តំណាងស្ថានទូតកម្ពុជានៅទីក្រុងបាងកក បានស្នើទៅអាជ្ញាធរថៃ ឲ្យពន្លឿនដំណើរការកាត់ក្ដីនៃសំណុំរឿងមួយពាក់ព័ន្ធនឹងពលករខ្មែរ ១៨នាក់ ដែលត្រូវបានជួញដូរឆ្លងដែនទៅកាន់ប្រទេសថៃ និងត្រូវបានអាជ្ញាធរថៃចាប់ខ្លួន។ នេះដោយយោងតាមសេចក្ដីប្រកាសព័ត៌មានរបស់ក្រសួងការបរទេសកម្ពុជា កាលពីថ្ងៃម្សិលមិញ។
អ្នកនាំពាក្យក្រសួងការបរទេសកម្ពុជា លោក ជុំ សុន្ទរី បានថ្លែងក្នុងសេចក្ដីប្រកាសព័ត៌មាននោះថា ពលករខ្មែរ ១៩នាក់ ត្រូវបានតម្រួតថៃនៅខេត្តណារ៉ាធីវ៉ាត់ ស្ថិតនៅភាគខាងត្បូងប្រទេសថៃ ចាប់ខ្លួនកាលពីថ្ងៃទី៧ ខែមិថុនាកន្លងមក បន្ទាប់ពីឆ្លងដែន និងធ្វើការខុសច្បាប់នៅទីនោះ។ លោក ជុំ សុន្ទរី បន្តថា ពលករខ្មែរ ១៨នាក់ ត្រូវបានបញ្ជូនទៅរក្សាទុកនៅមន្ទីរថែរក្សាជនរងគ្រោះនៃការជួញដូរមនុស្ស នៅខេត្តណារ៉ាធីវ៉ាត់ ខណៈដែលពលករខ្មែរម្នាក់ ត្រូវបានតម្រួតថៃចាប់ខ្លួន ពាក់ព័ន្ធនឹងការរក្សាទុកថ្នាំញៀនអំហ្វេតាមីនចំនួន ៣០០គ្រាប់។
បើតាមអ្នកនាំពាក្យរូបនេះ ពលករខ្មែរទាំងនោះ ត្រូវបានគេជួញដូរឆ្លងដែរ និងបង្ខំឲ្យធ្វើការនៅលើទូក ដោយមិនទទួលបានប្រាក់កម្រៃពលកម្មនោះឡើយ។
លោក ជុំ សុន្ទរី បញ្ជាក់ថា មន្ត្រីស្ថានទូតកម្ពុជាប្រចាំនៅទីក្រុងបាងកក បានស្នើទៅតម្រួតថៃ ឲ្យជំរុញដំណើរការកាត់ក្ដីសំណុំរឿងនេះ ដើម្បីពន្លឿនការទូទាត់សំណង និងការបញ្ជូនត្រឡប់មកប្រទេសកម្ពុជាវិញ៕