គ.ជ.ប ប្រកាសរក្សាទុកអ្នកដែលគេសង្ស័យថា ជាជនជាតិវៀតណាមស្ទើរទាំងអស់ក្នុងបញ្ជីបោះឆ្នោតដំបូងដដែល ខណៈគណបក្សប្រឆាំងប្តឹងចោទថា អ្នកទាំងនោះជាជនជាតិវៀតណាមប្រើប្រាស់ឯកសារមិនស្របច្បាប់ ដើម្បីបានបោះឆ្នោតជ្រើសរើសមេដឹកនាំជំនួសខ្មែរ។
មន្ត្រីរបស់គណបក្សសង្គ្រោះជាតិអះអាងថាគិតត្រឹមថ្ងៃទី២០ ខែមករា ពួកគេបានប្តឹងជំទាស់ទៅ គ.ជ.ប ឲ្យលុបឈ្មោះជនជាតិវៀតណាមប្រមាណជាង២ពាន់នាក់ចេញពីបញ្ជីបោះឆ្នោតវិញ ដោយអះអាងថាអ្នកទាំងនោះប្រើអត្តសញ្ញាណប័ណ្ណសញ្ជាតិខ្មែរទៅចុះឈ្មោះបោះឆ្នោតមិនបានបំពេញលក្ខខណ្ឌចូលសញ្ជាតិខ្មែរត្រឹមត្រូវ។
ប៉ុន្តែសម្រាប់អ្នកនាំពាក្យ គ.ជ.ប លោក ហង្ស ពុទ្ធា វិញឲ្យVODដឹងថា ការដោះស្រាយបណ្តឹងមានរយៈពេល៨ថ្ងៃមកនេះ គ.ជ.ប សម្រេចរក្សាទុកឈ្មោះចុងចម្លើយជាង២ពាន់នាក់ ក្នុងបញ្ជីបោះឆ្នោតដំបូងដដែល ដោយថា អ្នកទាំងនោះមានអត្តសញ្ញាណប័ណ្ណគំរូថ្មីមានលក្ខខណ្ឌគ្រប់គ្រាន់ស្របតាមច្បាប់។
លោកថា៖ «បើគិតជាករណីមាន១៤២ករណី។ ហើយបើគិតជាមនុស្សដែលពាក់ព័ន្ធនឹងគេចោទថាជាយួនជាអីហ្នឹងគឺ២៥០០នាក់ជាង ដែល គ.ជ.ប រក្សាទុកនៅក្នុងបញ្ជីដដែល»។
ប៉ុន្តែប្រធាននាយកដ្ឋានកិច្ចការបោះឆ្នោតនិងនីតិកម្មនៃគណបក្សសង្រ្គោះជាតិ លោក ស្រី ម៉េង សុភារី បានច្រានចោលការសម្រេចរបស់ គ.ជ.ប នេះដោយថា គណបក្សនេះបានដាក់ពាក្យបណ្តឹងដោយឲ្យស្នើឲ្យ គ.ជ.ប ពិនិត្យពីភាពត្រឹមត្រូវនៃការចូលសញ្ជាតិខ្មែរ ពោលមិនមែនប្តឹងពីរឿងប្រើប្រាស់ប្រភេទនៃអត្តសញ្ញាណប័ណ្ណទេ។
លោកស្រីថា៖ «វិវាទនេះមិនមែនវិវាទរឿងអត្តសញ្ញាណប័ណ្ណរវាងពលរដ្ឋខ្មែរនិងពលរដ្ឋខ្មែរ អ្នកហ្នឹងមានឯកសារមានអត្តសញ្ញាណប័ណ្ណឬក៏អត់ទេ។ ប៉ុន្តែវិវាទទាក់ទងនឹងលក្ខខណ្ឌសញ្ជាតិ។ ដូចនេះការផ្តល់អត្តសញ្ញាណប័ណ្ណទៅឲ្យជនបរទេសរូបណា