ក្រុមយុវជនដែលស្រលាញ់បរិស្ថានអះអាងថា ពួកគេប្រមាណ២០០នាក់នឹងមានការប្រមូលផ្តុំគ្នាមើលតាមទូរស័ព្ទនូវរឿង «ខ្ញុំជាឈុត វុទ្ធី» នៅមុខព្រះបរមរាជវាំងដើម្បីរំលឹកដល់សកម្មជនព្រៃឈើដ៏ល្បីដែលត្រូវបានគេបាញ់សម្លាប់កាលពី៥ឆ្នាំមុន។
លោក ឈុត វុទ្ធី ត្រូវបានគេបាញ់សម្លាប់នៅតំបន់សាងសង់ទំនប់វារីអគ្គិសនីដោយក្រុមហ៊ុនចិន នៅក្នុងស្រុកមណ្ឌលសីមា ខេត្តកោះកុងកាលពីថ្ងៃទី២៦ មេសាឆ្នាំ២០១២។
ប្រធានបណ្តាញយុវជនកម្ពុជាលោក ទឹម ម៉ាឡៃ បានឲ្យវីអូឌីដឹងថាបណ្តាញយុវជនកម្ពុជា ជាមួយនឹងអង្គការសមាគមមួយចំនួនទៀតបានរៀបចំយុទ្ធនាការទាមទាររកយុត្តិធម៌ដល់ លោក ឈុត វុទ្ធី តាមរយៈការចូលរួមប្រមូលគ្នាបង្ហាញនូវសារផ្សេងៗពីការទាមទារចង់បានយុត្តិធម៌លើការស្លាប់ លោក វុទ្ធី ទាំងខាងក្រៅ និងខាងក្នុងបណ្តាញសង្គម។ លោកបន្ថែមថាយុទ្ធនាការនេះចាប់ផ្តើមពីថ្ងៃទី២១ និងបញ្ចប់ទៅវិញនៅថ្ងៃទី២៦ ដែលជាថ្ងៃខួបទី៥ឆ្នាំនៃការស្លាប់របស់លោក ឈុត វុទ្ធី។ លោកបានឲ្យដឹងថានៅថ្ងៃទី២៦ ដែលជាថ្ងៃចុងក្រោយនឹងមានមនុស្សប្រមាណជា២០០នាក់នឹងមកចូលរួមមើលរឿង ខ្ញុំជាឈុត វទ្ធី នៅមុខព្រះមរមរាជវាំងរាជធានីភ្នំពេញ ដើម្បីរំលឹកពីរវីរៈភាពរបស់លោក វុទ្ធី។
លោកថា៖ «នឹងមានការចេញនូវសេចក្តីប្រកាស ឬក៏លិខិតឬញាត្តិមួយដែរដើម្បីឲ្យមានការគាំទ្រនៅមុនថ្ងៃទី២៦។ នៅថ្ងៃទី២៥នេះនឹងមានការសុំការគាំទ្រពីអង្គការសង្គមស៊ីវិល ពីអ្នកពាក់ព័ន្ធអំពីដំណើរការឲ្យមានយុត្តិធម៌ចំពោះលោក ឈុត វុទ្ធី បន្តទៀតដែរ។ … តាមពិតទៅយើងមានយុទ្ធនាការផ្លាស់ប្តូររួបភាព(ហ្វេសបុក) ពីរបីថ្ងៃមកហើយ ដើម្បីឲ្យអ្នកដែលធ្វើការខាងបរិស្ថានធនធានធម្មជាតិ ឬអ្នកដែលចង់ឃើញសង្គមហ្នឹងបន្តបាននូវភាពយុត្តិធម៌តទៅទៀតក៏អាចចូលរួមតាមរយៈផ្លាស់ប្តូររួបភាពរបស់គាត់ផងដែរ»។
លោកបានបញ្ជាក់ថាលោកមិនបានដាក់លិខិតទៅកាន់សាលារាជធានីដើម្បីសុំការអនុញ្ញាត្តិពីការជួបជុំគ្នាមើលរឿងនេះនោះទេ ក៏ព្រោះតែការប្រមូលផ្តុំនេះគ្រាន់តែជាការចូលរួមបែបជាសាធារណជន នៅទីធ្លាសាធារណៈប៉ុណ្ណោះ។
អ្នកនាំពាក្យសាលារាជធានីភ្នំពេញលោក ម៉េត មាសភក្តី មានប្រសាសន៍ ថារាល់ការប្រមូលផ្តុំមនុស្សចំនួនច្រើនបែបនេះគួរតែមានការស្នើសុំមកកាន់សាលារាជធានីភ្នំពេញ។ លោកមានការសោកស្តាយចំពោះការប្រមូលផ្តុំដែលពុំបានសុំច្បាប់អនុញ្ញាត្តិនេះ ហើយថាសាលារាជធានីនឹងត្រៀមចាត់វិធានការនៅពេលមានការប្រមូលផ្តុំនេះ។
