តំណាងរាស្ត្របក្សប្រឆាំងមួយរូបគឺលោក អេង ឆៃអ៊ាង បានរិះគន់ចំៗទៅលើប្រធានអង្គភាពប្រឆាំងអំពើពុករលួយលោក ឱម យ៉ិនទៀងថា ការចុះឃាត់ខ្លួនមេឃុំម្នាក់ នៅស្រុកកំពង់សៀម ខេត្តកំពង់ចាម លោកថាយន្តការចាប់ឃាត់ខ្លួននោះ មិនខុសពីរបបខ្មែរក្រហម។
តំណាងរាស្ត្រគណបក្សសង្គ្រោះជាតិ លោក អេង ឆៃអ៊ាង បានសរសេរនៅលើហ្វេសប៊ុករបស់លោកនាថ្ងៃទី២៤ ខែមេសានេះថា នៅវេលាម៉ោង ១០:៣០ នាទី ព្រឹកមិញនេះ អង្គភាពប្រឆាំងអំពើពុករលួយ ដឹកនាំដោយលោក ឱម យ៉ិនទៀង បានទៅចាប់ខ្លួន លោក ស៊ាង ចែត មេឃុំស្រក មកពីគណបក្សសម រង្សុី នៅសាលាស្រុកកំពង់សៀម ខេត្តកំពង់ចាម យកមកភ្នំពេញ ដើម្បីសាកសួរពាក់ព័ន្ធនឹងលុយ ៥០០$ ដែលឈ្មោះខុម ចាន់តារាទី ហៅស្រីមុំ បានឆ្លើយដាក់។
លោក អេង ឆៃអ៊ាង សរសេរទៀតថា ការចាប់ខ្លួនមនុស្ស ដោយយោងតាមការឆ្លើយដាក់ពីមនុស្សម្នាក់បែបនេះ លោកថា មិនខុសពីរបបខ្មែរក្រហមឡើយ។
វីអូឌី(VOD)នៅមិនទាន់អាចរកប្រតិកម្មពីប្រធានអង្គភាពប្រឆាំងអំពើពុករលួយលោក ឳម យ៊ិនទៀង បានទេដោយលោកមិនលើកទូរស័ទ្ទ។
ប៉ុន្តែកាលពីថ្ងៃទី២៣ ខែមេសា ម្សិលមិញ ក្រសួងយុត្តិធម៌ បានអំពាវនាវឲ្យអាជ្ញាធរមានសមត្ថកិ ចាត់វិធានការ ដល់អ្នកពាក់ព័ន្ធមួយចំនួន ដែលក្រសួងចោទក្នុងនោះមានលោក ស៊ាង ចែត ផងដែលថា បានឃុបឃិតគ្នា ជំរុញឲ្យកញ្ញា ខុម ចាន់តារាទី ផ្តល់ចម្លើយមិនពិត ដល់សមត្ថកិច្ច ទាន់ទិននឹងសំនុំរឿងដែលគេចោទថា កញ្ញារូបនោះ មានទំនាក់ទំនងស្នេហាជាមួយអនុប្រធានគណបក្សសង្គ្រោះជាតិលោក កឹម សុខា។
សម្រាប់អ្នកតាមដានសង្គម និងអង្គការសង្គមស៊ីវិលមួយចំនួនវិញ អះអាងថា កញ្ញាខុម ចាន់តារាទី ហៅស្រីមុំ ត្រូវបានគេយកមកធ្វើជាឧបករណ៍ដើម្បីកេញចំណេញផ្នែកនយោបាយ ទាញទម្លាក់ប្រជាប្រិយភាពបក្សប្រឆាំង។
