សព្វថ្ងៃនេះមានប្រជាពលរដ្ឋខ្លះនៅមិនទាន់ដឹងពីបែបបទនៃការស្នើសុំធ្វើប័ណ្ណកម្មសិទ្ធិអចលនទ្រព្យនិងរបៀបនៃការផ្ទេរមរតកនៅឡើយទេ។
ប្រជាពលរដ្ឋនៅរាជធានីភ្នំពេញមួយចំនួនដែលបានសម្ភាសន៍ ពួកគេបានលើកឡើងពីរបៀបនៃការស្នើសុំធ្វើប័ណ្ណកម្មសិទ្ធិដីធ្លីនិងការផ្ទេរមរតកនោះ។
ប្រជាពលរដ្ឋនៅខណ្ឌទួលគោក រាជធានីភ្នំពេញ លោក សុខ រិទ្ធី បានរៀបរាប់ប្រាប់អ្នកយកព័ត៌មានVODនៅមន្ទីររៀបចំដែនដីនគររូបនីយកម្ម សំណង់ និងសុរិយោដីរាជធានីភ្នំពេញថាក្រោយពីលោកបានទិញផ្ទះពីអ្នកជិតខាងលោកបានមកស្នើសុំផ្ទេរកម្មសិទ្ធិពីមន្ទីរសុរិយោដីដាក់ឈ្មោះលោក(ដីមានប្លង់រឹង)។ ប៉ុន្តែលោកថានីតិវិធីនៃការផ្ទេរកម្មសិទ្ធីដីធ្លីពីអ្នកលក់ទៅអ្នកទិញមានភាពងាយស្រួលជាងមុនដោយលោកអះអាងថាចាប់ពីមន្ត្រីសង្កាត់ ខណ្ឌ ដល់មន្ត្រីនៅមន្ទីរសុរិយោដីបានបង្កភាពងាយស្រួលក្នុងការជួយផ្តល់ព័ត៌មាននិងឯកសារជូនគាត់ក្នុងការរៀបចំឯកសារបង់ពន្ធជូនរដ្ឋ។ លោកបន្តថា៖ “ឯកសារយើងមកមន្ទីរសុរិយោដីក្រុងទៅគេមានទំរង់បែបបទរបស់គេពេលដែលយើងមកទៅនេះជាឯកសាររបស់ដែលគេបញ្ឈឲ្យយើង យើងត្រូវការបំពេញហ្វម(form)ណាឬក៏យើងចង់យក ទិញ ឬក៏ទិញផ្តាច់ ឬក៏បំពេញបង់ពន្ធប្រថាប់ត្រា ឬក៏ធ្វើអ្វីផ្សេងៗទៀតយើងមានទំរង់ទំាងអស់ ហើយយើងបំពេញទៅ យើងដាក់ទៅខាងរដ្ឋបាល one window Service ដាក់ចូលកន្លែងហ្នឹងទៅ ហើយគេបំពេញទំរង់ឲ្យយើង ហើយយើងចូលទៅបង់លុយខាងនេះទៅ(បង់នៅក្នុង one window Service)”។
នៅពេលសួរថា តើការស្នើសុំផ្ទេរកម្មសិទ្ធិអចលនទ្រព្យនេះត្រូវចំណាយប្រាក់ប៉ុន្មាន? លោករិទ្ធីថាលោកត្រូវបង់ពន្ធជូនរដ្ឋគឺថ្លៃប្រថាប់ត្រា៤ភាគរយនៃតម្លៃដីសរុប។
ចំណែកអ្នកមានជម្លោះដីធ្លីនៅតំបន់បឹងកក់ដែលស្នើសុំផ្ទេរមរតកពីឪពុកម្តាយមកកូនឯណោះវិញអ្នកស្រី បូវ សោភា បានរៀបរាប់ថាការផ្តល់សេវារបស់រដ្ឋមានភាពល្អប្រសើរជាងមុនដោយអ្នកស្រីថាការបំពេញបែបបទផ្សេងៗចាប់ពីសង្កាត់ដល់មន្ទីរសុរិយោដីមិនត្រូវបានចំណាយថវិកាក្រៅផ្លូវការឬត្រូវបានមន្ត្រីទារលុយពីគាត់នោះទេ។ អ្នកស្រីបន្តថា៖ ”និយាយរួមទៅរហូតមកដល់ថ្ងៃនេះមិនទាន់មានខាងសុរិយោដីទាមទារបង់ថ្លៃសេវាពីគាត់ស្អីផងអត់ទាន់មានទេដោយសារខ្ញុំទើបធ្វើឯកសារហើយខ្ញុំត្រូវយកទៅសង្កាត់តែជាធម្មតាយើងដឹងស្រាប់ហើយថាកាលដែលយើង ទឹកចិត្តដែលយើងជាអ្នកធ្វើឲ្យគាត់នេះជាទឹកចិត្តរបស់យើងមិនសំខាន់គាត់ទារយើងសូម្បីតែនៅខណ្ឌក៏ដោយនៅសុរិយោដីនៅខណ្ឌក៏ដោយនៅកន្លែងណាក៏ដោយ សំខាន់យើងជាអ្នកដែលទៅធ្វើ យើងមានទឹកចិត្តឲ្យទៅខាងពួកគាត់ឬមួយក៏អត់តែប៉ុណ្ណោះនេះមិនមែនពួកគាត់ទាមទារយើងទេ”។
