គ.ជ.ប. បញ្ជូន​ព័ត៌មាន​ចុះ​ឈ្មោះ​បោះ​ឆ្នោត​ដល់​ពលរដ្ឋ​តាម​ប្រព័ន្ធ​ទូរសព្ទ​

គ.ជ.ប

គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. បានប្រកាសដាក់ឲ្យប្រើប្រាស់ប្រព័ន្ធផ្ដល់ព័ត៌មានជាសំឡេងដោយស្វ័យប្រវត្តិតាមទូរសព្ទ ដែល គ.ជ.ប. ថា ដើម្បីជំរុញប្រជាពលរដ្ឋទាំងអស់ ឲ្យទៅចុះឈ្មោះឲ្យទាន់ពេលវេលា ខណៈរយៈពេលនៃការចុះឈ្មោះបោះឆ្នោតនៅតែរយៈពេលមួយសប្ដាហ៍ទៀតប៉ុណ្ណោះ។

គ.ជ.ប. បានប្រកាសដូច្នេះនៅក្នុងសេចក្ដីប្រកាសព័ត៌មានមួយកាលពីថ្ងៃម្សិលមិញ។

គ.ជ.ប. បានបញ្ជាក់ក្នុងសេចក្ដីប្រកាសព័ត៌មាននោះថា ប្រជាពលរដ្ឋដែលប្រើប្រាស់ប្រព័ន្ធទូរសព្ទ Cellcard, Smart និង Metfone នឹងទទួលបានព័ត៌មានជុំវិញដំណើរការចុះឈ្មោះបោះឆ្នោតតាមប្រព័ន្ធកុំព្យូទ័រ ដោយគ្រាន់តែទូរសព្ទទៅលេខ ១២៨៥ប៉ុណ្ណោះ និងមិនត្រូវការចំណាយទឹកប្រាក់នោះឡើយ។

លទ្ធផលបណ្ដោះអាសន្ននៃការចុះឈ្មោះបោះឆ្នោតចេញផ្សាយកាលពីថ្ងៃម្សិលមិញ បានបង្ហាញថា គ.ជ.ប ចុះបញ្ជីប្រជាពលរដ្ឋបានជាង ៧លាន ៤២ម៉ឺននាក់ ឬស្មើនឹងជាង ៧៦ភាគរយ នៃចំនួនពលរដ្ឋគ្រប់អាយុបោះឆ្នោតសរុបជាង ៩លាន ៦៦ម៉ឺននាក់ នៅទូទាំងប្រទេស។

ទោះជាយ៉ាងណា ចំនួនពលរដ្ឋចុះឈ្មោះបោះឆ្នោតប្រចាំថ្ងៃ បានធ្លាក់ចុះជាបន្តបន្ទាប់មកនៅក្រោម ៥ម៉ឺននាក់ប៉ុណ្ណោះ នៅក្នុងរយៈពេលប៉ុន្មានថ្ងៃចុងក្រោយនេះ។

លោក ហង្ស ពុទ្ធា អ្នកនាំពាក្យ គ.ជ.ប. ធ្លាប់ប្រាប់វីអូឌីថា លោកមិនរំពឹងថា ប្រជាពលរដ្ឋគ្រប់អាយុបោះឆ្នោត នឹងទៅចុះឈ្មោះបោះឆ្នោតមួយរយភាគរយនោះឡើយ ដោយលោកថា ដោយសារតែប្រជាពលរដ្ឋខ្មែរនៅឯក្រៅប្រទេស មិនបានទៅចុះឈ្មោះបោះឆ្នោត៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