កូរ៉េខាងត្បូងនិងជប៉ុនបានចុះហត្ថលេខាលើកិច្ចព្រមព្រៀងចារកម្មយោធាមួយនៅថ្ងៃនេះ ដើម្បីចែករំលែកព័ត៌មានរស៊ើបអំពីការគំរាមកំហែងបង្កឡើងដោយសកម្មភាពនុយក្លេអ៊ែរ និងគ្រាប់មីស៊ីលរបស់កូរ៉េខាងជើង។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters ដែលបានដកស្រង់សេចក្ដីប្រកាសរបស់ក្រសួងការពារជាតិកូរ៉េខាងត្បូង។
រដ្ឋាភិបាលកូរ៉េខាងត្បូង បានសម្រេចកិច្ចព្រមព្រៀងនេះឡើង បើទោះបីជាមានការជំទាស់ពីគណបក្សនយោបាយនានា និងពីមហាជនក៏ដោយ។ សម្រាប់ជនជាតិកូរ៉េខាងត្បូង ពួកគេនៅតែចងកំហឹងនឹងសកម្មភាពរបស់ជប៉ុននៅអំឡុងរបបអាណានិគមជប៉ុនចាប់ពីឆ្នាំ១៩១០ ដល់ចុងបញ្ចប់នៃសង្គ្រាមលោកលើកទី២។
ការចុះហត្ថលេខាលើកិច្ចព្រមព្រៀងសន្តិសុខទូទៅនៃព័ត៌មានយោធា ដំបូងឡើយ ត្រូវបានគេរំពឹងថានឹងធ្វើឡើងនៅឆ្នាំ២០១២ ប៉ុន្តែ កូរ៉េខាងត្បូងបានពន្យារទៅវិញ ដោយសារតែមានការជំទាស់នៅក្នុងប្រទេស។
ទោះជាយ៉ាងណា ករណីនេះកាន់តែចាំបាច់ ដោយសារតែកូរ៉េខាងជើងបានសាកល្បងគ្រាប់មីស៊ីលជាច្រើនប្រភេទ ហើយថែមទាំងប្រកាសថា ខ្លួនមានសមត្ថភាពបំពាក់ក្បាលគ្រាប់នុយក្លេអ៊ែរលើមីស៊ីលទៀតផង៕