ពលរដ្ឋមួយក្រុមដែលអះអាងថា ជាអ្នករស់នៅក្នុងសហគមន៍បុរីកីឡាមានជម្លោះដីធ្លីជាមួយក្រុមហ៊ុនផានអ៊ីម៉ិចនោះ បានស្វែងរកកិច្ចអន្តរាគមន៍ពីលោកនាយករដ្ឋមន្រ្តី ហ៊ុន សែន ឲ្យជួយដោះស្រាយបញ្ចប់វិវាទដីធ្លីរបស់ពួកគេ។
អ្នកស្រី អូន កងវិសាគ័រ ដែលអះអាងថា តំណាងឲ្យពលរដ្ឋ ៤៧គ្រួសារនោះ បានប្រាប់វីអូឌីថា ពួកគាត់ចំនួន ១០នាក់ បានប្រមូលផ្ដុំគ្នាដាក់ញ្ញត្តិនៅខុទ្ទកាល័យនាយករដ្ឋមន្រ្តី ដើម្បីសុំជួយដោះស្រាយបញ្ចប់ជម្លោះដីធ្លី ដោយថា វិវាទនោះអូសបន្លាយរយៈពេល ៦ឆ្នាំហើយ ដោយថា អាជ្ញាធរមូលដ្ឋានមិនបានដោះស្រាយបញ្ចប់ឲ្យពួកគាត់នោះទេ។
អ្នកស្រីបន្ថែមថា ពួកគាត់ពុំធ្លាប់ចេញតវ៉ានោះឡើយ ចាប់តាំងពីក្រុមហ៊ុនឈួសឆាយផ្ទះសម្បែងរបស់ពួកគាត់នៅឆ្នាំ២០១២ ដោយថា ពួកគាត់ស្ដាប់តាមការណែនាំរបស់អាជ្ញាធរខណ្ឌ៧មករា ដែលសន្យាដោះស្រាយវិវាទនេះ។
អ្នកស្រីបន្ថែមថា៖ «កាលពីដំបូងហ្នឹង គេប្រាប់ថា កុំឲ្យដើរ កុំឲ្យអុកឡុក តែដើរឡុកឡុក គេអត់ដោះស្រាយឲ្យយើងទេ។ អញ្ចឹង យើងនៅស្ងៀមទៅ។ អ្នកណាអាចជួលផ្ទះបាននៅៗសិនទៅ ចាំដល់ពេលដោះស្រាយ គេហៅយើងមកដោះស្រាយ។ ដល់ពេលអញ្ចឹង ប៉ុន្មានថ្ងៃមុខគេប្រកាសក្នុងទូរទស្សន៍ថា បុរីកីឡាគេដោះស្រាយចប់ ហើយពួកខ្ញុំក៏ភ្ញាក់ផ្អើល ដោះស្រាយចប់អី បើពួកខ្ញុំមិនទាន់បានផងហ្នឹង។ ការពិតគ្មានចប់ទេ ពួកខ្ញុំមានឯកសារត្រឹមត្រូវទាំងអស់»។
ពលរដ្ធម្នាក់ទៀតអ្នកស្រី ភោគ សុភីន និយាយថា អាជ្ញាធរមូលដ្ឋានឃុបឃិតគ្នាបំភ្លេចសន្យាដោយទុកពួកគាត់ចោលដោយមិនដោះស្រាយសំណងផលប៉ះពាល់ឲ្យពលរដ្ឋឡើយ។
អ្នកស្រីបន្ថែមថា៖ «ពេលអាជ្ញាធរដោះស្រាយ ពួកបងមិនដែលមានឈ្មោះដោះស្រាយម្តងណាទេ ពេលប្រជុំនៅសាលាក្រុង គេថា ខ្ញុំនៅក្រៅចេនឡា គេថា គាត់អត់ដោះស្រាយឲ្យទេ គេទទួលស្គាល់តែអ្នកនៅក្នុងចេនឡា។ ចុះឈួសឆាយផ្ទះខ្ញុំហ្នឹងមានច្បាប់អីណាឲ្យឈួស ដែលខ្ញុំនៅទីនេះជិត ៣០ឆ្នាំហើយ មានដីមានផ្ទះត្រឹមត្រូវ»។
