មេដឹកនាំបក្សប្រឆាំង នៅថ្ងៃនេះ បានប្រកាសប្រាប់ទៅសកម្មជន និងអ្នកគាំទ្ររបស់ខ្លួន ឲ្យប្រកាន់យក “យុទ្ធនាការជាវិជ្ជមាន” សម្រាប់ការប្រកួតប្រជែងការបោះឆ្នោត ដែលនេះត្រូវបានគេមើលឃើញថា ជាការឆ្លើយតបទៅនឹងសម្ដីគំរាមកំហែងអំពីសង្គ្រាមពីសំណាក់មេដឹកនាំបក្សកាន់អំណាច។
លោកនាយករដ្ឋមន្ត្រី ហ៊ុន សែន កាលពីថ្លែងនៅឯទឹកដីខេត្តត្បូងឃ្មុំថា មិនចាំបាច់មានកាំភ្លើងនោះទេ សូម្បីតែអណ្ដាតក៏បង្កើតសង្គ្រាមបានដែរ។ លោកថា កម្ពុជានៅសល់សង្គ្រាមនៅឡើយ ហើយប្រាប់ទៅកងទ័ពឲ្យត្រៀមខ្លួនជានិច្ចដើម្បីបង្ក្រាបរាល់ការប៉ុនប៉ងផ្ដួលរំលំរដ្ឋាភិបាលស្របច្បាប់។
ដោយអាចថា ជាសារឆ្លើយតបនោះ លោក កឹម សុខា បានថ្លែងនៅព្រឹកថ្ងៃនេះនៅឯខេត្តតាកែវថា លោកជឿជាក់ថា ពលរដ្ឋខ្មែរមិនចង់ស្ដាប់សារនយោបាយអវិជ្ជមាន ដូចជា ការគំរាមកំហែង ការបំភិតបំភ័យ ដែលលោកថា នាំឲ្យមានការឈឺចាប់ និងការបាក់បែករវាងខ្មែរ និងខ្មែរនោះទេ។
លោក កឹម សុខា បានជំរុញទៅសកម្មជន ថ្នាក់ដឹកនាំគណបក្សសង្គ្រោះជាតិទាំងអស់ ឲ្យប្រកាន់យកនូវគោលការណ៍ “យុទ្ធនាការជាវិជ្ជមាន” ក្នុងការប្រកួតប្រជែងការបោះឆ្នោត៕