លោកថា៖ «វាមិនមែនធម្មតាទេ! វាជាការរៀបចំមនុស្ស២០០នាក់ ឧទាហរណ៍បើបងអញ្ចើញទៅខ្ញុំអញ្ចើញទៅយើងអង្គុយចុចទូរស័ព្ទរបស់យើងក្នុងក្រុមពីរបីនាក់អីទៅ អាហ្នឹងផ្សេង វាជាសកម្មភាពមួយ។ តែបើដូចជាសម្តីរបស់យើងថាអត់ជាមានជាការរៀបចំអីទេ ហេតុអីបានជាគៀងគរមនុស្សពីរបីរយនាក់ទៅ។ អញ្ចឹងវាគួរតែជាសកម្មភាពមួយដែលគួរមានការស្នើសុំមានការអនុញ្ញាតិ្តពីអជ្ញាធរដែនដី!»។
សំណុំរឿងឃាតកម្មលើលោក ឈុត វុទ្ធី ត្រូវបានតុលាការបិទបញ្ចប់ដោយអះអាងថាអ្នកដែលបាញ់សម្លាប់លោក ឈុត វុទ្ធី នោះគឺមន្ត្រីអាវុធហត្ថខេត្តកោះកុងម្នាក់លោក អ៊ិន រតនា ដែលលោក អ៊ិន រតនា ត្រូវមន្ត្រីស៊ើបអង្កេតរបស់រដ្ឋាភិបាលអះអាងថាបានបាញ់សម្លាប់ខ្លួនឯង ក្រោយពីបាញ់សម្លាប់លោក ឈុត វុទ្ធី ។
ទោះជាយ៉ាងណាសម្រាប់លោកម៉ាឡៃ លើកឡើងថាការបិទសំណុំរឿងនៃឃាតកម្មនេះគឺជាការបង្វែរពីការពិតមួយដែលនៅពីក្រោយការស្លាប់លោកវុទ្ធី ហើយថាលោកនឹងនៅតែទាមទាររហូតមានយុត្តិធម៌មួយដល់លោក ឈុត វុទ្ធី។
តាមឯកសារនានាបញ្ជាក់ថាលោក ឈុត វុទ្ធី បានបញ្ចប់ការសិក្សាថ្នាក់អនុបណ្ឌិតទាហានមកពីប្រទេសរុស្សី។ បន្ទាប់ពីបញ្ចប់ការសិក្សានៅឆ្នាំ១៩៩២ លោកបានធ្វើការនៅជ្ឈមណ្ឌលកំចាត់មីនកម្ពុជានិងធ្វើជាគ្រូបង្ហាត់នាយទាហាននៅក្រសួងការពារជាតិ។ លុះដល់ឆ្នាំ២០០៣ លោក ឈុត វុទ្ធី បានបំរើការនៅអង្គការឃ្លាំមើលបរិស្ថានអន្តរជាតិមួយឈ្មោះ គ្លូបល វីតនេស (Global Witness) មានតួនាទីជានាយករងនៃអង្គការមួយនេះ ដែលធ្វើការឃ្លាំមើលការកាប់ព្រៃឈើនៅកម្ពុជា។
ក្រោយពីរដ្ឋាភិបាលកម្ពុជាបានបណ្តេញអង្គការ(Global Witness) ពីកម្ពុជាលោក ឈុត វុទ្ធី បានបង្កើតអង្គការមួយឈ្មោះអង្គការពារធនធានធម្មជាតិ ដែលធ្វើការផ្តោតលើការពារព្រៃឈើនៅកម្ពុជា ។ ប៉ុន្តែសកម្មជនការពារព្រៃឈើដ៏ល្បីរូបនោះ ត្រូវគេបាញ់សម្លាប់នៅស្រុកមណ្ឌលសីមា ខេត្តកោះកុង។ ចំណែកឯក្រុមគ្រួសារលោក ឈុត វុទ្ធី វិញកំពុងទន្ទឹងរង់ចំាយុត្តិធម៌ បើទោះបីរដ្ឋាភិបាលប្រកាសបិទការស៊ើបអង្កេតករណីនេះ ដោយបន្សល់ទុកនូវការសង្ស័យជាច្រើន៕