អង្គការនិងសហគមន៍ជាង៦០ស្ថាប័នបានចេញសេចក្តីថ្លែងការណ៍រួមមួយ ថ្កោលទោសការការសម្រេចរបស់តុលាការរាជធានីភ្នំពេញដែលបានផ្តន្ទាទោសអ្នកស្រី ទេព វន្នី សកម្មជនបឹងកក់ឲ្យជាប់ពន្ទនាគារនោះ ថាជារឿងអយុត្តិធម៌។
អ្នកស្រី ទេព វន្នី ត្រូវបានតុលាការកាត់ទោសនៅថ្ងៃទី២៣ខែនេះ ដាក់ពន្ធនាគារ២ឆ្នាំកន្លះ និងពិន័យជាប្រាក់ ចំនួន៥លានរៀលចូលរដ្ឋ ព្រមទាំងបង្គាប់ឲ្យសងសំណងជំងឺចិត្តចំនួន៩លានរៀលទៅភាគីដើមបណ្តឹងដែលតុលាការថាជនរងគ្រោះ ពាក់ព័ន្ធការប្រើអំពើហិង្សាលើសន្តិសុខខណ្ឌដូនពេញពីរនាក់។
ក្នុងសេចក្តីថ្លែងការណ៍រួមនៅថ្ងៃដដែលនោះ សហគមន៍និងអង្គការសង្គមស៊ីវិលចំនួន៦១ស្ថាប័នបានសម្តែងនូវការសោកស្តាយចំពោះចំណាត់ការរបស់តុលាការរាជធានីភ្នំពេញទៅលើអ្នកស្រី ទេព វន្នី នេះដោយថា អ្នកស្រីត្រូវបានតុលាការកាត់ទោសដោយអយុត្តិធម៌បំផុត។ ក្នុងសេចក្តីថ្លែងការណ៍នោះបានឲ្យដឹងថា ក្នុងការជំនុំជម្រះនោះតុលាការ គ្មានភស្ភុតាងដាក់បន្ទុក សាក្សី ឬមានអ្វីមកបញ្ជាក់ថាអ្នកស្រីបានប្រើហិង្សាទៅលើសន្តិសុខទេ តែចៅក្រម ឡុង កេសភារម្យ បានសម្រេចឲ្យអ្នកស្រី ទេព វន្នី ជាប់ពន្ធនាគារ ដោយគ្រាន់តែស្តាប់ការអានកំណត់ហេតុរបស់ក្រឡាបញ្ជីប៉ុណ្ណោះ។
មន្ត្រីនាំពាក្យសមាគមអាដហុកលោក សំ ចាន់គា យល់ថាការសម្រេចឲ្យអ្នកស្រី ទេព វន្នី ជាប់ពន្ធនាគារនេះគឺជាការសម្រចដោយស្ថិតក្រោមឥទ្ធិពលនយោបាយ និងថាហិង្សានៅមុខតុលាការកាលពីម្សិលមិញនោះហើយវាបានបញ្ជាក់កាន់តែច្បាស់ថារាល់ហិង្សាដែលប៉ះទង្គិចគ្នានោះវាកើតឡើងដោយកម្លាំងអាជ្ញាធរទៅវិញទេ។
លោកថា៖ «តើអ្នកដែលជាស្ត្រីដៃទទេ ទៅប្រើហិង្សាយ៉ាងម៉េចទៅលើបុរសដែលមានអាវុធនៅហ្នឹងដៃ វាអត់ដែលមាននៅលើពិភពលោកនេះវាមានអ្នកណាដែលជាស្ត្រីដៃទទេរទៅប្រើហិង្សាទៅលើបុរសដែលមានអាវុធ ហើយអំពើហិង្សានៅមុខតុលាការនវហើយជាភស្ភុតាងបង្ហាញថា មានតែសន្តិសុខទេដែលមានប្រើហិង្សាមកលើស្ត្រី មិនមែនស្ត្រីទេ ស្ត្រីទាំងអស់នោះមិនអាចប្រើហិង្សទៅលើសន្តិសុខឡើយ អញ្ចឹងតុលាការលោកមិនមែនថាលោកមិនដឹងទេតែលោកមិនហ៊ានប្រើឆន្ទានុសិទ្ធិរបស់ខ្លួន»។
