរសជប៉ុនម្នាក់វ័យ២៨ឆ្នាំ បានស្លាប់ បន្ទាប់ពីស្ទះបំពង់ខ្យល់ នៅក្នុងកម្មវិធីប្រកួតញ៉ាំអាហារ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP ដែលបានដកស្រង់សម្ដីអ្នករៀបចំកម្មវិធីប្រកួតញ៉ាំអាហារ កាលពីថ្ងៃម្សិលមិញ។
ដោយបានដកស្រង់សម្ដីសហករណ៍កសិករក្នុងតំបន់ដែលបានឧបត្ថម្ភកម្មវិធីនោះនៅភាគខាងលិចទីHikone នោះ AFP បានផ្សាយបន្តថា បុរសនោះ ដែលមិនត្រូវបានគេបញ្ចេញឈ្មោះឲ្យដឹងនោះ បានស្លាប់កាលពីថ្ងៃទី១៦ ខែវិច្ឆិកា នៅឯមន្ទីរពេទ្យ ពោលគឺ ៣ថ្ងៃក្រោយពីស្ទះបំពង់ខ្យល់។
កម្មវិធីប្រកួតនោះ ត្រូវបានគេរៀបចំឡើងដើម្បីរកឲ្យឃើញនរណាដែលអាចហូបដុំបាយ ៥ដុំបានលឿនជាងគេ។
អ្នករៀបចំកម្មវិធី បានប្រាប់ AFP ថា បុរសម្នាក់នោះ បានលេបដុំបាយទាំង ៥ដុំនោះចូលក្នុងមាត់របស់គេ មុននឹងខ្ជាក់ចេញវិញ ហើយត្រូវបានគេបញ្ជូនទៅមន្ទីរពេទ្យក្នុងតំបន់ មុននឹងរូបគេស្លាប់នៅទីនោះ។
ការប្រកួតញ៉ាំអាហារ គឺជាកម្មវិធីដ៏មានប្រជាប្រិយនៅក្នុងពិធីពិព័ណ៌ថ្នាក់តំបន់នានានៅក្នុងប្រទេសជប៉ុន ដើម្បីផ្សព្វផ្សាយផលិតផល និងវប្បធម៌តាមតំបន់៕