តំណាងសហភាព សហព័ន្ធសហជីព និងសមាគមធ្វើការក្នុងវិស័យការងារនៅប្រទេសកម្ពុជា នៅតែរក្សាជំហរហែក្បួនតាមការស្នើសុំរបស់ខ្លួន នៃកម្មវិធី ទិវាពលកម្មអន្តរជាតិ ថ្ងៃ១ ឧសភា ២០១៧ នេះ បើទោះជាសាលារាជធានីភ្នំពេញបដិសេធ។
នៅព្រឹកថ្ងៃទី២៤ មេសា ២០១៧នេះ អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានប្រាប់ VOD ថា សាលារាជធានីអនុញ្ញាតឲ្យរៀបចំពិធីនៅទីស្នាក់ការរបស់សហជីពរៀងខ្លួន ឬទីតាំងឯកជនណាដែលមានការអនុញ្ញាតពីម្ចាស់ទីតាំង ដោយពុំដង្ហែក្បួន ឬការជួបជុំតាមសួនច្បារមុខCDCទេ។ លោកបានបញ្ជាក់មូលហេតុថា សួនច្បារមិនមែនជាកន្លែងសំរាប់ធ្វើសកម្មភាពបែបនេះ និងចង់បញ្ចៀសការប៉ះពាល់ចរាចរណ៍ និងសណ្តាប់ធ្នាប់។
លោក អាត់ ធន់ ប្រធានសហភាពការងារកម្ពុជា មានប្រសាសន៍ថា ខាងលោកមិនទាន់ទទួលបានការឆ្លើយតបផ្លូវការពីសាលាក្រុងទេ ប៉ុន្តែលោកថា លោកនៅតែរក្សាជំហរធ្វើដដែល ហើយលោកនឹងប្រជុំគ្នាធ្វើការសំរេច។
កាលពីថ្ងៃទី១០ មេសា ២០១៧ តំណាងសហភាព សហព័ន្ធសហជីព និងសមាគមធ្វើការក្នុងវិស័យការងារនៅប្រទេសកម្ពុជា បានស្នើសាលារាជធានីភ្នំពេញ រៀបចំកម្មវិធីខួបលើកទី១៣១ ទិវាពលកម្មអន្តរជាតិ ១ ឧសភា ២០១៧ ក្រោមប្រធានបទ «បញ្ហាប្រឈមរបស់កម្មករក្នុងការអនុវត្តច្បាប់សហជីព» ដែលមានអ្នកចូលរួម៣០០០នាក់ គ្រោងនឹងជួបជុំគ្នានៅសួនច្បារCDC មុខក្រុមប្រឹក្សាអភិវឌ្ឍន៍កម្ពុជា នៅពេលព្រឹក រួចបន្តហែក្បួនទៅកាន់រដ្ឋសភាជាតិ ដើម្បីដាក់ញាតិ៕