ត្រូវឆ្លងកាត់នីតិវិធីសញ្ញាតិ។ ហើយបើអត់បានឆ្លងកាត់នីតិវិធីស្តីពីសញ្ជាតិទេ ឯកសារហ្នឹងក៏វាអត់ស្របតាមច្បាប់ដែរ។ បើវាអត់ស្របតាមច្បាប់ វាក៏គ្មានតម្លៃគតិយុទ្ធក្នុងការយកទៅប្រើប្រាស់ដូចជាការយកមកចុះឈ្មោះ ចុះស្អីផ្សេងៗទៀតបានដែរ»។
បើតាមលោកស្រី ម៉េង សុភារី គណបក្សសង្រ្គោះជាតិកំពុងរៀបចំឯកសារប្តឹងសារទុក្ខទៅក្រុមប្រឹក្សាធម្មនុញ្ញ។
សមាជិកសម្ព័ន្ធកំណែទម្រង់ការបោះឆ្នោតឆ្នោត លោក យង់ គិមអេង លើកឡើងថា គ.ជ.ប គួរតែសហការជាមួយក្រសួងមហាផ្ទៃលាងជម្រះមន្ទិលសង្ស័យពីបញ្ហាវត្តមានជនបរទេសមិនស្របច្បាប់ទៅបោះឆ្នោតជ្រើសរើសមេដឹកនាំជំនួសខ្មែរពីពេលនេះ ដើម្បីផ្តល់ជំនឿដល់មហាជនទូទៅ ជាជាងគេចយករួចខ្លួន ហើយទុកបញ្ហានេះឲ្យនៅបន្តកើតមានក្នុងសង្គមខ្មែរ។
លោកថា៖ «រឿងដែលសំខាន់ដែលខ្ញុំគិតថា ត្រូវតែដោះស្រាយឲ្យបានឆាប់រហ័ស កុំឲ្យមានរឿងបញ្ហាសញ្ជាតិ ឯកសារគួរតែជម្រះឲ្យអស់ទៅ កុំឲ្យវាមានមន្ទិលសៅម៉ងរឿងអស់ហ្នឹងទៀតបាទ។ ព្រោះដំណើរការរដ្ឋបាលខ្មែរហ្នឹងមិនមែនទើបនឹងកើតឡើងមួយឆ្នាំពីរឆ្នាំឯណា? កើតឡើងយូរហើយ អញ្ចឹងហើយបញ្ហាហ្នឹងគួរតែត្រូវបានដោះស្រាយ ហើយក៏គួរតែត្រូវបានបញ្ចប់ដែរ ដើម្បីបង្ហាញពីការទុកចិត្តគ្នាកាន់តែរឹងមាំទៀត សម្រាប់ការបោះឆ្នោតនេះ កុំឲ្យមានការចោទប្រកាន់គ្នាទៅវិញទៅមក អាហ្នឹងដែលធ្វើឲ្យមានបញ្ហាចម្រូងចម្រាសសម្រាប់ប្រជាជាតិខ្មែរនោះ»។
តាមប្រតិទិន គ.ជ.ប នឹងបិទបញ្ជាប់ការដោះស្រាយបណ្តឹងរបស់គណបក្សនយោបាយនៅថ្ងៃទី២៧សប្តាហ៍នេះ ដើម្បីទុកពេលឲ្យភាគីពាក់ព័ន្ធប្តឹងទៅក្រុមប្រឹក្សាធម្មនុញ្ញ។ ចំណែកក្រុមប្រឹក្សាធម្មនុញ្ញមានរយៈពេល១០ថ្ងៃសម្រាប់ដោះស្រាយបណ្តឹងសាទុក្ខ។លុះដល់ថ្ងៃទី១២ខែកុម្ភៈ គ.ជ.ប នឹងផ្តល់សុពលភាពបញ្ជីបោះឆ្នោតថ្មី៕