ធនាគារពិភពលោកបានសន្យាបន្ដគាំទ្រការអភិវឌ្ឍប្រទេសភូមាតាមរយៈការផ្ដល់ប្រាក់ជំនួយនិងប្រាក់កម្ចីសំដៅឲ្យប្រទេសអតីតរបបយោធាមួយនេះកាត់បន្ថយភាពក្រីក្ររបស់ប្រជាជន។
តាមកាសែតភូមា Irrawaddy ការថ្លែងអះអាងរបស់ធនាគារពិភពលោកបានធ្វើឡើងនៅក្នុងជំនួបមួយកាលពីថ្ងៃចន្ទរវាងអនុប្រធានធនាគារប្រចាំតំបន់អាស៊ីខាងកើតនិងប៉ាស៊ីភិចលោក Axel Van Trotenburg និងលោកស្រី អ៊ុង សានស៊ូជី មេដឹកនាំគណបក្សដែលឈ្នះឆ្នោត ហើយគេរំពឹងថានឹងដឹកនាំរដ្ឋាភិបាលភូមាខាងមុខនេះ។
នៅក្នុងសេចក្ដីថ្លែងការណ៍របស់ធនាគារពិភពលោក លោកអនុប្រធានធនាគារនេះបានធានាអះអាងថាស្ថាប័ន ហិរញ្ញវត្ថុរបស់លោកគឺជាដៃគូដ៏ធំបំផុតរបស់ប្រទេសភូមាដែលសំដៅជួយអភិវឌ្ឍសេដ្ឋកិច្ចប្រទេស កាត់បន្ថយភាពក្រីក្រ និងជំរុញឲ្យមានកំណើនសេដ្ឋកិច្ច។
ធនាគារពិភពលោកបានសំរេចភ្ជាប់ជំនួយនិងផ្ដល់ប្រាក់កម្ចីរបស់ខ្លួនឡើងវិញនៅឆ្នាំ២០១២នៅពេលដែលប្រទេសភូមាបានសំរេចធ្វើការកែទម្រង់ការគ្រប់គ្រងប្រទេសឲ្យមានការដឹកនាំឡើងវិញដោយរដ្ឋាភិបាលស៊ីវិលនិងរដ្ឋាភិបាលកើតចេញពីការបោះឆ្នោត។ ធនាគារពិភពលោកគឺជាដៃគូសហប្រតិបត្តិការសេដ្ឋកិច្ចដ៏សកម្មមួយក្នុងចំណោមប្រទេសជាច្រើនទៀតសំរេចដាក់វិនិយោគទុននៅប្រទេសភូមាគឺក្រោយពីប្រទេសនេះសំរេចបោះបង់របបយោធានិយម។
ចាប់តាំងពីឆ្នាំ២០១២មកសេដ្ឋកិច្ចប្រទេសភូមាមានកំណើន៧%ដែលធនាគារពិភពលោកបានហៅសន្ទុះកំលាំងសេដ្ឋកិច្ចភូមាខ្លាំងបំផុតនៅអាស៊ីខាងកើតនិងអាស៊ីអាគ្នេយ៌៕
ប្រភព: Irrawaddy