មេធាវីការពារក្តីឲ្យមន្ត្រីសិទ្ធិមនុស្សលើកឡើងថា តុលាការជាន់ខ្ពស់បានច្រានចោលជាថ្មីទៀតពាក់ព័ន្ធសំណុំរឿង «សូកប៉ាន់សាក្សី» ដែលស្នើសុំនៅក្រៅឃុំបណ្តោះអាសន្ន ដោយថាសាក្សីមួយចំនួនមិនបានចូលបំភ្លឺតាមការកោះហៅរបស់តុលាការ ករណីនេះមេធាវីថា ជាការរំលោភសិទ្ធិកូនក្តីធ្ងន់ធ្ងរ។
មន្ត្រីសិទ្ធិមនុស្សមកពីសមាគមអាដហុក៤រូប ត្រូវបានចៅក្រមសាលាឧទ្ធរណ៍សម្រេចបន្តឃុំខ្លួននៅពន្ធនាគារ តាមអំណាចសាលក្រមសាលាដំបូងដដែល ខណៈមន្ត្រីសិទ្ធិមនុស្សទំាងនោះត្រូវបានឃុំខ្លួនជាងមួយឆ្នាំមកហើយបើទោះជាមិនមានភស្តុតាងគ្រប់គ្រាន់ដើម្បីសវនាការ។
លោកមេធាវី ឡោ ជុនធី ការពារក្តីឲ្យមន្ត្រីសមាគមអាហុក បានថ្លែងប្រាប់អ្នកសារព័ត៌មាននៅថ្ងៃ២៤ខែឧសភានេះថា ចៅក្រម បានសម្រេចពន្យាពេលស៊ើបសួរលើសំណុំនេះបន្តទៀត ដោយសំអាងថាសាក្សីមួយចំនួនមិនបានចូលបំភ្លឺ តាមការកោះហៅ និងមួយចំនួនទៀតរត់គេចខ្លួន។ ករណីនេះ លោក ជុនធី យល់ថា ការលើកឡើងរបស់ចៅក្រមមិនសមហេតុផល ដោយថាតុលាការគួរតែបិទបញ្ចប់ការស៊ើបសួរសំណុំរឿងនេះ ដោយថា ការបន្តឃុំខ្លួនកូនក្តីលោក ធ្វើឲ្យប៉ះពាល់ដល់សិទ្ធិពួកគេយ៉ាងធ្ងន់ធ្ងរ។
លោកនិយាយថា«ការឃុំខ្លួនប៉ះពាល់ដល់សិទ្ធិសេរីភាពបុគ្គលខ្លំាងណាស់ ហើយអ្វីដែលផលវិបាកមែនទែនដល់ក្រុមគ្រួសារគាត់ កូនចៅគាត់ វាលំបាកតាមហ្នឹងទៀត យើងយល់ឃើញថា វាគួរចូលទៅដល់ដំណាក់កាលបិទសំណុំរឿងចេញជាលទ្ធផល ជាលក្ខណៈផ្លូវច្បាប់គឺចេញដីកាដំណោះស្រាយ ដីកាដំណោះស្រាយវាអាចថា តើកូនក្តីរបស់យើងត្រូវបានដោះលែងឬមួយត្រូវការបញ្ជូនទៅជំនុំជម្រះ វាត្រូវចេញអាហ្នឹង»។
យ៉ាងណាក៏ដោយ លោក ជុនធី បានបញ្ជាក់ថា លោកនឹងពិភាក្សាជាមួយកូនក្តីថា តើត្រូវប្តឹងសាទុក្ខទៅតុលាការកំពូលឬយ៉ាងណា។
អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្ស អង្គការលីកាដូ លោក អំ សំអាត យល់ថា តុលាការសម្រេចបន្តឃុំខ្លួនមន្ត្រីសិទ្ធិមនុស្សនឹងធ្វើឲ្យប៉ះពាល់ដល់មុខមាត់រដ្ឋាភិបាល ក្រោមការរិះគន់ពីអង្គការជាតិ និងសហគមន៍អន្តរជាតិ។
លោក អំ សំអាត យល់ថា«បន្តឃុំខ្លួនគាត់ [មន្ត្រីសិទ្ធិមនុស្ស] វាអត់មានអីចំណេញ ទីមួយគឺនៅតែបន្តមានការរិះគន់ពីសហគមន៍ជាតិ និងអន្តរជាតិ យើងឃើញថ្មីៗមានទំាងអង្គការសហប្រជាជាតិ មានទំាងសហរដ្ឋអាមេរិកគេមានការបន្តរិះគន់ច្រើន ហើយមុននោះ យើងក៏ឃើញសហគមន៍អឺរ៉ុប ដែលគេលើកឡើងពីបញ្ហានេះ ហើយដូចជាជំនួយអភិវឌ្ឍន៍នៅកម្ពុជាមួយចំនួន គឺឥឡូវស្ថិតនៅក្នុងការពិចារណារបស់គេទៅទៀត ខ្ញុំគិតថាធ្វើឲ្យប៉ះពាល់ដល់មុខមាត់រដ្ឋាភិបាលយើងទៅវិញ»។
គួរបញ្ជាក់ថា មន្ត្រីការពារសិទ្ធិមនុស្សសមាគមអាដហុក៤នាក់ មាន លោក នី សុខា លោក ណៃ វ៉ង់ដា លោក យី សុខសាន្ត និងលោកស្រី លឹម មុន្នី ត្រូវតុលាការសម្រេចឃុំខ្លួនបណ្តោះអាសន្ននៅពន្ធនាគារព្រៃស កាលពីដើមឆ្នាំ២០១៦ ដោយចោទប្រកាន់ពីបទ «សូកប៉ាន់សាក្សី» ក្នុងសំណុំរឿងដ៏ចម្រោងចម្រាស់មួយ ពាក់ព័ន្ធនឹងនាង ខុម ចាន់តារាទី ហៅ “ស្រីមុំ” ដែលត្រូវគេទម្លាយថា មានទំនាក់ទំនងស្នេហា ជាមួយលោក កឹម សុខា៕
