ប្រទេសចំនួន១៤ នៅថ្ងៃព្រហស្បតិ៍ម្សិលមិញបានជំរុញឲ្យ Venezuela រៀបចំការបោះឆ្នោតនិងដោះលែងអ្នកទោសនយោបាយជាបន្ទាន់ ដោយព្រមានថា បើមិនដូច្នេះទេ នឹងព្យួរការទំនាក់ទំនងការទូតជាមសម្ព័ន្ធប្រទេសនៅអាមេរិកខាងត្បូង។
នៅក្នុងសេចក្តីថ្លែងការណ៍រួមរបស់ប្រទេសទាំង១៤នោះ រដ្ឋមន្ត្រីការបរទេសរបស់ម៉ិចស៊ិក លោក Luis Videgaray ថ្លែងថា ពួកគេមានគោលបំណងឲ្យ Venezuela រៀបចំពង្រឹងលទ្ធិប្រជាធិបតេយ្យឡើងវិញ ដោយអំពាវនាវឲ្យមានការពិភាក្សានិងចរចា ដោះស្រាយវិបត្តិក្នុងចំណោមប្រទេសនាំប្រេងចេញ ដែលកំពុងជួបបញ្ហាប្រឈមក្នុងការផ្គត់ផ្គង់អាហារ និង ប្រេងឥន្ទនៈធ្ងន់ធ្ងរ។ នេះបើតាមទីភ្នាក់ងារសារព័ត៌មានរ៉យទ័រ។
ប្រទេសទាំងនោះបញ្ជាក់ថា ការព្យួរទំនាក់ទំនងប្រទេស Venezuela ជាមួយសម្ព័ន្ធសហរដ្ឋអាមេរិកគឺជាជម្រើសចុងក្រោយ ក្នុងនោះពួកគេថា ការចេញសេចក្តីថ្លែងការណ៍នេះគឺដើម្បីជៀសវាងកុំឲ្យបាត់បង់ទំនាក់ទំនងការទូត។
Venezuela បច្ចុប្បន្នកំពុងចាប់អ្នកដែលប្រឆាំងរដ្ឋាភិបាលប្រមាណ១០០នាក់ដាក់ពន្ធនាគារ ដោយចោទថា បានបង្កហិង្សា និង មានគម្រោងផ្តួលរំលំរដ្ឋាភិបាលរបស់លោកប្រធានាធិបតី Nicolas Maduro។ ប៉ុន្តែអ្នកឃ្លាំមើលសិទ្ធិមនុស្សបញ្ជាក់ថា អ្នកជាប់ឃុំទាំងនោះគឺជា អ្នកទោសមនសិការ៕