ខណៈដែលតុលាការសវនាការអ្នកស្រី ទេព វន្នី នោះ បែរជាសន្តិសុខខណ្ឌ៧មករាបានប្រើហិង្សាទៅលើអ្នកគាំទ្រអ្នកស្រី ទេព វន្នី នៅក្រៅតុលាការបណ្តាលឲ្យមនុស្សមួយចំនួនរងរបួស ហើយក្រុមសន្តិសុខនោះ បានព្រួតគ្នាដេញវាយបុរសម្នាក់ទៀតរហូតក្នុងផ្សារស៊ីធីម៉ល។
អ្នកនាំពាក្យក្រសួងយុត្តិធម៌លោក ជិន ម៉ាលីន ថ្លែងថាការចោទប្រកាន់ទៅលើវិស័យយុត្តិធម៌នេះជារឿងដដែលៗដោយថាអង្គការសង្គមស៊ីវិលនិងសហគមន៍ទាំងនោះ មានផលប្រយោជន៍ទៅវិញទៅមកជាមួយជនជាប់ចោទ។ លោកថាការសម្រេចក្តីរបស់តុលាការគឺធ្វើតាមបច្ចេកទេសនិងនីតិវិធីរបស់ខ្លួន ហើយចំពោះការលើកឡើងថាមិនមានភស្ភុតាងអ្វីច្បាស់លាស់នោះ លោកជម្រុញឲ្យអ្នកពាក់ព័ន្ធប្តឹងទៅកាន់តុលាការជាន់ខ្ពស់បន្តទៀតដើម្បីឲ្យប្រាកដពីយុត្តិធម៌។
លោកថា៖ «ក្នុងដំណើរការស៊ើបអង្កេតរឿងហ្នឹងពីដើមមក មិនមែនសំណុំគឺកើតឡើងបានដោយការចាប់ផ្តើមអានពេលនេះឯណា! សំណុំរឿងនេះចាប់ផ្តើមឡើងដោយការស៊ើបអង្កេតរបស់នគរបាយយុត្តិធម៌ រហូតមានការចោទប្រកាន់របស់ព្រះរាជអាជ្ញាទៅតាមអង្គហេតុ និងអង្គច្បាប់ ហើយមានការស៊ើបសួរបន្ថែមរបស់ចៅក្រមស៊ើបសួរ អញ្ចឹងទេការដែលអានរបាយកាណ៍នេះមិនមែនជាមួលដ្ឋានតែមួយទេ តែវាផ្អែកទៅលើការរកឃើញភស្ភុតាង និងរបកគំហើញដែលរកឃើញដោយនគរបាលយុត្តិធម៌ ព្រះរាជអាជ្ញា ក៏ដូចជាចៅក្រមស៊ើបសួរកន្លងមកដែរ»។
តាមសេចក្តីថ្លែងការណ៍នោះ ការកាត់ទោសកាលពីម្សិលមិញនោះជាសំណុំរឿងមួយក្នុងចំណោមសំណុំរឿងបីរបស់អ្នកស្រី ទេព វន្នី ដែលត្រូវបានតុលាការសើរើជាថ្មី នៅខែសីហា ឆ្នាំ២០១៦ អំឡុងពេលដែលអ្នកស្រីត្រូវបានឃុំខ្លួនរង់ចាំដំណើរការសវនាការ ពាក់ព័ន្ធនឹងការតវ៉ាក្នុងយុទ្ធនាការថ្ងៃច័ន្ទព័ណ៌ខ្មៅ។
ស្រ្តីសកម្មជនដីធ្លីរូបនេះត្រូវបានអាជ្ញាធរចាប់បញ្ជូនទៅឲ្យតុលាការកាត់ទោស៣ដងរួចហើយ៕
