លោកនាយករដ្ឋមន្ដ្រីហ៊ុន សែន បានអំពាវអោយពលរដ្ឋចូលរួមចលនាប្រឡងប្រណាំងទីក្រុងស្អាតដោយថា ដើម្បីអោយកម្ពុជាក្លាយជាគោលដៅទេសចរណ៍បៃតង សម្រាប់ទាក់ទាញភ្ញៀវទេសចរណ៍ជាតិ និងអន្ដរជាតិ។
សារលិខិតចុះថ្ងៃទី៦ខែកុម្ភៈ សម្រាប់ឱកាសទិវាជាតិទីក្រុងស្អាត និងពិធីប្រកាសជ័យលាភីទីក្រុងស្អាតសម្រាប់ឆ្នាំ២០១៨ ២០២១ លោកនាយករដ្ឋមន្ដ្រីហ៊ុន សែន លើកឡើងថា ទីក្រុងស្អាត ជាគោលដៅទេសចរណ៍ទាក់ទាញដោយមានគុណភាព និងភាពកក់ក្ដៅ ព្រមទាំងជាស្ពានចម្លងវប្បធម៌ជួបគ្នា ផ្ដល់ចំណេះដឹង ផ្លាស់ប្ដូរគំនិត ព័ត៌មាន រវាងប្រជាជននិងប្រជាជនផងដែរ។
លោកនាយករដ្ឋមន្ត្រីក៏បានជំរុញអោយស្ថាប័នពាក់ព័ន្ធ ដៃគូរអភិវឌ្ឍន៍ និងប្រជាពលរដ្ឋ ចូលរួមចលនាប្រលងប្រណាំងទីក្រុងស្អាត ដើម្បីអោយទីក្រុងមានភាពរស់រវើក និងបៃតង សម្រាប់ទាកទាញភ្ញៀវទេសចរណ៍ជាតិនិងអន្ដរជាតិ ក្រោមពាក្យថា« ទីក្រុងស្អាតផ្ដើមចេញពីយើងទាំងអស់គ្នា»។
កាលពីថ្ងៃទី២៦ខែមករាឆ្នាំ២០១៨ គណៈកម្មការវាយតម្លៃទីក្រុងស្អាតសម្រាប់ទេសចរណ៍អាស៊ាន បានជ្រើសរើសទីក្រុងចំនួន៣របស់កម្ពុជា ផ្តល់រង្វាន់ជ័យលាភីឆ្នាំ២០១៨ ដល់២០២១។ទីក្រុងបីនោះរួមមាន ក្រុងសៀមរាប កែប និងក្រុងបាត់ដំបង។ការវាយតម្លៃនោះគណៈកម្មការបានជួបប្រជុំគ្នានៅក្នុងទីក្រុងឈាង ម៉ៃ ប្រទេសថៃ៕