មន្រ្តីខុទ្ទកាល័យនាយករដ្ឋមន្រ្តី លោក គង់ ចំរើន មិនទទួលយកញត្តិរបស់ពលរដ្ឋទាំងនោះទេ ដោយលើកហេតុផលការធ្វើសំណើរនោះខុសនីតិវិធីរដ្ឋបាល ដោយតម្រូវឲ្យធ្វើសារជាថ្មី។
ចំណែកអ្នកនាំពាក្យសាលារាជធានីភ្នំពេញ លោក ម៉េត មាសភក្តី មិនទាន់អាចឆ្លើយបានភ្លាមៗទេជុំវិញរឿងពលរដ្ឋមួយក្រុមទៀតចេញតវ៉ារឿងដីធ្លីនៅបុរីកីឡានេះ ដោយប្រាប់ថា ចាំស្រាវជ្រាវ និងពិនិត្យមើលសិន។
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត មានប្រសាសន៍ថា វិវាទដីធ្លីនៅបុរីកីឡា គឺមានពលរដ្ឋដែលរងផលប៉ះពាល់មួយចំនួនបានចេញតវ៉ា និងពលរដ្ឋខ្លះទៀតមិនបានចេញចេញតវ៉ានោះទេ ដោយសារស្តាប់តាមអាជ្ញាធរ។
លោកបានបន្ទោសបញ្ហានេះទៅលើដំណោះស្រាយគ្មានតម្លាភាពរបស់អាជ្ញាធរមូលដ្ឋាន ហើយលោកជំរុញទៅអាជ្ញាធរពាក់ព័ន្ធ ឲ្យយកច្បាប់ជាគោលក្នុងការដោះស្រាយបញ្ចប់វិវាទដីធ្លីនេះ ជាជាងប្រើអំណាចគំរាមកំហែងដើម្បីដោះស្រាយ។
លោកបន្ថែមថា៖ « លោកនាយរដ្ឋមន្រ្តីបានលើកឡើង ហើយមានការព្រមានដល់មន្រ្តីថ្នាក់ក្រោម ជាពិសេសរដ្ឋមន្រ្តីដែលពាក់ព័ន្ធហ្នឹងថា ឲ្យដោះស្រាយឲ្យប្រជាពលរដ្ឋ កុំទុកឲ្យប្រជាពលរដ្ឋហ្នឹងទៅតវ៉ាដល់ផ្ទះសម្តេច ហើយអីកុំចាំតែសម្តេចធ្វើការដោះស្រាយ។ អញ្ចឹង សំខាន់បំផុតអាជ្ញាធរមូលដ្ឋាន និងអាជ្ញាធរថ្នាក់ក្រោមហ្នឹង ត្រូវដោះស្រាយបញ្ហាទាំងអស់នេះ។ យើងជាសង្គមស៊ីវិល យើងតែងតែផ្តល់អនុសាសន៍តាំងពីដើមមក យើងធ្វើការដោះស្រាយអ្វីក៏ដោយ យើងត្រូវយកច្បាប់មកធ្វើការដោះស្រាយ កុំដោះស្រាយតាមលក្ខណៈបុគ្គល តាមលក្ខណៈនៃអំណាច»។
កាលពីឆ្នាំ២០០៣ ក្រុមហ៊ុនផានអ៊ីម៉ិចរបស់លោកស្រី ស៊ុយ សុផាន ទទួលបានសិទ្ធិពីរដ្ឋាភិបាលធ្វើការអភិវឌ្ឍនៅសហគមន៍បុរីកីឡា ដោយកាលណោះក្រុមហ៊ុននេះ សន្យាសង់អគារចំនួន ១០ ជូនពលរដ្ឋវិញ ប៉ុន្តែ ក្រុមហ៊ុនសង់បានតែ ៨អគារក៏ផ្អាក ដោយលើកហេតុផលថា ក្ស័យធនដែលបណ្តាលឲ្យពលរដ្ឋមួយចំនួនដែលមិនទទួលបានសំណង ចេញតវ៉ារហូតមកដល់សព្វថ្ងៃនេះ៕