មន្ត្រីនៅមន្ទីររៀបចំដែនដីនគររូបនីយកម្មសំណង់រាជធានីភ្នំពេញបានប្រាប់អ្នកយកព័ត៌មានVODថាចំពោះអ្នកផ្ទេរមរតកពីឪពុកម្តាយមកកូនក្នុងមួយប្លង់ដីត្រូវបង់សេវា៦០ម៉ឺនរៀល។ ចំណែកការបង់ពន្ធជូនរដ្ឋ៤ភាគរយមិនបាច់បង់នោះទេ។ ដោយឡែកសម្រាប់ប្តីឬប្រពន្ធដែលរៀបការជាមួយអ្នកដែលទទួលបានមរតកពីឪពុកម្តាយខាងប្រពន្ធឬប្តីពោលហៅថាកូនប្រសារនោះត្រូវបង់ពន្ធជូនរដ្ឋពាក់កណ្តាលនៃ៤ភាគរយក្នុងតម្លៃដីសរុប។
ប៉ុន្តែបើតាមការសាកសួរព័ត៌មានពីមន្ត្រីសង្កាត់ ខណ្ឌ មួយចំនួនឲ្យដឹងថាការធ្វើសុំធ្វើប័ណ្ណកម្មសិទ្ធិដីធ្លី ការសុំផ្ទេរកម្មសិទ្ធិពីអ្នកលក់ទៅឲ្យអ្នកទិញ និងផ្ទេរមរតកពីឪពុកម្តាយទៅកូនត្រូវចំណាយសេវាអ្នករត់ការក្រៅផ្លូវការចន្លោះពី៣០០ដុល្លារទៅ៧០០ដុល្លារ។
អ្នកនាំពាក្យក្រសួងដែនដីនគររូបនីយកម្ម សំណង់ រាជធានីភ្នំពេញ លោក ឡៅ ទិព្វសីហា សុំមិនអត្ថាធិប្បាយជុំវិញការស្នើសុំធ្វើប័ណ្ណកម្មសិទ្ធិអចលនទ្រព្យនិងរបៀបនៃការផ្ទេរមរតកនេះទេ ដោយលោកអះអាងថាក្រសួងបានធ្វើប្រតិភូមិកម្មអំណាចទៅឲ្យមន្ទីររួចហើយ។ VODមិនអាចសុំការពន្យល់ពីប្រធានមន្ទីររៀបចំដែនដីនគររូបនីយកម្ម សំណង់ និងសុរិយោដីរាជធានីភ្នំពេញលោក សារិន វណ្ណា បានទេ។
មេធាវីលោក សំ សុគង់ បានពន្យល់ពីរបៀបនៃការស្នើសុំធ្វើប័ណ្ណកម្មសិទ្ធិតាមនីតិវិធីច្បាប់ថា ការផ្ទេរកម្មសិទ្ធិលើអចលនទ្រព្យនិងផ្ទេរមរតកពីឪពុកម្តាយទៅកូននោះមានពីករណី។ ករណីទី១ ការស្នើសុំធ្វើប័ណ្ណដាច់ដោយឡែកឬដាច់ដោយដុំគឺម្ចាស់ដីស្នើសុំធ្វើដោយខ្លួនឯង និងករណីទី២ ការសុំធ្វើប័ណ្ណកម្មសិទ្ធិជាប្រព័ន្ធដែលអាជ្ញាធរដែនដីជាអ្នកចុះធ្វើឲ្យក្នុងមួយភូមិ/ឃុំជាដើម។
លោក សំ សុគង់ បញ្ជាក់ថារបៀបនៃការធ្វើប័ណ្ណកាន់កាប់អចលនទ្រព្យឬហៅថាធ្វើប្លង់កម្មសិទ្ធិប្រជាពលរដ្ឋម្ចាស់ដីនោះត្រូវភ្ជាប់ឯកសារមួយចំនួនដូចជា អត្តសញ្ញាណប័ណ្ណ សំបុត្របញ្ជាក់កំណើត សំបុត្រអាពាហ៍ពិពាហ៍ សៀវភៅគ្រួសារ និងឯកសារមួយចំនួនទៀតយកទៅបង្ហាញអាជ្ញាធរមូលដ្ឋាន។ លោកបន្ថែមថា៖ ”អាជ្ញាធរមូលដ្ឋានភូមិ ឃុំ គាត់ជាអាជ្ញាធរដែនដីនៅជិតប្រជាពលរដ្ឋក៏ដូចជានៅជិតដីដែលគាត់ស្នើសុំធ្វើប័ណ្ណដើម្បីបញ្ជាក់ឲ្យបានច្បាស់ពីអាជ្ញាធរថ្នាក់ក្រោមហើយបានទៅថ្នាក់លើទៅងាយស្រួលក្នុងការធ្វើប័ណ្ណកម្មសិទ្ធិជូនទៅប្រជាពលរដ្ឋ”។
ថ្មីៗនេះលោកនាយករដ្ឋមន្ត្រី ហ៊ុន សែន បានបញ្ជាទៅមន្ត្រីក្រសួងដែនដីនគររូបនីយកម្ម សំណង់ និងស្ថាប័នពាក់ព័ន្ធទំាងអស់ត្រូវបំរើប្រជាពលរដ្ឋក្នុងការផ្ទេរមរតកពីឪពុកម្តាយមកកូន។ លោកបញ្ជាក់ថាការផ្ទេរមរតកនេះមិនតម្រូវឲ្យបង់ពន្ធចូលរដ្ឋ៤ភាគរយនៃតម្លៃដីសរុបដូចពីមុនទៀតទេ៕