រដ្ឋាភិបាលបានបង្កើតតំបន់គ្រប់គ្រងជលផលសមុទ្រក្នុងខេត្តកែប ដោយថា ដើម្បីទប់ស្កាត់បទល្មើសនេសាទ អភិរក្សធនធានជីវចម្រុះជលផល និងលើកស្ទួយទេសចរណ៍ធម្មជាតិ។ នេះបើតាមសេចក្ដីសម្រេចថ្មីរបស់រដ្ឋាភិបាលកាលពីពេលថ្មីៗនេះ។
ក្នុងប្រកាសចុះថ្ងៃទី១២ ខែមេសា ក្រសួងកសិកម្ម រុក្ខាប្រមាញ់ និងនេសាទ បានសម្រេចបង្កើតតំបន់គ្រប់គ្រងជលផលសមុទ្រនៅប្រជុំកោះពោធិ៍ និងកោះទន្សាយ ក្នុងខេត្តកែប ដោយមានគោលដៅកំណត់តំបន់គ្រប់គ្រងជលសមុទ្រនៅប្រជុំកោះនេះ គ្រប់គ្រង និងអភិរក្សធនធានជលផល ជីវចម្រុះ និងប្រព័ន្ធអេកូឡូស៊ីសមុទ្រឲ្យមានប្រសិទ្ធិភាព។
ជាងនេះទៅទៀត ក្រសួងបានបញ្ជាក់ថា តំបន់អភិរក្សមួយនេះ ត្រូវបានបង្កើតឡើងដើម្បីធានាការនេសាទប្រកបដោយនិរន្តភាព លើកស្ទួយវិស័យទេសចរណ៍ធម្មជាតិ ការវិនិយោគតំបន់កោះ និងពង្រឹងភាពធន់ទៅនឹងបម្រែបម្រួលអាកាសធាតុនៅខេត្តជាប់ឆ្នេរសមុទ្រមួយនេះ។
បើតាមប្រកាសដដែលនេះ តំបន់អភិរក្សជលផលសមុទ្រមួយនេះ គ្របដណ្ដប់ទៅលើកោះចំនួន ១២ ក្នុងចំណោមកោះទាំង ១៣របស់ខេត្តកែប ឬស្មើនឹងផ្ទៃក្រឡាសរុប ១១ ៣០៧ហិកតា៕