ប្រមុខរដ្ឋាភិបាល បានយកទិវាជាតិប្រយុទ្ធនឹងជំងឺគ្រុនចាញ់ អំពាវនាវទៅស្ថាប័នពាក់ព័ន្ធ និងដៃគូអភិវឌ្ឍ ឲ្យបន្តចូលរួមលុបបំបាត់ជំងឺនេះ ដោយថា ដើម្បីជាបុព្វហេតុរួមចំណែកលើកមុខមាត់ប្រទេសជាតិ។
ទិវាជាតិប្រយុទ្ធនឹងជំងឺំគ្រុនចាញ់ នឹងត្រូវប្រារព្ធធ្វើឡើងនៅថ្ងៃស្អែកនេះ ដោយរដ្ឋាភិបាលបានកំណត់យកប្រធានបទ«ត្រៀមរួចជាស្រេចចូលរួមលុបបំបាត់ជំងឺគ្រុនចាញ់»។
ក្នុងសារលិខិតមួយដែលវីអូឌីទើបទទួលបាននៅថ្ងៃនេះ លោកនាយករដ្ឋមន្ត្រី ហ៊ុន សែន បានថ្លែងគាំទ្រ សកម្មភាពបំផុសការយល់ដឹង និងផ្លាស់ប្តូរផ្នត់គំនិតប្រជាជន ឲ្យចេះរស់នៅស្អាត។
លោកនាយករដ្ឋមន្ត្រីបានឲ្យដឹងទៀតថា ជំងឺគ្រុនចាញ់មិនត្រឹមតែធ្វើឲ្យប៉ះពាល់ដល់សុខភាព ចំណាយលុយសម្រាប់ព្យាបាល និងអាយុជីវិតប៉ុណ្ណោះទេ ប៉ុន្តែ លោកថា វាថែមទាំងបង្កផលប៉ះពាល់ជាអវិជ្ជមានដល់ការអភិវឌ្ឍសង្គម-សេដ្ឋកិច្ចដ៏ធ្ងន់ធ្ងរទៀតផង។
លោក ហ៊ុន សែន បានអំពាវនាវទៅស្ថាប័នរដ្ឋ វិស័យឯកជន ដៃគូអភិវឌ្ឍន៍ជាតិ និងអន្តរជាតិ ប្រព័ន្ធផ្សព្វផ្សាយ និងប្រជាពលរដ្ឋ ឲ្យបន្តចូលរួម និងគាំទ្របេសកម្មរបស់ក្រសួងសុខាភិបាល និងផែនការយុទ្ធសាស្ត្ររបស់រដ្ឋាភិបាលឆ្នាំ២០១១-២០២៥ ក្នុងការលុបបំបាត់ជំងឺគ្រុនចាញ់នៅកម្ពុជា។
របាយការណ៍ប្រចាំឆ្នាំរបស់ក្រសួងសុខាភិបាល បានឲ្យដឹងថា ចាប់ពីឆ្នាំ២០១១ ដល់ឆ្នាំ២០១៧ ជំងឺគ្រុនចាញ់បានថយចុះពី ៦២ ៥៨០ ករណី មកនៅត្រឹម ៣៦ ៤៥៦ ករណី ខណៈដែលចំនួនមនុស្សស្លាប់ដោយសារតែជំងឺនេះ បានថយចុះពី ៩៣នាក់ មកនៅសល់ត្រឹមតែ ១នាក់ប៉ុណ្ណោះ៕
