ជំនន់​ទឹក​ភ្លៀង​រហូត​មក​ដល់ពេល​នេះ​ប៉ះពាល់​ដំណាំ​ស្រូវ​ជិត​​២​ម៉ឺន​ហិកតា

ដោយ លោក ហ៊ុន សិរីវឌ្ឍន៍​​ | ថ្ងៃចន្ទ ទី២៤ ខែតុលា ឆ្នាំ២០១៦​ ម៉ោង 3:28 PM | កសិកម្ម | 0 | 5656 ទឹកជំនន់នៃតំបន់មួយក្នុងរាជធានីភ្នំពេញ កាលពីពេលកន្លងទៅ

រហូតមកដល់ពេលនេះដំណាំស្រូវជិត២ម៉ឺនហិកតារងផលប៉ះពាល់ពីជំនន់ទឹកភ្លៀងនៅខេត្តចំនួន៦។ នេះបើតាមការបញ្ជាក់របស់មន្ត្រីក្រសួងកសិកម្ម។

អ្នកនាំពាក្យក្រសួងកសិកម្មលោក ឡោ រស្មី បានឲ្យវីអូឌីដឹងថា ទឹកជំនន់បានធ្វើឲ្យប៉ះពាល់ដំណាំស្រូវរបស់កសិករជិត២ម៉ឺនហិកតា ដែលក្នុងនោះស្រូវជាង៣ពាន់ហិកតាត្រូវបានបំផ្លាញទាំងស្រុង។

លោកមានប្រសាសន៍ថា៖ «ប៉ះពាល់មិញខ្ញុំជម្រាបជូនគឺមានខេត្តកំពង់ស្ពឺ ស្វាយរៀង កំពង់ឆ្នាំង ព្រៃវែង ត្បូងឃ្មុំ និងតាកែវ ប៉ះពាល់ជាង១៧០០០ហិកតា ហើយនឹងខូចខាតគឺមាន៣១៨៦ហិកតា ក្នុងហ្នឹងគឺមានខេត្តស្វាយរៀងជាង៨០០ហិកតា ខេត្តព្រៃវែង២ពាន់ហិកតាជាង ខេត្តត្បូងឃ្មុំ៦០ហិកតា»។

លោកបន្ថែមថា បើធៀបចំនួននៃការខូចខាតនេះជាមួយទិន្នផលស្រូវប្រចាំឆ្នាំរបស់កសិករកម្ពុជា គឺជាចំនួននេះមានផលប៉ះពាល់តិចតួចនៅឡើយ តែលោកថាពេលនេះក្រសួងចេញសារាចរណ៍ក្នុងការស្តារការខូចខាតនិងជួយដល់ប្រជាកសិករ ដែលរងផលប៉ះពាល់ពីគ្រោះធម្មជាតិនេះហើយ។

លោកថារហូតដល់ចុងខែតុលានេះ អាចមានជំនន់ទឹកភ្លៀងនេះបន្ថែមទៀត ដែលតម្រូវឲ្យមានការប្រុងប្រយ័ត្នបន្ថែមចំពោះកសិផលនិងគោក្របីរបស់កសិករ។ ក្នុងករណីដែលសត្វពាហនៈរបស់កសិករមានជំងឺ ឬមានបញ្ហាទាក់ទងកសិកម្ម ប្រជាកសិករអាចរាយការណ៍ទៅកាន់ភ្នាក់ងាររបស់មន្ទីរកសិកម្មខេត្តឬមកកាន់លេខ ១២៨៧ ឬ១២៨៩ ដើម្បីឲ្យក្រសួងចាត់វិធានការ។

បើតាមលោក ឡោ រស្មី រហូតមកដល់ពេលនេះការបង្កបង្កើនផលស្រូវរដូវវស្សារបស់កសិករកម្ពុជាបានបញ្ចប់ការងាររបស់ខ្លួនហើយ នៅលើផ្ទៃដីសរុបប្រមាណ២៨១ពាន់ហិកតា៕

សរសេរមកកាន់ លោក ហ៊ុន សិរីវឌ្ឍន៍ តាមរយៈ sirivadh@vodhotnews.com

ចាប់អារម្មណ៍នឹងព័ត៌មានប្រភេទនេះ? ចុះឈ្មោះដើម្បីទទួលបានព័ត៌មានថ្មីៗ

Fields marked with an * are required